ខេត្តប៉ៃលិន ៖ ស្ត្រីម្នាក់ដែលគេស្គាល់ថា ជាប្រពន្ធមន្ត្រីគយបានបើករថយន្តទំនើបមួយគ្រឿងម៉ាកហាយឡែនឌ័រ ពណ៌ខ្មៅ នាំបក្ខពួកចូលទៅឈប់នៅក្បែរផ្សារសាមគ្គី រួចចុះពីលើរថយន្តដើរចូលទៅចាប់ក្របួច.កអាវស្ត្រីវ័យក្មេងម្នាក់
ខេត្តប៉ៃលិន ៖ ស្ត្រីម្នាក់ដែលគេស្គាល់ថា ជាប្រពន្ធមន្ត្រីគយបានបើករថយន្តទំនើបមួយគ្រឿងម៉ាកហាយឡែនឌ័រ ពណ៌ខ្មៅ នាំបក្ខពួកចូលទៅឈប់នៅក្បែរផ្សារសាមគ្គី រួចចុះពីលើរថយន្តដើរចូលទៅចាប់ក្របួច.កអាវស្ត្រីវ័យក្មេងម្នាក់ដែលគេស្គាល់ថា ជាប្រពន្ធចុងមន្ត្រីគយនោះរួចបានដកកាំភ្លើងខ្លីមិនស្គាល់ម៉ាក១ដើមបង្ហាញស្ត្រីរងគ្រោះ ហើយក៏ចាប់ផ្តើមវាយទៅលើនាង និងបង្ខំឲ្យចូលទៅក្នុងរថយន្ត បន្ទាប់មកបើករថយន្តចេញដំណើរទៅទិសដៅខាងកើតបាត់ស្រមោលតែម្តង ។ ហេតុការណ៍បង្កឱ្យមានការភ្ញាក់ផ្អើលនេះបានកើតឡើងកាលពីវេលាម៉ោង៤និង៣០នាទីរសៀល ថ្ងៃទី៨ ខែមេសា ឆ្នាំ២០១៧ ស្ថិតនៅចំណុចខាងជើងផ្សារសាមគ្គីហៅប៉ាហ៊ី ស្ថិតក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ។
បើតាមប្រភពព័ត៌មានពីប្រជាពលរដ្ឋ និងអាជីវករលក់ដូរបានឲ្យដឹងថា មុនពេលកើតហេតុគេឃើញមានស្ត្រី២នាក់បានបើកបររថយន្តទំនើបមួយគ្រឿង ពណ៌ខ្មៅ ម៉ាកហាយឡែនឌ័រ ពាក់ស្លាកលេខ ភ្នំពេញ 2AN-7683 បើកបរទៅឈប់ចតនៅខាងមុខសាលារៀនឯកជនមួយក្បែរផ្សារសាមគ្គីរួចនាំគ្នាចុះពីលើរថយន្តដើរចូលទៅក្នុងផ្សារត្រីដែលទើបនឹងសាងសង់ថ្មី ហើយក៏ចាប់ស្ត្រីវ័យក្មេងម្នាក់រួចយកកាំភ្លើងខ្លីមួយដើមបង្ហាញស្ត្រីរងគ្រោះរួចវាយបញ្ចូលទៅក្នុងរថយន្តធ្វើឲ្យអ្នកលក់ដូរ តាមដងផ្លូវ និងក្នុងផ្សារ មានការភ្ញាក់ផ្អើលយ៉ាងខ្លាំង តែពួកគេបានត្រឹមឈរមើលមិនហានចូលជួយអន្តរាគមន៍នោះទេ ។ បន្ទាប់មកស្ត្រីទាំង២នាក់នោះបានបើករថយន្តដឹកស្ត្រីរងគ្រោះចេញទៅទិសដៅខាងកើតបាត់ស្រមោល ។
ប្រភពដដែលបានបន្តទៀតថា ស្ត្រីវ័យក្មេងអាយុជាង២០ឆ្នាំដែលលក់ដូរសំលៀកបំពាក់នៅក្នុងផ្សារគេសង្ស័យថា ជាប្រពន្ធលួចលាក់របស់មន្ត្រីគយម្នាក់នៅស្រុកកំរៀង លុះប្រពន្ធដើមដឹងរឿងក៏នាំបក្ខពួកទៅវាយគម្រាមនឹងកាំភ្លើងខ្លីហើយអូស.កឡើងរថយន្តតែម្តង ។
ពាក់ព័ន្ធទៅនឹងបញ្ហានេះលោក លឹម វាសនា អធិការនគរបាលក្រុងប៉ៃលិនបានឱ្យដឹងថា ករណីវាយគ្នានៅក្នុងផ្សារសាមគ្គីនេះខាងលោកបានចុះទៅធ្វើការស្រាវជ្រាវរួចរាល់អស់ហើយ អត់ឃើញមានពាក់ព័ន្ធនឹងកាំភ្លើងខ្លីអ្វីនោះទេ ។ ចំណែកការវាយតប់គ្នានោះគឺជាការឈ្លោះទាស់ទែងរវាងបងប្អូនខ្លួនឯងរបស់ស្ត្រីលក់ដូរនៅក្នុងផ្សារប៉ុណ្ណោះហើយក៏ដោះលែងស្ត្រីរងគ្រោះឱ្យត្រឡប់ទៅវិញហើយ ៕
ចែករំលែកព័តមាននេះ