ខេត្តបន្ទាយមានជ័យ ៖ ករណីឆាបឆេះផ្ទះ២ខ្នងខ្ទេចខ្ទីរក្លាយជាផេះផង់ កើតឡើងកាលពីរសៀលថ្ងៃទី៤ វិច្ឆិកា ២០២២ ស្ថិតនៅភូមិប៉ោយប៉ែត សង្កាត់អូរជ្រៅ បានដឹងពីមូលហេតុហើយ គឺបណ្តាលមកពីផ្ទុះកំប៉ុងហ្គាស…
ខេត្តបន្ទាយមានជ័យ ៖ ករណីឆាបឆេះផ្ទះ២ខ្នងខ្ទេចខ្ទីរក្លាយជាផេះផង់ កើតឡើងកាលពីរសៀលថ្ងៃទី៤ វិច្ឆិកា ២០២២ ស្ថិតនៅភូមិប៉ោយប៉ែត សង្កាត់អូរជ្រៅ បានដឹងពីមូលហេតុហើយ គឺបណ្តាលមកពីផ្ទុះកំប៉ុងហ្គាស ។ អ្វីដែលគួរឱ្យអាសូរនោះ គឺគ្រួសាមួយក្នុងបន្ទុកមានកូននឹងចៅរហូតជាង១០នាក់ ឯស្ត្រីជាប្រពន្ធក៏ឈឺធ្ងន់ទៀតផង។
បើតាមរបាយការណ៍របស់សមត្ថកិច្ចបានឲ្យដឹងថា ផ្ទះទាំង២ខ្នងខាងលើ ១ខ្នងជារបស់ឈ្មោះឈួន វេត ភេទប្រុស អាយុ៦៩ឆ្នាំ ប្រភេទផ្ទះឈើប្រក់ស័ង្កសីទំហំ៥ម៉ែត្រ គុណនិង១៥ម៉ែត្រ ។ រីឯ១ខ្នងទៀតជារបស់ឈ្មោះផឹមណាង ភេទប្រុស អាយុ៥៩ឆ្នាំ ប្រភេទផ្ទះឈើប្រក់សង្កសីដូចគ្នា ទំហំ៥ម៉ែត្រគុណនឹង១២ម៉ែត្រ។
តាមរបាយការណ៍បញ្ជាក់ថា ករណីអគ្គិភ័យនេះ បណ្តាលមកពីផ្ទុះកំប៉ុងហ្គាស។ មេភូមិប៉ោយប៉ែត លោកស្រីស៊ិន ណាំយ៉ុង បានប្រាប់កោះសន្តិភាពតាមទូរស័ព្ទថា ការឆាបឆេះផ្ទះនេះដំបូងបណ្តាលមកពីផ្ទះរបស់ឈ្មោះផឹម ណាង ដែលឱ្យស្ត្រីចំណាស់ម្នាក់ស្នាក់នៅ ហើយទំនងជាស្ត្រីខាងលើ ដាំទឹកចោលមិនបានបិទភ្លើងរវល់ចេញទៅរើសអេតចាយ ក៏ក្លាយជាបញ្ហាតែម្តង។
លោកស្រីមេភូមិបញ្ជាក់ថា ផ្ទះ១ខ្នងទៀតដែលម្ចាស់ឈ្មោះឈួន វេត ក្រីក្រក្នុងបន្ទុកគ្រួសាគ្នាច្រើនរហូតជាង១០នាក់ ហើយស្ត្រីជាប្រពន្ធនៃគ្រួសាខាងលើ ធ្លាក់ខ្លួនឈឺដេកនឹងកន្ទេលស្ទើរតែយកចេញមិនចង់ទាន់ពេលអគ្គិភ័យឆាបឆេះឡើង។ មិនតែប៉ុណ្ណោះ លោកស្រីមេភូមិបន្តថា ផ្ទះគ្រួសានេះក៏ភ្លើងឆេះអស់ទាំងស្រុងឯឯកសាអ្វីៗ ក៏ឆេះគ្មានសល់ដែរ។
យ៉ាងណាក៏ដោយ ទាំងសមត្ថកិច្ចនិងអាជ្ញាធរមិនទាន់ដឹងពីទំហំខូចខាតនៅឡើយទេ ដោយសារម្ចាស់ផ្ទះទាំង២ខ្នងមិនទាន់ប្រាប់ឲ្យដឹងនៅឡើយ ។
ព័ត៌មានបន្ថែមកោះសន្តិភាពនឹងមានផ្សាយជូនបន្ត។
ចែករំលែកព័តមាននេះ