កីឡាវាយកូនបាល់កម្ពុជា សម្រេចគោលដៅធំមួយ មុនស៊ីហ្គេម ឆ្នាំ២០២៣
ប្រទេសបារ៉ែន ៖ ក្រុមកីឡាវាយកូនបាល់ជម្រើសជាតិកម្ពុជា បានសម្រេចគោលដៅដ៏ធំមួយ ក្នុងការ
ប្រទេសបារ៉ែន ៖ ក្រុមកីឡាវាយកូនបាល់ជម្រើសជាតិកម្ពុជា បានសម្រេចគោលដៅដ៏ធំមួយ ក្នុងការឡើងទៅប្រកួតកម្រិត៣ ប្រចាំតំបន់អាស៊ី/អូសេអានី (Asia/Oceania Group III) វិញ នៃព្រឹត្តិការណ៍វាយកូនបាល់ពិភពលោក Davis Cup 2022 បន្ទាប់ពីយកឈ្នះក្រុមជម្រើសជាតិសិង្ហបុរី ក្នុងវគ្គផ្ដាច់ព្រ័ត្រ នៅទីក្រុង Isa Town ប្រទេសបារ៉ែន ។ នេះគឺជាការសម្រេចជោគជ័យមួយដ៏ធំរបស់ក្រុមកីឡាវាយកូនបាល់កម្ពុជា ដែលបានត្រឡប់ទៅកាន់កៅអីកម្រិត៣ នៃព្រឹត្តិការណ៍ពិភពលោកនេះវិញ បន្ទាប់ពីខកខានអស់រយៈពេល ៦ឆ្នាំ ហើយក៏ជាការសម្រេចគោលដៅមួយដ៏ធំ ក្នុងផែនការរបស់សហព័ន្ធ សម្រាប់ដំណើរឆ្ពោះទៅព្រឹត្តិការណ៍ប្រវត្តិសាស្ដ្រស៊ីហ្គេម លើកទី៣២ ឆ្នាំ២០២៣ នៅកម្ពុជា នាពេលខាងមុខផងដែរ។
ការទទួលបានឱកាសឡើងទៅប្រកួតនៅកម្រិត៣ ប្រចាំតំបន់អាស៊ី/អូសេអានីនេះ ស្របពេលក្រុមកីឡាវាយកូនបាល់កម្ពុជា ដែលឈរលេខ១ ពូល A បានតតាំងជាមួយក្រុមជម្រើសជាតិសិង្ហបុរី ដែលឈរលេខ១ ពូល B ក្នុងវគ្គផ្ដាច់ព្រ័ត្រកម្រិត៤ យ៉ាងស្វិតស្វាញ ហើយកម្ពុជា បានយកឈ្នះ ២-១ ជាមួយលទ្ធផល៖
ការប្រកួតទី១ ឯកត្តជន : ជាការប្រកួតរវាងកីឡាករខ្មែរ-អាមេរិក Mathew Krusling បានចាញ់កីឡាករសិង្ហបុរី Shaeed Alam ដោយលទ្ធផល ២សិត១ ។ សិតទី១ Mathew Krusling បានចាញ់ពិន្ទុ ១-៦ ចូលសិតទី២ Mathew Krusling បានវាយបកយកឈ្នះវិញ ៦-២ តែសិតទី៣ កីឡាករសិង្ហបុរី បានត្រឡប់យកឈ្នះ ៤-៦។
ការប្រកួតទី២ ឯកត្តជន : កីឡាករជើងខ្លាំងកម្ពុជា ប៊ុន កេន្នី ធ្វើបានយ៉ាងល្អជូនកម្ពុជា ដោយយកឈ្នះ ២សិត០ លើកីឡាករសិង្ហបុរី Roy Hobbs ក្នុងពិន្ទុ ៦-៣ និង ៦-៣។
ការប្រកួតទី៣ វាយគូ : ការប្រកួតកាត់សេចក្ដី លើវិញ្ញាសាវាយគូ បន្ទាប់ពីក្រុមទាំងពីរ ឈ្នះ១ ចាញ់១ លើវិញ្ញាសាឯកត្តជននេះ ក្រុមកម្ពុជា គឺមានកីឡាករខ្មែរ-បារាំង ប៊ុន កេន្នី ចាប់ដៃគ្នាជាមួយ Mathew Krusling ដោយបានយកឈ្នះកីឡាករសិង្ហបុរី Shaheed Alam និង Ethan Kai Xin Lye ២សិត០ ទៀត ក្នុងពិន្ទុ ៧-៦ និង ៦-២។
ដូច្នេះ ជ័យជម្នះនេះ នាំឲ្យក្រុមកីឡាវាយកូនបាល់ជម្រើសជាតិកម្ពុជា បានឡើងទៅប្រកួតកម្រិត៣ (Group III) នៃព្រឹត្តិការណ៍ Davis Cup ប្រចាំតំបន់អាស៊ី/អូសេអានី នាឆ្នាំក្រោយ រួមជាមួយស្រីលង្ការ ដែលបានឈ្នះនៅក្នុង Events A ធ្វើនៅប្រទេសស្រីលង្ការ។
គួរឱ្យដឹងថា ការប្រកួតកីឡាវាយកូនបាល់កម្រិតពិភពលោក Davis Cup 2022 នេះ កម្ពុជាបានបញ្ជូនកីឡាករ ៥រូបចូលរួម គឺមានកីឡាករ ឡុង សំនៀង, ឃ្លាំង ពន្លក, ប៊ុន កេន្នី (ខ្មែរ-បារាំង), Tep Timothy និង Matthew David Krusling។ នេះជាជោគជ័យដ៏ប្រសើរសម្រាប់ក្រុមវាយកូនបាល់កម្ពុជា ដើម្បីជាទំនុកចិត្តសម្រាប់ត្រៀមលក្ខណៈធ្វើម្ចាស់ផ្ទះការប្រកួតកីឡាស៊ីហ្គេម លើកទី៣២ នាឆ្នាំ២០២៣ ខាងមុខ ៕
ចែករំលែកព័តមាននេះ