ខេត្តបាត់ដំបង ៖ យោងសេចក្ដីរាយការណ៍បឋមបានឲ្យដឹងថា ទឹកភ្លៀងបានជន់លិចលំនៅឋានប្រជាពលរដ្ឋ និង តាមដងផ្លូវនានាស្ទើរគ្រប់ទីកន្លែង ។ ជាពិសេស លិចលង់នៅក្នុងក្រុងបាត់ដំបង ដោយសារភ្លៀងបានបង្អោរស្ទើរពេញមួយរាត្រី…
ខេត្តបាត់ដំបង ៖ យោងសេចក្ដីរាយការណ៍បឋមបានឲ្យដឹងថា ទឹកភ្លៀងបានជន់លិចលំនៅឋានប្រជាពលរដ្ឋ និង តាមដងផ្លូវនានាស្ទើរគ្រប់ទីកន្លែង ។ ជាពិសេស លិចលង់នៅក្នុងក្រុងបាត់ដំបង ដោយសារភ្លៀងបានបង្អោរស្ទើរពេញមួយរាត្រី ចាប់ពីវេលាម៉ោង៨យប់ថ្ងៃទី២៦ តុលា រហូតដល់ត្រឹមម៉ោង៩ព្រឹកថ្ងៃទី២៧ តុលា នេះ ហើយមេឃនៅតែអ័ព្វអ៊ួរ និងមានភ្លៀងកំពុងធ្លាក់យ៉ាងជោគជាំនៅឡើយ ។
បើតាមសេចក្ដីរាយការណ៍នានាបានឲ្យដឹងថា តាមបណ្ដាស្រុកមួយចំនួន ភ្លៀងស្ទើរពេញមួយរាត្រីនេះ បានក្លាយជាទឹកជំនន់កំពុងវាយប្រហារចូលផ្ទះសំបែងពលរដ្ឋ និងលិចលង់តាមកំណាត់ផ្លូវនានាផងដែរ។ ដោយឡែក នៅឯក្រុងបាត់ដំបងវិញ ជំនន់ទឹកភ្លៀងនេះក៏កំពុងស្ថិតក្នុងស្ថានភាពធ្ងន់ធ្ងរដែរ ។ គេឃើញទឹកភ្លៀងបានលិចចូលក្នុងលំនៅឋាន សាលារៀន តាមដងផ្លូវនានានៅក្នុងក្រុង ។ ស្ថានភាពទឹកភ្លៀងបានហូរកាត់ដងផ្លូវ និងជន់លិចធ្វើឲ្យយានយន្តជួបការលំបាកក្នុងការធ្វើដំណើរ ខណៈផ្ទៃមេឃនៅតែគ្របដណ្ដប់ដោយភាពអ័ព្វអ៊ួរលាយឡំនឹងភ្លៀងធ្លាក់យ៉ាងជោកជាំគ្មានត្រាប្រណី ។
បើតាមការពិនិត្យជាក់ស្ដែង ជំនន់ទឹកភ្លៀងស្ទើរពេញមួយរាត្រីនេះ បានជន់លិចស្ទើរគ្រប់ទីកន្លែង។ ទីកន្លែង និង ដងវិថីខ្លះមិនធ្លាប់លិចលង់សោះ ពេលនេះកំពុងរងគ្រោះ តែរងគ្រោះក្នុងរយៈពេលខ្លីប៉ុណ្ណោះ ដោយសារប្រព័ន្ធលូររំដោះទឹកមានទំហុំតូច ។ ដោយឡែក នៅក្នុងសង្កាត់ចំការសំរោងនៃក្រុងបាត់ដំបងឯណោះវិញ អ្នកភូមិបាននិយាយថា តំបន់គាត់រស់នៅមិនធ្លាប់មានទឹកជំនន់ជន់លិចដូចពេលនេះទេ។ គាត់និយាយថា ពេលនេះទឹកភ្លៀង បានជន់លិចចូលដល់ក្នុងផ្ទះត្រិមជង្គង់។ តាមដងផ្លូវមួយចំនួនយានយន្តមិនអាចធ្វើដំណើរបានទេ រីឯព្រះភីរុណវិញគ្មានសញ្ញាថមថយសោះ ។
យ៉ាងណាក្ដី មន្ត្រីរដ្ឋបាលខេត្តបានប្រាប់ថា ពេលនេះអាកាសធាតុអ័ព្វអ៊ួរលាយឡំនឹងភ្លៀងធ្លាក់ផង បានគ្រប់ដណ្ដប់ស្ទើរគ្រប់ទិសទីទាំងអស់នៅក្នុងខេត្តបាត់ដំបង ។ នេះបើតាមព័ត៏មានដែលបានរាយការណ៍ពីតាមបណ្ដាស្រុកនានា ប៉ុន្តែហាក់មានការស្ងប់ស្ងាត់ផ្គររន្ទះ និងខ្យល់កន្ត្រាក់ ។
មន្ត្រីដដែលបានបញ្ជាក់ថា គិតម៉ោង៩ព្រឹកថ្ងៃទី២៧ តុលា នេះ ភ្លៀងនៅតែបន្តធ្លាក់់ តែពុំទាន់មានសេចក្ដីរាយការណ៏អំពីផលប៉ះពាល់ជាក់លាក់ ឬគ្រោះថ្នាក់មនុស្សដោយសារបាតុភូតធម្មជាតិនៅឡើយទេ ខណៈអាជ្ញាធរខេត្ត និង មន្ត្រីជំនាញបាននិងកំពុងទាក់ទងសាកសួរព័ត៌មានទៅកាន់មន្ត្រីតាមមូលដ្ឋានជាប្រចាំផងដែរ ។
ចែករំលែកព័តមាននេះ