ខេត្តពោធិ៍សាត់ ៖ តូបលក់អីវ៉ាន់មួយកន្លែងយីហោ អ៊ី ឈុនហ៊ួយ ដែលសង់នៅជាប់មាត់ស្ទឹងពោធិ៍សាត់ ត្រូវបានបា.ក់ស្រុតធ្លាក់ចូលក្នុងស្ទឹង រួមទាំងឥវ៉ាន់ចាប់ហួយជាច្រើនត្រូវបាត់បង់ និងខូចខាតទាំងស្រុង។ ហេតុការណ៍នេះ បានកើតឡើងវេលាម៉ោង០៧យប់ថ្ងៃទី០១ ខែវិច្ឆិកា ឆ្នាំ២០២២ នៅចំណុចមាត់ស្ទឹងក្នុងភូមិស្វាយលួង ឃុំស្វាយលួង ស្រុកកណ្ដៀង ខេត្តពោធិ៍សាត់។
លោក អ៊ុន ស៊ី អធិការនគរបាលស្រុកកណ្តៀងបានឱ្យដឹងថា ម្ចាស់តូបឈ្មោះគឹម ឈុនហួយ អាយុ៦០ឆ្នាំ រស់នៅក្នុងភូមិកើតហេតុខាងលើ ។ ពេលកន្លងទៅ រដ្ឋបាលស្រុកបានជូនដំណឹងដល់សាធារណៈជនថា មួយរយៈនេះស្ថានភាពបាក់ច្រាំងស្ទឹងក្នុងស្រុកកណ្តៀងមានការបាក់ច្រាំងគួរអោយព្រួយបារម្ភ ។
អាជ្ញាធរស្រុក និងឃុំបានបុកបង្គោល និងដាក់ការ៉ុងខ្សាច់តាមកន្លែងប្រឈមមួយចំនួន ក្នុងនោះ រដ្ឋបាលឃុំស្វាយលួង បានធ្វើលិខិតជូនដំណឹងបន្ទាន់មួយ កាលពីថ្ងៃទី២០ ខែតុលា ឆ្នាំ២០២២ ឱ្យលោកស្រី គឹម ឈុនហ៊ួយ ត្រូវរុះរើរឥវ៉ាន់ជាបន្ទាន់ចេញពីតូបលក់ ដោយសារច្រាំងស្ទឹងមានស្ថានភាពប្រះស្រុត តែគាត់មិនបានសហការ និងអនុវត្តតាមការណែនាំរបស់អាជ្ញាធរឃុំទេមកដល់ពេលនេះ ដោយគាត់ថា ទទួលខុសត្រូវដោយខ្លួនឯង។
លោកបន្តថា ហេតុការណ៍នេះពុំមានអ្នកបាត់បង់ជីវិត និងរងគ្រោះឡើយ ។ ចំពោះទំហំនៃការខូចខាតនោះមិនទាន់ដឹងនៅឡើយ ក៏ប៉ុន្តែសមត្ថកិច្ចក៏ដូចជាប្រជាពលរដ្ឋ កំពុងតែសស្រាក់សស្រាំនាំគ្នាអន្តរាគមន៍ជួយសង្គ្រោះ។
ចែករំលែកព័តមាននេះ