ម៉ូតូ៣គ្រឿងបុកគ្នាពេញទំហឹងឆាបឆេះ ធ្វើឱ្យម៉ូតូ១គ្រឿងឆាបឆេះយ៉ាងសន្ធោសន្ធៅ
- ភ្នំពេញ
ម៉ូតូហុងដាឃ្លីកមួយគ្រឿងជិះលឿនក៏ជ្រុលទៅបុកម៉ូតូស្គុបពីមួយគ្រឿង ដែលជិះឆ្លងកាត់ផ្លូវបំបែកជាបួន រួចក៏ជ្រុលបន្តទៅ
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ម៉ូតូហុងដាឃ្លីកមួយគ្រឿងជិះលឿនក៏ជ្រុលទៅបុកម៉ូតូស្គុបពីមួយគ្រឿង ដែលជិះឆ្លងកាត់ផ្លូវបំបែកជាបួន រួចក៏ជ្រុលបន្តទៅបុកម៉ូតូស្គុបពីមួយគ្រឿងទៀត ដែលជិះបញ្ច្រាសទិសគ្នា បណ្តាលដួលអូសឆាបឆេះយ៉ាងសន្ធោសន្ធៅ បង្កឱ្យមានការភ្ញាក់ផ្អើលកាលពីវេលាម៉ោង៩និង៤០នាទីយប់ ថ្ងៃទី២១ ខែតុលា ឆ្នាំ២០២២ នៅត្រង់ចំណុចខាងមុខកងរាជអាវុធហ្ថតខណ្ឌទួលគោក តាមបណ្ដោយផ្លូវ១៨២កែងនឹងផ្លូវ២៥៧ ស្ថិតក្នុងសង្កាត់ទឹកល្អក់ទី២ ខណ្ឌទួលគោក។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញស្ត្រីម្នាក់ជិះមួយគ្រឿងម៉ាកហុងដាស្គុបពី ពណ៌ស ពាក់ស្លាកលេខ ភ្នំពេញ1IL-2643 ធ្វើដំណើរតាមបណ្តោយផ្លូវ២៥៧ ទិសដៅពីជើងទៅត្បូង លុះមកដល់ចំណុចកើតហេតុ ម៉ូតូនោះក៏បានជិះឆ្លងកាត់ផ្លូវ១៨២ ខណៈពេលនោះក៏ស្រាប់តែមានម៉ូតូមួយគ្រឿងម៉ាកហុងដាឃ្លីក ពណ៌ស ពាក់ស្លាកលេខ ភ្នំពេញ1IH-1101 ជិះដោយបុរសម្នាក់តាមបណ្ដោយផ្លូវ១៨២ ទិសដៅពីកើតទៅលិច និងក្នុងល្បឿនយ៉ាងលឿន រួចក៏ជ្រុលទៅបុកម៉ូតូស្គុបពីពេញទំហឹង បណ្តាលឲ្យម៉ូតូស្គុបពីរងការវៀចកខាងមុខ និងម្ចាស់រងរបួសស្រាល។
ប្រភពដដែលបន្តថា រីឯម៉ូតូឃ្លីកវិញ ក៏បានជ្រុលទៅខាងមុខឆ្លងចូលចំណីផ្លូវម្ខាងទៀត រួចទៅបុកចំពីមុខម៉ូតូមួយគ្រឿងទៀតម៉ាកហុងដាស្គុបពី ពណ៌ស ពាក់ស្លាកលេខ ភ្នំពេញ2IU-8160 ដែលជិះដោយប្តីប្រពន្ធពីរនាក់តាមបណ្ដោយផ្លូវ១៨២ បញ្ច្រាសទិសគ្នាជាមួយម៉ូតូឃ្លីក បណ្តាលឲ្យខូចខាតផ្នែកខាងមុខយ៉ាងដំណំ និងធ្វើឱ្យប្តីប្រពន្ធទាំងពីរនាក់រងរបួសស្រាល ចំណែកឯម៉ូតូឃ្លីកវិញ បានដួលអូសជាច្រើនម៉ែត្រ បណ្ដាលឲ្យឆាបឆេះយ៉ាងសន្ធោសន្ធៅ និងធ្វើឱ្យម្ចាស់ម៉ូតូរងរបួសធ្ងន់ផងដែរ។
ប្រភពដដែលបន្តទៀតថា បន្ទាប់មកក៏មានប្រជាពលរដ្ឋបានយកបំពង់ពន្លត់អគ្គិភ័យមកបាញ់ពន្លត់ទាន់ពេលវេលា គ្រាន់តែបណ្តាលឲ្យម៉ូតូឆេះខូចខាតអស់មួយកំណាត់ខាងក្រោយតែប៉ុណ្ណោះ។ ក្រោយមកដោយម្ចាស់ម៉ូតូស្គុបពីដែលរងការខូចខាតវៀច.ក មិនចង់មានរឿងរ៉ាវវែងឆ្ងាយ ក៏បន្តដំណើរជិះចេញទៅបាត់។
ក្រោយពេលកើតហេតុ ក៏មានរថយន្តសាម៉ុយមន្ទីរពេទ្យព្រះកុសុមៈ បានមកដឹកយកជនរងគ្រោះដែលរងរបួសធ្ងន់ទៅសង្គ្រោះភ្លាមៗ។ រីឯម៉ូតូទាំងពីរគ្រឿង ត្រូវបានសមត្ថកិច្ចជំនាញធ្វើការវាស់វែងយកទៅរក្សាទុកនៅអធិការដ្ឋាននគរបាលខណ្ឌទួលគោក ដើម្បីរង់ចាំធ្វើការដោះស្រាយទៅតាមផ្លូវច្បាប់នៅពេលក្រោយជាបន្តទៀត៕
ចែករំលែកព័តមាននេះ