លោក Keisuke Honda បង្ហាញផែនការសំខាន់២ សម្រាប់ស៊ីហ្គេម ឆ្នាំ២០២៣
- ភ្នំពេញ
រាជធានីភ្នំពេញ ៖ លោក Keisuke Honda អ្នកចាត់ការទូទៅក្រុមបាល់ទាត់ជម្រើសជាតិកម្ពុជា
រាជធានីភ្នំពេញ ៖ លោក Keisuke Honda អ្នកចាត់ការទូទៅក្រុមបាល់ទាត់ជម្រើសជាតិកម្ពុជា
បានបង្ហាញពីផែនការចំនួន ២ ដើម្បីត្រៀមប្រកួតកីឡាស៊ីហ្គេមលើកទី៣២ ឆ្នាំ២០២៣ នៅកម្ពុជា។
លោកបានបង្ហាញផែនការដូច្នេះគឺនៅក្នុងជំនួបប្រជុំជាមួយអ្នកសារព័ត៌មាន កាលពីរសៀលថ្ងៃទី២៦ ខែតុលា ឆ្នាំ២០២២ នៅទីស្នាក់ការក្រុមហ៊ុនលីគបាល់ទាត់កម្ពុជា ដែលមានរូបលោកផ្ទាល់ និងនាយកប្រតិបត្តិរបស់ក្រុមហ៊ុន លោក Satoshi Saito។
ក្នុងឱកាសនៃជំនួបដ៏មានសារសំខាន់នេះមានការសន្ទនា ជជែកពិភាក្សាគ្នា និងការចោទសួរដេញដោលផ្ទាល់ជាមួយអ្នកចាត់ការទូទៅរូបនេះ។ ជាពិសេសទាក់ទងនឹងក្រុមជម្រើសជាតិកម្ពុជាអាយុក្រោម២៣ឆ្នាំ ដែលជាក្រុមត្រូវត្រៀមចូលរួមប្រកួតក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ នៅកម្ពុជា។
ជុំវិញព្រឹត្តិការណ៍ស៊ីហ្គេមលោក Honda ថ្លែងក្នុងសម្ដីដើមថា៖«វាពិតជាការប្រកួតដ៏សំខាន់សម្រាប់យើង ។ ពិតណាស់ យើងនឹងព្យាយាមដើម្បីទទួលបានលទ្ធផលល្អ តែដូចដែលអ្វីខ្ញុំបាននិយាយ យើងគួរតែយល់ថា ការប្រកួតប្រជែងនេះវាលំបាកយ៉ាងណា ប៉ុន្ដែពិតណាស់ អ្វីៗអាចកើតឡើង មិនថាទល់នឹងថៃ ឬវៀតណាម ។ យើងប្រហែលជាអាចឈ្នះ ទោះបីជាមានភាគរយតិច ដូច្នេះហើយទើបបានជាយើងព្យាយាមបង្កើនភាគរយ ទោះបីជា១ភាគរយ ក៏យើងត្រូវតែប្រឹង»។ អ្នកចាត់ការទូទៅសញ្ជាតិជប៉ុនរូបនេះ បានលើកឡើងពីផែនការទាំង២ថា៖«យើងមានផែនការ២ជាក់លាក់ ជាការត្រៀមសម្រាប់ស៊ីហ្គេម។
ទី១-គឺយើងនឹងរៀបចំជំរំហ្វឹកហាត់ក្នុង និងក្រៅប្រទេសមុនស៊ីហ្គេមឆ្នាំក្រោយ ។ យើងមានពេលដើម្បីអភិវឌ្ឍជាក្រុម ទាំងផ្នែកបច្ចេកទេស តាក់ទិច និងកាយសម្បទា ។ ទី២-គឺការប្រើប្រាស់កីឡាករលើសអាយុ ពិតណាស់ប្រទេសដទៃប្រើប្រាស់បែបនេះដែរ។ អ៊ីចឹងយើងនឹងជ្រើសរើសកីឡាករពិសេសៗដែលលើសអាយុទាំងនេះគឺជាអ្វីដែលយើងកំពុងធ្វើ»។
ប្រភេទកីឡាដ៏មានប្រជាប្រិយភាព (បាល់ទាត់)វិញ្ញាសាបុរស កំណត់លក្ខខណ្ឌអាយុនៃការចូល
រួមប្រកួតស៊ីហ្គេម លើកទី៣២ ឆ្នាំ២០២៣ ដែលកម្ពុជាទទួលធ្វើម្ចាស់ផ្ទះជាលើកដំបូងក្នុងប្រវត្តិ
សាស្ត្រ គឺនៅអាយុក្រោម២២ឆ្នាំ ៕
ចែករំលែកព័តមាននេះ