បាល់ទះជម្រើសជាតិកម្ពុជា គ្រោងប្រកួតមិត្តភាពជាមួយបារាំង
- ភ្នំពេញ
រាជធានីភ្នំពេញ ៖ បើតាមការបង្ហើបរបស់ឯកឧត្តមនាយឧត្ដមសេនីយ៍សន្តិបណ្ឌិត នេត សាវឿន
រាជធានីភ្នំពេញ ៖ បើតាមការបង្ហើបរបស់ឯកឧត្តមនាយឧត្ដមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និងជាប្រធានសហព័ន្ធកីឡាបាល់ទះកម្ពុជា ក្នុងឱកាសឯកឧត្តម
អញ្ជើញជាអធិបតីក្នុងពិធីបិទការប្រកួតបាល់ទះដណ្ដើមពានរង្វាន់ «សម្ដេចអគ្គមហាសេនាបតីតេជោ ហ៊ុន សែន ឆ្នាំ២០២២»នៅកីឡដ្ឋានព្រីនស៍ កាលពីល្ងាចថ្ងៃទី ៣០ ខែតុលា ឱ្យដឹងថា ក្រុមបាល់ទះជម្រើសជាតិកម្ពុជា គ្រោងនឹងធ្វើការប្រកួតមិត្តភាពអន្តរជាតិ ជាមួយក្រុមជម្រើសជាតិបារាំង ឬក្រុមបាល់ទះយុវជនបារាំងអាយុក្រោម ២១ឆ្នាំ នាពេលឆាប់ៗខាងមុខ បន្ទាប់ពីមានជំនួបរវាងប្រមុខថ្នាក់ដឹកនាំសហព័ន្ធ នៃប្រទេសទាំងពីរកាលពីពេលថ្មីៗនេះ។
ឯកឧត្តមនាយឧត្តមសេនីយ៍នេត សាវឿន មានប្រសាសន៍ថា នៅក្នុងជំនួបជាមួយលោកEric Tanguyប្រធានសហព័ន្ធកីឡាបាល់ទះបារាំងតាមប្រព័ន្ធZoom ភាគីបារាំងបានបង្ហាញនូវឆន្ទៈជួយលើកស្ទួយវិស័យកីឡាបាល់ទះកម្ពុជាតាមរយៈការផ្លាស់ប្ដូរប្រតិភូ ផ្លាស់ប្ដូរបច្ចេកទេសនិងឈានទៅដល់ការចុះអនុស្សរណៈនៃការយោគយល់គ្នា(MOU)នាពេលអនាគតទៀតផង ។
ប្រមុខសហព័ន្ធកីឡាបាល់ទះកម្ពុជាបន្ដថា ដើម្បីឆ្លើយតបទៅនឹងការត្រៀមខ្លួនរបស់កម្ពុជាក្នុងនាមម្ចាស់ផ្ទះស៊ីហ្គេមឆ្នាំ២០២៣ខាងមុខ លោកប្រធានសហព័ន្ធកីឡាបាល់ទះបារាំង បានទទួលយកសំណូមពររបស់កម្ពុជារៀបចំការប្រកួតលក្ខណៈមិត្តភាពអន្ដរជាតិរវាងក្រុមជម្រើសជាតិកម្ពុជា និងក្រុមជម្រើសជាតិ ឬក្រុមយុវជនអាយុក្រោម២១ឆ្នាំរបស់បារាំង ដើម្បីដកស្រង់បទពិសោធន៍ និងបច្ចេកទេសល្អៗ។
ឯកឧត្តមនាយឧត្តមសេនីយ៍សន្តិបណ្ឌិតបញ្ជាក់បន្ថែមថា ការប្រកួតលក្ខណៈអន្ដរជាតិនេះគ្រោង
ធ្វើឡើងក្រោមជម្រើស២គឺទី១ក្រុមជម្រើសជាតិបារាំង ឬក្រុមយុវជនអាយុក្រោម២១ឆ្នាំរបស់បារាំង
មកប្រកួតមិត្តភាពនៅកម្ពុជា និងទី២យើងបញ្ជូនក្រុមជម្រើសជាតិកម្ពុជាទៅប្រកួតនៅប្រទេសបារាំងតែម្ដង ។ បច្ចុប្បន្ន ក្រុមអគ្គលេខាធិការដ្ឋានសហព័ន្ធប្រទេសទាំងពីរ បាននិងកំពុងពិភាក្សារៀបចំការប្រកួតនេះ។
ជុំវិញការចងសម្ព័ន្ធភាពដ៏ល្អនិងឈានទៅរកការប្រកួតមិត្តភាពជាមួយក្រុមកំពុងឈរចំណាត់
ថ្នាក់លេខ៣លើពិភពលោក(បារាំង)នេះ លោកបណ្ឌិតអាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា បានបង្ហាញនូវសុទិដ្ឋិនិយមខ្ពស់ព្រោះស្ថិតក្នុងផែនការរបស់សហព័ន្ធក្នុងការជំរុញក្រុមជម្រើសជាតិកម្ពុជា ធ្វើការប្រកួតមិត្តភាពអន្ដរជាតិឲ្យបានច្រើន ។ ជាពិសេសក្រុមខ្លាំងៗជាងខ្លួន ដើម្បីវាស់ស្ទង់ក៏ដូចជាពង្រឹងសមត្ថភាពនិងបច្ចេកទេសឆ្ពោះទៅប្រជែងមេដាយមាសស៊ីហ្គេម ឆ្នាំ២០២៣ ៕
ចែករំលែកព័តមាននេះ