ស្របពេលដែលស្ថានភាពកំពុងតែមានភាពតានតឹងរវាងសហរដ្ឋអាមេរិក និងកូរ៉េខាងជើង ដែលកំពុងតែក្តៅគគុកមួយរយៈពេលកន្លងមកនេះដែលធ្វើឱ្យពិភពលោកមានការចាប់អារម្មណ៍ជាខ្លាំងនោះ នៅពេលនេះយោងតាមសារព័ត៌មាន Channel News Asia ដែលចេញផ្សាយនៅថ្ងៃទី១៩ ខែមេសា ឆ្នាំ២០១៧ នេះថា អនុប្រធានាធិបតីអាមេរិកលោក Mike Pence បានលើកឡើងថា សហរដ្ឋអាមេរិកនឹងរួមដៃជាមួយបណ្តាសម្ព័ន្ធមិត្តរបស់ខ្លួនក្នុងការដាក់សម្ពាធទៅលើកូរ៉េខាងជើងលើផ្នែកសេដ្ឋកិច្ច និងការទូតដោយមិនមានការលើកលែងឡើយ ហើយប្រសិនបើកូរ៉េខាងជើងហ៊ានតែវាយប្រហារមុននោះ សហរដ្ឋអាមេរិកនឹងធ្វើការវាយប្រហារកូរ៉េខាងជើងយ៉ាងចាស់ដៃវិញជាមិនខាន ។
ការលើកឡើងបែបនេះស្របពេលដែលលោកអនុប្រធានាធិបតីអាមេរិកកំពុងបំពេញទស្សនកិច្ចនៅប្រទេសជប៉ុននៅលើនាវាផ្ទុកយន្តហោះចម្បាំង USS Ronald Reagan ដែលកំពុងតែត្រួតពិនិត្យនៅកំពង់ផែ Yokosuka ប្រទេសជប៉ុនផងដែរ ។ លោកក៏បានថ្លែងទៀតថា សហរដ្ឋអាមេរិកនឹងប្តេជ្ញាការពារឱ្យបាននូវសេរីភាពនៃការធ្វើនាវាចរណ៍ និងអាកាសចរណ៍ តំបន់សមុទ្រចិនខាងត្បួងដែលជាទីកន្លែងដែលទីក្រុងប៉េកាំងមានភាពរកាំរកួសជាមួយប្រជាជាតិតំបន់អាស៊ីអាគ្នេយ៍ ។
ក្រោយពេលដែលលោកអនុប្រធានាធិបតីអាមេរិកលោក Mike Pence បញ្ចប់ដំណើរទស្សនកិច្ចនៅជប៉ុនរួចនោះ លោកនឹងបន្តដំណើរទស្សនកិច្ចទៅកាន់ប្រទេសឥណ្ឌូនេស៊ី និងអូស្ត្រាលី បន្តទៅទៀតដើម្បីបញ្ចប់ដំណើរទស្សនកិច្ចរយៈពេល១០ថ្ងៃរបស់លោកនៅតំបន់អាស៊ីផងដែរ ៕
ចែករំលែកព័តមាននេះ