Khmer United លើកពាន KW Cambodia League លើកដំបូង
- ភ្នំពេញ
រាជធានីភ្នំពេញ ៖ ការប្រកួតបាល់ទាត់ដណ្ដើមពានរង្វាន់ពាក់កណ្ដាលអាជីពដ៏ធំ KW Cambodia
រាជធានីភ្នំពេញ ៖ ការប្រកួតបាល់ទាត់ដណ្ដើមពានរង្វាន់ពាក់កណ្ដាលអាជីពដ៏ធំ KW Cambodia
រាជធានីភ្នំពេញ ៖ ការប្រកួតបាល់ទាត់ដណ្ដើមពានរង្វាន់ពាក់កណ្ដាលអាជីពដ៏ធំ KW Cambodia League រដូវកាលទី១០ ឆ្នាំ២០២២ បានបញ្ចប់ហើយ ដោយក្រុម Khmer United បានគ្រងតំណែងជើងឯកជាប្រវត្តិសាស្ដ្រ បន្ទាប់ពីយកឈ្នះក្រុម TN Kandal ដោយលទ្ធផល ១-០ ក្នុងវគ្គផ្ដាច់ព្រ័ត្រ កាលពីល្ងាចថ្ងៃទី២៣ ខែតុលា នៅទីលានវិទ្យាល័យបឹងត្របែក ។
ពិធីបិទការប្រកួតនេះ បានធ្វើឡើងក្រោមវត្តមានលោកឧកញ៉ាបណ្ឌិត គីម ហ៊ាង ប្រធាន KW Cambodia និងជាស្ថាបនិកពានរង្វាន់ KW Cambodia League ហើយលោកបានធ្វើការវាយតម្លៃខ្ពស់ ចំពោះការប្រកួតខាងលើ ដែលបញ្ចប់ដោយជោគជ័យ ។ ប៉ុន្ដែសម្រាប់រដូវកាលថ្មី លោកកំពុងធ្វើការថ្លឹងថ្លែងនូវជម្រើស ២ ថា ត្រូវរៀបចំពាននេះបន្ដ ឬត្រូវជំរុញក្រុមរបស់ខ្លួន គឺក្រុម Khmer United ទៅលេងក្របខណ្ឌលីគទី២?
ជំនួបកាត់សេចក្ដីដ៏តានតឹងខាងលើ Khmer United បានបាត់បង់សមាជិកម្នាក់ តាំងពីដើមវគ្គទី១ បន្ទាប់ពីត្រូវអាជ្ញាកណ្ដាលពិន័យកាតក្រហម ដែលធ្វើឲ្យក្រុម TN Kandal មានប្រៀប តែយ៉ាងណា អតីតក្រុមជើងឯកឆ្នាំ២០២០នេះ មិនអាចរកគ្រាប់បាល់បានឡើយ ។ ផ្ទុយទៅវិញ Khmer United បានរកគ្រាប់បាល់នាំមុខ១គ្រាប់មុន ដែលធ្វើសម្រេចដោយការទាត់បាល់ចេញពីជ្រុងយ៉ាងល្អរបស់កីឡាករ កែវ ជាតួ នៅនាទីទី១៩ ហើយក៏ជាគ្រាប់បាល់ជ័យជម្នះនៃការប្រកួតនេះដែរ ។
តាមរយៈជ័យជម្នះនេះ បានធ្វើឲ្យក្រុម Khmer United សម្រេចបំណងលើកពាន KW Cambodia League លើកដំបូង ក្នុងរយៈពេល១០ឆ្នាំ ដែលលោកឧកញ៉ាបណ្ឌិត គីម ហ៊ាង បានរៀបចំពាននេះឡើង ។ ពាននេះ បានបង្កើតដំបូងកាលពីឆ្នាំ២០១២ ដោយប្រើឈ្មោះថា Khmer Real Estate League រហូតដល់ឆ្នាំ២០១៩ ទើបប្ដូរមកជាពានរង្វាន់ KW Cambodia League រហូតមកទល់បច្ចុប្បន្ន (លើកលែងឆ្នាំ២០២១ ដែលពាននេះ ពុំបានរៀបចំ ដោយសារជំងឺរាតត្បាតកូវីដ-១៩) ។
លោកឧកញ៉ាបណ្ឌិត គីម ហ៊ាង បានបញ្ជាក់ថា រយៈពេល១០ឆ្នាំ ដែលលោកបានសន្យានឹងរៀបចំពាននេះ គឺបានបញ្ចប់ហើយ ពិសេសរដូវកាលទី១០ ដែលបញ្ចប់ដោយជោគជ័យ បន្ទាប់ពីមានក្រុមខ្លាំងៗចូលរួម១៨ក្រុម ធ្វើឲ្យការប្រកួតនីមួយៗ មានភាពស្វិតស្វាញ ។ ប៉ុន្ដែឆ្នាំក្រោយ លោកមិនទាន់ប្រាកដថា នឹងរៀបចំទៀត ឬក៏អត់នោះទេ ដ្បិតលោកកំពុងពិចារណាជម្រើស ២ ខាងលើ ដើម្បីទទួលបាននូវប្រយោជន៍រួម សម្រាប់វិស័យកីឡាបាល់ទាត់ជាតិ ។
ក្នុងនាមប្រធានក្លិប Khmer United ផងដែរ លោកបន្ដថា «ខ្ញុំនៅថ្លឹងថ្លែងនៅឡើយថាឆ្នាំ២០២២ រដូវកាលទី១០ ដែលយើងសន្យាធ្វើ ១០ឆ្នាំ គឺចប់ហើយ ។ អ៊ីចឹងឆ្នាំ២០២៣ យើងមានជម្រើស២ ទី១-យើងបង្កើតពានរដូវកាលទី១ បន្ដទៅមុខទៀត ហើយទី២ យើងរុញ Khmer United ចូលក្នុងលីគទី២? បើចូលក្នុងលីគទី២ យើងទៅតែឯង ប៉ុន្ដែបើយើងបន្ដធ្វើ KW Cambodia League គឺយើងមានកីឡាកររាប់រយ រាប់ពាន់នាក់ នឹងទទួលបានផលប្រយោជន៍ ។ ខ្ញុំកំពុងថ្លឹងថ្លែង ព្រោះអីការចំណាយយើង វាមិនខុសគ្នាទេ ។
បើយើងចូលលេងលីគទី២ ក៏មួយឆ្នាំការចំណាយប្រហែល១០ម៉ឺនដុល្លារដែរ ហើយបើយើងធ្វើពាន ឆ្នាំនេះក៏យើងចាយ ៧ម៉ឺនដុល្លារ ។ ឆ្នាំក្រោយបើយើងធ្វើពាន ការចំណាយអាចនឹងលើស៧ម៉ឺនអ៊ីចឹងមានន័យថា ចំណាយប្រហាក់ប្រហែលគ្នា តែអ្វីដែលបានប្រយោជន៍ច្រើនជាងគេ គឺយើងបានបង្កើតពាន បានប្រយោជន៍រួម» ។
យ៉ាងណាមិញ លោកឧកញ៉ាបណ្ឌិត គីម ហ៊ាងបានបង្ហើបថា ប្រសិនបើលោកបន្ដរៀបចំពានរង្វាន់ KW Cambodia League ទៀត លោកនឹងរៀបចំឲ្យកាន់តែធំ ហើយការចំណាយក៏កាន់តែច្រើនជាងមុនផងដែរ ។
សូមបញ្ជាក់ថា សម្រាប់ក្រុមជ័យលាភី នៃពានរង្វាន់ KW Cambodia League ឆ្នាំ២០២២ សម្រាប់ក្រុមជើងឯក Khmer United ទទួលបានពាន និងមេដាយមាស អមប្រាក់រង្វាន់ ៤០លានរៀល, ក្រុមលេខ២ TN កណ្ដាល ទទួលបានប្រាក់រង្វាន់ ២០លានរៀល ។ ចំណែកក្រុមលេខ៣ បានទៅក្រុម Riel Phnom Penh ក្រោយយកឈ្នះក្រុម Marlians FC ៣-២ បានទទួលប្រាក់រង្វាន់ ១០លានរៀល ខណៈក្រុមលេខ៤ Marlians FC ក៏ទទួលបានប្រាក់រង្វាន់លើកទឹកចិត្ត ៥លានរៀលផងដែរ ៕
ចែករំលែកព័តមាននេះ