ប្រទេសថៃ ៖ យោងតាមក្រុមហ៊ុនប្រឹក្សាយោបល់អចលនទ្រព្យ Knight Frank Thailand ឲ្យដឹងថា តម្លៃខុនដូក្នុងតំបន់បន្ទាប់បន្សំនៅក្រុងបាងកកនឹងមានស្ថិរភាព ខណៈតម្លៃក្នុងតំបន់អាជីវកម្មកណ្តាល និងជាយក្រុងនឹងកើនឡើងបន្តិច ព្រោះតែការផ្គត់ផ្គង់នៅមានកម្រិត ។
លោកស្រី Potjaman Vorakitpokathorn នាយកផ្នែកទីផ្សារលំនៅឋានរបស់ក្រុមហ៊ុនខាងលើនិយាយថា តម្លៃខុនដូនៅតំបន់ជិតកណ្តាលក្រុងបាងកកនឹងនៅថេរ ប៉ុន្តែក្រុមហ៊ុនអចលនទ្រព្យត្រូវស្ទង់មតិមុនចេញគម្រោងក្នុងតំបន់ទាំងនោះ ។
ខណៈតម្លៃខុនដូក្នុងតំបន់អាជីវកម្មកណ្តាល និងជាយក្រុងនឹងកើនឡើង លោកស្រីនិយាយថា ទីផ្សារខុនដូលក់បន្តរបស់សង្កាត់អាជីវកម្មកណ្តាលនឹងប្រកួតប្រជែងជាមួយគម្រោងខុនដូថ្មីៗ ។
យោងតាមការស្រាវជ្រាវរបស់ Knight Frank Thailand ឲ្យដឹងថា ការផ្គត់ផ្គង់ខុនដូនៅបាងកកនាចុងឆ្នាំ២០១៦ គឺស្មើនឹង៤៣៥.៨០៥យូនីត ក្នុងនោះ៥២.១៩៥យូនីតត្រូវបានដាក់លក់ក្នុងឆ្នាំ២០១៦ បង្ហាញថា កើនឡើង១៣,៦% បើធៀបនឹងឆ្នាំ២០១៥ ។
ការដាក់លក់ថ្មីៗសុទ្ធតែនៅតំបន់បន្ទាប់បន្សំនៃក្រុងបាងកក ដោយ៧៦%នៃការលក់ខុនដូថ្មីៗក្នុងឆ្នាំ២០១៦ គឺនៅតំបន់ទាំងនោះ ខណៈ១៤%នៅតំបន់ជាយក្រុង ។
ខុនដូថ្មីៗក្នុងតំបន់អាជីវកម្មកណ្តាលបានកើនឡើង១០% ក្នុងឆ្នាំ២០១៦ ។ ភាគច្រើនក្នុងឆមាសទី២ឆ្នាំ២០១៦ គម្រោងថ្មីៗចំនួន៩ត្រូវបានដាក់លក់ក្នុងតំបន់នេះ ខណៈ១២គម្រោងនៅតំបន់ជាយក្រុង និង៥០គម្រោងនៅតំបន់បន្ទាប់បន្សំ ។
សម្រាប់តម្រូវការវិញ មានខុនដូចំនួន ៣១៥.៣៩៣ ត្រូវបានលក់ចេញក្នុងចំណោម ៤៣៥.៨០៥យូនីត ឬស្មើ៧២,៤% តិចជាងឆ្នាំមុនស្មើនឹង៧៥,៣% ។
មានខុនដូចំនួន២៦.៥៩៥យូនីតប៉ុណ្ណោះដែលត្រូវបានលក់ចេញក្នុងឆ្នាំ២០១៦ តិចជាងឆ្នាំ២០១៥ ដល់ទៅ៥៩%ឯណោះ ដែលលក់បាន៦៤.១៧០យូនីត ។
ជាមួយគ្នានេះ ក្រុមហ៊ុនអចលនទ្រព្យ ក៏កំពុងលក់ក្នុងតម្លៃពិសេសដើម្បីជំរុញការលក់របស់ពួកគេ រួមមាន ការលក់បញ្ចុះតម្លៃ និងបន្ទាបអត្រាការប្រាក់ជាដើម ។
យ៉ាងណាក្តី Knight Frank Thailand និយាយថា តម្លៃរបស់គម្រោងខុនដូថ្មីៗបានបន្តកើនឡើងនៅក្រុងបាងកក ប៉ុន្តែក្នុងល្បឿនខុសៗគ្នា ដោយយោងទៅតាមទីតាំង ។
តម្លៃលក់មធ្យមក្នុងតំបន់អាជីវកម្មកណ្តាល គឺ២២៩.១៨០បាតក្នុង១ម៉ែត្រការ៉េ កើនឡើង៥,៣% ខណៈតំបន់ជាយក្រុងកើនឡើង៤,៨% ស្មើ១៣៤.៨៤២បាតក្នុង១ម៉ែត្រការ៉េ ។
ចំណែកតម្លៃលក់មធ្យមរបស់ខុនដូក្នុងតំបន់បន្ទាប់បន្សំរបស់ក្រុងបាងកកបានកើនឡើង៣,៦% ស្មើ៧៦.០០២បាតក្នុង១ម៉ែត្រការ៉េ ៕
ចែករំលែកព័តមាននេះ