តូបលក់ចាប់ហួយមួយកន្លែងនៅក្នុងតំបន់សេដ្ឋកិច្ចពិសេសកំបូល ត្រូវបានអគ្គិភ័យលេបត្របាក់អស់ទាំងស្រុង បង្កឱ្យមានការភ្ញាក់ផ្អើលដល់ក្រុមកម្មករ កម្មការិនី ភ័យស្លន់ស្លោររត់ចែកជើងគ្នា
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា តូបលក់ចាប់ហួយមួយកន្លែងនៅក្នុងតំបន់សេដ្ឋកិច្ចពិសេសកំបូល ត្រូវបានអគ្គិភ័យលេបត្របាក់អស់ទាំងស្រុង បង្កឱ្យមានការភ្ញាក់ផ្អើលដល់ក្រុមកម្មករ កម្មការិនី ភ័យស្លន់ស្លោររត់ចែកជើងគ្នា និងរាយការណ៍សុំរថយន្ដពន្លត់អគ្គិភ័យនៃអង្គភាពរុករក និងសង្គ្រោះ៧១១ ចេញអន្តរាគមន៍ភ្លាមៗផងដែរ។ ហេតុការណ៍អគ្គិភ័យនេះ បានកើតឡើងកាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី៣០ ខែតុលា ឆ្នាំ២០២២ នៅក្នុងតំបន់សេដ្ឋកិច្ចពិសេស ស្ថិតក្នុងភូមិកំរៀង សង្កាត់កន្ទោក ខណ្ឌកំបូល។
សេចក្តីរាយការណ៍បន្តថា ម្ចាស់តូបរងគ្រោះខាងលើ មានឈ្មោះ ហែម ចំណាន អាយុ៤១ឆ្នាំ ចំណែកតូបលក់អីវ៉ាន់ចាប់ហួយដែលរងការខូចខាត មានទំហំ៥ម៉ែត្រគុណនឹង១០ម៉ែត្រ ប្រភេទដែកស័ង្កសី ដែលមានស្តុកអីវ៉ាន់ពេញក្នុងតូប ត្រូវបានអគ្គិភ័យលេបត្របាក់អស់ទាំងស្រុង រួមនឹងទ្រព្យសម្បត្តិផ្ទាល់ខ្លួនខ្លះទៀត សរុបការខូចខាតគិតជាទឹកប្រាក់ប្រមាណ ២៨០០0 ដុល្លារ។
បើតាមប្រភពពីម្ចាស់តូបរងគ្រោះបានប្រាប់សមត្ថកិច្ចឲ្យដឹងថា មុនកើតហេតុ គាត់កំពុងតែងូតទឹកនៅខាងក្រោយតូប ស្រាប់តែកូនរបស់គាត់លឺសម្លេងឆ្លងចរន្តអគ្គិសនី និងផ្ទុះបែកផ្កាភ្លើងទៀតផង ក៏ប្រញាប់ប្រញាល់ស្ទុះរត់ទៅប្រាប់គាត់។ ភ្លាមៗនោះ គាត់ក៏រត់មកមើលឃើញភ្លើងឆាបឆេះរាលដាលដល់អីវ៉ាន់ចាប់ហួយពេញក្នុងផ្ទះបាត់ទៅហើយ ទោះប្រឹងសង្គ្រោះទប់ស្កាត់យ៉ាងណា ក៏មិនឈ្នះដែរ និងបានត្រឹមតែនាំសមាជិកគ្រួសាររត់ចេញពីតូបយករួចអាយុជីវិតតែប៉ុណ្ណោះ។ ពេលភ្លាមៗនោះដែរ ក្រុមសន្តិសុខយាមក្នុងតំបន់សេដ្ឋកិច្ចពិសេស ក៏បានរាយការណ៍ប្រាប់សមត្ថកិច្ច ដើម្បីសុំរថយន្ដពន្លត់អគ្គិភ័យចេញអន្តរាគមន៍ជួយបាញ់ទឹកទប់ស្កាត់ផងដែរ។
គួរបញ្ជាក់ថា ក្នុងប្រតិបត្តិការជួយសង្គ្រោះខាងលើ សមត្ថកិច្ចបានប្រើប្រាស់រថយន្តពន្លត់អគ្គិភ័យអស់ចំនួន០៩គ្រឿង ក្នុងនោះរថយន្តមកពីអង្គភាពរុករក និងជួយសង្គ្រោះ៧១១ ចំនួន០៤គ្រឿង រថយន្តស្នងការនគរបាលរាជធានីភ្នំពេញ ចំនួន០៣គ្រឿង រថយន្តអង្គភាព៩១១ ចំនួន០១គ្រឿង និងរថយន្តជំនួយរបស់បុរីក្តីសង្ឃឹមចំនួន០១គ្រឿងផងដែរ។ លុះរហូតដល់វេលាម៉ោង១រំលងអធ្រាត្រទើបអណ្ដាតភ្លើងរលត់ទៅវិញ ចំណែកសម្ភារៈដែលខូចខាត គឺមានតូបលក់ចាប់ហួយសង់ពីដែក ប្រក់ស័ង្កសី ដែលមានទំហំ៥ម៉ែត្រគុណនឹង១០ម៉ែត្របានឆេះខូចខាតទាំងស្រុង តែមិនបណ្ដាលឲ្យមានមនុស្សរងរបួសឡើយ។ ចំពោះមូលហេតុនៃការឆាបឆេះ គឺបណ្តាលមកពីឆ្លងចរន្តអគ្គិសនី។
ចែករំលែកព័តមាននេះ