ព្រះអគ្គីលេបត្របាក់យ៉ាងសន្ធោសន្ធៅ ឆក់យកជីវិតលោកតាម្ចាស់ផ្ទះនៅភ្នក់ភ្លើង(វីដេអូ)
- ស្វាយរៀង
អគ្គិភ័យបានឆាបឆេះផ្ទះអស់មួយខ្នង និងបណ្តាលឱ្យឆេះលោកតាម្ចាស់ផ្ទះម្នាក់អាយុ៧០ឆ្នាំ ស្លា.ប់នៅក្នុងភ្លើងគួរឲ្យអាសូរ
ខេត្តស្វាយរៀង ៖ អគ្គិភ័យបានឆាបឆេះផ្ទះអស់មួយខ្នង និងបណ្តាលឱ្យឆេះលោកតាម្ចាស់ផ្ទះម្នាក់អាយុ៧០ឆ្នាំ ស្លា.ប់នៅក្នុងភ្លើងគួរឲ្យអាសូរ។ ករណីនេះបានកើតឡើងនៅវេលាម៉ោង៩និង១០នាទីព្រឹក ថ្ងៃទី០២ ខែវិច្ឆិកា ឆ្នាំ២០២២ នៅចំណុចខាងលិចក្លោងទ្វារវត្តស្វាយជ្រំ ស្ថិតក្នុងភូមិស្វាយក្ងោ ឃុំស្វាយជ្រំ ស្រុកស្វាយជ្រំ។
បើតាមសមត្ថកិច្ចបានឲ្យដឹងថា ក្រោយពីទទួលព័ត៌មានថាមានអគ្គិភ័យឆាបឆេះផ្ទះរបស់ប្រជាជនភ្លាម សមត្ថកិច្ចក៏បានចុះទៅធ្វើអន្តរាគមន៍ភ្លាមៗ ដោយមានកម្លាំងមូលដ្ឋាន កងរាជអាវុធហត្ថស្រុកស្វាយជ្រំ កម្លាំងបញ្ជាការដ្ឋានកងរាជអាវុធហត្ថខេត្ត ដឹកនាំដោយលោកវរសេនីយ៍ទោ ចែវ សុគន្ធ នាយរងសេនាធិការ និងលោកវរសេនីយ៍ត្រី កែវ ធី មេបញ្ជាការមូលដ្ឋានកងរាជអវុធហត្ថស្រុកស្វាយជ្រំ សហការជាមួយលោកអភិបាលស្រុក និងកម្លាំងស្នងការនគរបាលខេត្ត អធិការនគរបាលស្រុក កម្លាំងផ្នែកសឹករងស្រុក ដោយប្រើប្រាស់រថយន្តពន្លត់អគ្គិភ័យចំនួន៥គ្រឿង ក្នុងនោះមានរថយន្តពន្លត់អគ្គិភ័យកងរាជអាវុធហត្ថខេត្ត០១គ្រឿង និងរថយន្តពន្លត់អគ្គិភ័យស្នងការដ្ឋាននគរបាលខេត្តចំនួន៤គ្រឿង។
ប្រភពដដែលបន្តថា ម្ចាស់ផ្ទះរងគ្រោះខាងលើនេះ មានឈ្មោះ កៅ យាន ភេទប្រុស អាយុ៧០ឆ្នាំ រស់នៅក្នុងភូមិកើតហេតុខាងលើ បានស្លា.ប់នៅក្នុងភ្លើង។ ហើយចំពោះសម្ភារៈខូចខាតរួមមាន ៖ ១- ផ្ទះ០១ខ្នងទំហំ ៧ម៉ែត្រx៩ម៉ែត្រ ដំបូលក្បឿងថ្មក្រោម ឈើលើជញ្ជាំងក្តារនាប ឆេះអស់សល់តែផេះ, ២- រថយន្តសាំយ៉ុង០១គ្រឿង, ៣- ប្លង់ដី ១៥ប្លង់, ៤- ប្រាក់ ១,០០០,០០០រៀល, ៥- ប្រាក់ដុល្លារ ១,០០០ដុល្លារ, ៦- ទូដាក់ខោអាវចំនួន០៤ និងខោអាវ០៤ទូ, ៧- អត្តសញ្ញាណប័ណ្ណ១សន្លឹក, ៨- គ្រែចំនួន៥គ្រឿង, ៩-សាឡុង១ឈុត, ១០- សម្ភារៈប្រើប្រាស់មួយចំនួនទៀត។ ហើយបើតាមសមត្ថកិច្ចបានសន្និដ្ឋានថា មូលហេតុគឺបណ្តាលមកឆ្លងចរន្តអគ្គិសនី ។
ប្រភពដដែលបន្តទៀតថា មុនពេលកើតហេតុ ជនរងគ្រោះបានបិទទ្វារ ចាក់សោផ្ទះខាងក្នុង រួចដេកនៅក្នុងបន្ទប់ម្នាក់ឯង ដោយកូនៗចេញទៅធ្វើការនៅក្រៅអស់ បន្សល់ទុកតែលោកតាឲ្យនៅចាំផ្ទះ។ លុះនៅព្រឹកកើតហេតុ ទំនងជាលោកតាមិនស្រួលខ្លួនក៏បានចាក់សោផ្ទះដេកទៅ ហើយដោយសារប្រព័ន្ធខ្សែភ្លើងចាស់ ខ្សែតូចទៀត ទើបសង្ស័យថា មកពីខ្សែភ្លើងរលាត់ដាច់ធ្វើឲ្យឆ្លងចរន្តអគ្គិសនី បណ្តាលឱ្យទុស្សេខ្សែភ្លើងបង្កក្លាយជាអគ្គិភ័យតែម្តង។
ប្រភពដដែលបញ្ជាក់ទៀតថា ណាមួយផ្ទះរបស់ជនរងគ្រោះមានគ្រឿងឈើច្រើន និងរថយន្ត១គ្រឿងនៅក្នុងផ្ទះទៀត ធ្វើឱ្យភ្លើងឆាបឆេះខ្លាំង ទើបអ្នកជិតខាងឃើញ ក៏ទូរស័ព្ទរាយការណ៍ប្រាប់សមត្ថកិច្ចមកជួយអន្តរាគមន៍ ប៉ុន្តែដោយសារកន្លែងកើតហេតុឆ្ងាយពីទីរួមខេត្ត ហើយទម្រាំរថយន្តពន្លត់អគ្គិភ័យមកដល់ គឺអណ្ដាតភ្លើងបានឆាបឆេះពេញបន្ទុកទៅហើយ។ ចំណែកម្ចាស់ផ្ទះវិញ បានចាក់សោផ្ទះខាងក្នុង ទម្រាំពន្លត់ភ្លើងរលត់ជនរងគ្រោះបានស្លា.ប់បាត់បង់ជីវិតបាត់ទៅហើយ ពិតជាគួរឱ្យអាសូរណាស់ ពេលកូនៗមកដល់គឺផ្ទះឆេះអស់ទៅហើយ ឪពុកក៏បានស្លា.ប់ក្នុងភ្លើងទៀត តើកូនៗណាមិនស្លុតចិត្ត?។
ចែករំលែកព័តមាននេះ