ខេត្តកំពង់ឆ្នាំង ៖ ក្មេងប្រុសជំទង់ម្នាក់បានលង់ទឹកស្លា.ប់ នៅក្នុងគ្រោះថ្នាក់កាណូតបាឡាស្មាច់ចំនួន២គ្រឿងបុកគ្នា ខណៈធ្វើដំណើរបញ្ច្រាសទិសគ្នា បង្កឱ្យមានការភ្ញាក់ផ្អើលកាលពីវេលាម៉ោងប្រមាណ៦និង២០នាទីល្ងាច ថ្ងៃទី៣១ ខែតុលា ឆ្នាំ២០២២កន្លងទៅ នៅចំណុចខាងជើងបឹងរាំង ស្ថិតក្នុងភូមិកំពង់បឹង ឃុំកំពង់ហាវ ស្រុកកំពង់លែង ។
តាមរបាយការណ៍របស់អធិការដ្ឋាននគរបាលស្រុកកំពង់លែង បានឲ្យដឹងថា ក្មេងប្រុសដែលស្លា.ប់ឈ្មោះ ឆុំ តុលា អាយុ១៥ឆ្នាំ មានទីលំនៅក្នុងភូមិត្អួរលំ ឃុំកំពង់ហៅ ស្រុកកំពង់លែង ។ ហើយមុនពេលកើតហេតុ ក្មេងប្រុស ឆុំ តុលា បានបើកកាណូតបាឡាស្មាច់១គ្រឿងចេញពីមាត់កំពង់ នៅចំណុចផ្លូវបត់កែងជ្រុងរបងសាលា ស្រុកកំពង់លែងខាងលិច ឆ្ពោះទៅភូមិស្ទឹងសណ្ដែក ឃុំកំពង់ហៅ។ លុះពេលទៅដល់ចំណុចខាងលើ ក៏បានប៉ះទង្គិចជាមួយកាណូតបាឡាស្មាច់១គ្រឿងទៀត បើកបរដោយឈ្មោះ លឹម វាសនា អាយុ៣៩ឆ្នាំ មានទីលំនៅក្នុងភូមិក្លែងពណ៌ ឃុំត្រងិល ស្រុកកំពង់លែង ក្នុងដំណើរបញ្ច្រាសទិសគ្នា ។
គ្រោះថ្នាក់នេះ បណ្ដាលឱ្យក្មេងប្រុស ឆុំ តុលា រងរបួសក្បាល និងធ្លាក់ចូលទៅក្នុងទឹកលង់ស្លា.ប់តែម្ដង ។ ចំណែកឈ្មោះ លឹម វាសនា បានរត់គេចខ្លួន ក្រោយពេលកើតហេតុ ។
សមត្ថកិច្ចបានធ្វើការស្រាវជ្រាវ និងស្រង់ជនរងគ្រោះពីក្នុងទឹក ដើម្បីពិនិត្យ និងធ្វើកោសល្យវិច័យ ហើយប្រគល់ស.ពឲ្យទៅក្រុមគ្រួសារ ដើម្បីធ្វើបុណ្យតាមប្រពៃណី ។ ចំណែកកាណូតបាឡាស្មាច់ទាំង២គ្រឿង ត្រូវបានយកទៅរក្សាទុកជាបណ្តោះអាសន្ននៅអធិការដ្ឋាននគរបាលស្រុកកំពង់លែង ដើម្បីកសាងសំណុំរឿងតាមនីតិវិធី ៕
ចែករំលែកព័តមាននេះ