រាជធានីភ្នំពេញ ៖ បុរសម្នាក់បានរង របួសជាទំងន់ដោយសារភ្លើងប្រចណ្ឌរបស់ស្ដ្រីជាប្រពន្ធ ហើយត្រូវប្រពន្ធកាប់នឹងកាំបិតផ្គាក់ជាច្រើនកាំបិត ។ ហេតុការណ៍នេះបាន កើតឡើងនៅភូមិក្បាលជ្រោយ ឃុំកំពង់ភ្នំ ស្រុកលើកដែក ខេត្ដកណ្ដាល កាលពីព្រឹក ថ្ងៃទី១២ កក្កដា ឆ្នាំ២០១០ ។បុរសរងគ្រោះខាងលើត្រូវបានក្រុម គ្រួសារដឹកតាមរថយន្ដមន្ទីរពេទ្យបង្អែកស្រុកនាំមកកាន់មន្ទីរពេទ្យមិត្ដភាពខ្មែរ-សូវៀត ដើម្បីព្យាបាលនាព្រឹកថ្ងៃកើតហេតុនោះ ដែរ ។
បុរសរូបនេះឈ្មោះបុន កុសល អាយុ ២៧ឆ្នាំ មានប្រពន្ធ និងកូន២នាក់ នៅភូមិ-ឃុំខាងលើ តែមួយរយៈថ្មីៗកន្លងមកនេះ ឈ្មោះបុន កុសល បានមកធ្វើការនៅ ភ្នំពេញ ។ លុះពេលត្រឡប់ទៅផ្ទះវិញម្ដងៗ លោកប្ដីតែងតែនិយាយទូរស័ព្ទសាសងទៅស្រីស្នេហ៍ឥតឈប់ឈរឡើយ ពិសេសគឺនៅ ព្រឹកថ្ងៃទី ១២ កក្កដា ឈ្មោះបុន កុសល ជា ប្ដីបានទូរស័ព្ទរកស្រីទាំងព្រឹកព្រលឹមដោយមិនរវល់អ្វីទាំងអស់ ក្រៅតែពីទូរស័ព្ទទៅរក ស្រីស្នេហ៍ ។ នេះបើតាមការអះអាងរបស់ ក្រុមគ្រួសារដែលនាំឈ្មោះបុន កុសល មក កាន់មន្ទីរពេទ្យមិត្ដភាពខ្មែរ- សូវៀត ។
បុរសឈ្មោះបុន កុសល រងរបួសក្បាល កដៃ កជើង និងរាងកាយទាំងមូល ស្ទើរសុសសាច់ដោយសារប្រពន្ធកាប់ចិញ្ច្រាំ។ តាមប្រភពព័ត៌មានបានបញ្ជាក់ថា មុន ពេលស្ដ្រីឈ្មោះឡាំង ស្រីមាស ជាប្រពន្ធដាច់ ចិត្ដកាប់បណ្ដាលឱ្យរងរបួសធ្ងន់នេះ គឺរូប នាងបាននិយាយល្អទៅលោកប្ដីជាញឹកញាប់ណាស់មកហើយថា ឱ្យឈប់ទូរស័ព្ទទៅរកស្រី ផ្សេង ប៉ុន្ដែលោកប្ដីពុំស្ដាប់ប្រពន្ធឡើយ គឺ ផ្គើនចិត្ដប្រពន្ធថែមទៀតផង ។ ហេតុដូច្នេះ ហើយទើបស្ដ្រីជាប្រពន្ធសំរេចចិត្ដកាប់លោកប្ដីព្រមានស្ទើរតែស្លាប់នាពេលនេះតែម្ដង ។
នៅក្នុងបន្ទប់សង្គ្រោះបន្ទាន់នៃមន្ទីរពេទ្យ មិត្ដភាពខ្មែរ-សូវៀតបុរសឈ្មោះបុន កុសល និយាយស្ដីអ្វីមិនរួចឡើយដោយសារស្ថានភាពរបួសធ្ងន់ធ្ងរខ្លាំងពេក ។រឿងរ៉ាវស្នេហាត្រីកោណដូចខាងលើនេះ កើតមានច្រើនណាស់នាពេលបច្ចុប្បន្ន។ ទោះ បីវិបត្ដិសេដ្ឋកិច្ចពិភពលោកធ្លាក់ចុះក៏ដោយ ក៏បុរសៗខ្មែរយើងខ្លះសុខចិត្ដបង្អត់ប្រពន្ធកូនផ្គាប់ផ្គុននារីក្មេង ហើយកើតជាទំនាស់ហិង្សា ញឹកញាប់បំផុត រហូតស្ដ្រីជាប្រពន្ធខ្លះកញ្ឆក់ ទូរស័ព្ទដៃពីប្ដីទៅបោកចោលជាញឹកញាប់ក៏មានដែរ ។ ប៉ុន្ដែអំពើហិង្សាដូចខាងលើ នេះអាចចាត់ទុកថា ទើបតែមានម្នាក់ ប៉ុណ្ណោះទេ ដែលស្ដ្រីជាប្រពន្ធទ្រាំលែងបាន ក៏ដាច់ចិត្ដលើកកាំបិតកាប់ចិញ្ច្រាំលោកប្ដីស្ទើរស្លាប់ស្ទើររស់បែបនេះ ៕
ចែករំលែកព័តមាននេះ