ខេត្តស្វាយរៀង ៖ លោកម៉ែន អេង អភិបាលរងខេត្តស្វាយរៀងដឹកនាំកម្លាំងសមត្ថកិច្ចចម្រុះចុះបង្ក្រាបទីតាំងបើកល្បែងស៊ីសងខុសច្បាប់០៣កន្លែង ជួបតែម្ចាស់ទីតាំងទំនងជាដឹងខ្លួនមុនឃើញតែអ្នកលេងអុក។ បើតាមសមត្ថកិច្ចនគបាលក្រុងបាវិតបានឲ្យដឹងថា នៅវេលាម៉ោង២និង១០នាទីរសៀលថ្ងៃទី២១ ខែតុលា ឆ្នាំ២០២២…
ខេត្តស្វាយរៀង ៖ លោកម៉ែន អេង អភិបាលរងខេត្តស្វាយរៀងដឹកនាំកម្លាំងសមត្ថកិច្ចចម្រុះចុះបង្ក្រាបទីតាំងបើកល្បែងស៊ីសងខុសច្បាប់០៣កន្លែង ជួបតែម្ចាស់ទីតាំងទំនងជាដឹងខ្លួនមុនឃើញតែអ្នកលេងអុក។
បើតាមសមត្ថកិច្ចនគបាលក្រុងបាវិតបានឲ្យដឹងថា នៅវេលាម៉ោង២និង១០នាទីរសៀលថ្ងៃទី២១ ខែតុលា ឆ្នាំ២០២២ លោក ម៉ែន អេង អភិបាលរងខេត្តស្វាយរៀងបានបន្តដឹកនាំកម្លាំងចម្រុះចុះធ្វើការត្រួតពិនិត្យទីតាំងបើកល្បែងស៊ីសងចំនួន០៣ទីតាំង ស្ថិតក្នុងសង្កាត់ព្រៃ អង្គុញ ក្រុងបាវិត ខេត្តស្វាយរៀង ដោយមានការចូលរួមពីលោកវណ្ណ សុមុន្នី និងលោក រ៉េត រក្សា អភិបាលរងក្រុងបាវិតកងកម្លាំងប្រដាប់អាវុ.ធ ទាំង៣ និងអ្នកដែលពាក់ព័ន្ធជាច្រើនរូបទៀត។
ប្រភពបន្តថា នៅក្នុងកិច្ចការចុះបង្ក្រាបនេះបានចុះដល់ទីតាំងចំនួន០៣គឺ ៖ – ទីតាំងទី១ នៅផ្ទះឈ្មោះប្លង់ សាលី ស្ថិតនៅភូមិគោកល្វៀង សង្កាត់ព្រៃ អង្គុញ ក្រុងបាវិត ក្រោយត្រួតពិនិត្យឃើញថា គ្មានសកម្មភាពលេងល្បែងស៊ីសងទេ ក្រុមការងារក៏បានណែនាំបន្ថែមដល់ម្ចាស់ទីតាំងខាងលើ កុំអោយមានលួចលាក់បើកលេងល្បែងឡើងវិញ ព្រោះ វាជា ល្បែងដែលខុសច្បាប់។
ទីតាំងទី២ នៅផ្ទះឈ្មោះកែវ សុខា ស្ថិតនៅភូមិគោកល្វៀង សង្កាត់ព្រៃអង្គុញពុំឃើញមានការលេងល្បែងនោះទេក្រុមការងារក៏បានណែនាំកុំអោយបើកលេងល្បែងបន្តទៀតហើយក៏បានធ្វើការណែនាំម្ចាស់ទីតាំង ប្រសិនបើនៅបើកទីតាំងអោយលេងល្បែងទៀតក្រុមការងារនឹងធ្វើទៅតាមច្បាប់។
ទីតាំងទី៣ គឺនៅផ្ទះឈ្មោះប្រាក់ យ៉េន ស្ថិតនៅភូមិព្រៃទប់ សង្កាត់ព្រៃអង្គុញ ក្រោយត្រួតពិនិត្យ ឃើញថា គ្មានសកម្មភាពលេងល្បែងស៊ីសងទេ ក្រុមការងារក៏បានណែនាំបន្ថែមដល់ម្ចាស់ទីតាំងខាងលើកុំអោយមានលួចលាក់បើកឲ្យគេលេងល្បែងឡើងវិញព្រោះវាជាល្បែងដែលខុសច្បាប់។
ប្រភពបន្តទៀតថា ក្រោយពីចុះត្រួតពិនិត្យរួច លោកម៉ែន អេង អភិបាលរងខេត្តស្វាយរៀង បានធ្វើការផ្តាំផ្ញើដល់អាជ្ញាធរក្រុងបាវិត និងកងកម្លាំងសមត្ថកិច្ចទាំង០៣ភេទ ត្រូវចូលរួមបង្កើនកិច្ចសហការ ក្នុងចំណោមអាជ្ញាធរ និងសមត្ថកិច្ចពាក់ព័ន្ធក្នុងការថែរក្សាពង្រឹងសន្តិភាព ស្ថិរភាព នយោបាយសន្តិសុខ សណ្ដាប់ធ្នាប់សាធារណៈ ផ្សព្វផ្សាយច្បាប់ចរាចរណ៍ការបង្ការទប់ស្កាត់ និងបង្ក្រាបបទល្មើស នានា ដូចជាការជួញដូរ ការប្រើប្រាស់គ្រឿងញៀ.ន ក្មេងទំនើង និង ការលេង ល្បែងស៊ីសងខុសច្បាប់ គ្រប់ប្រភេទ ដែលកើតមានឡើង ក្នុងដែនសមត្ថកិច្ចរបស់ខ្លួន តាមរយៈការបន្តជំរុញ និងបំផុសចលនា ឱ្យមានការចូលរួម អនុវត្តគោលនយោបាយ ភូមិ ឃុំ សង្កាត់ មានសុវត្ថិភាពឱ្យបានតឹងរ៉ឹង និងម៉ឺងម៉ាត់ជាទីបំផុត។
មហាជនបានអបអរសាទរចំពោះអាជ្ញាធរខេត្តដឹកនាំកម្លាំងសមត្ថកិច្ចមូលដ្ឋានចុះបង្ក្រាបទីតាំងបើកល្បែងស៊ីសងនៅតាមមូលដ្ឋាន ហើយសង្ឃឹមថា ម្ចាស់ទីតាំងទាំងបី ឈប់បើកលេងល្បែងទៅចុះ ដោយសារមុនការបង្ក្រាបទីតាំងទាំងបីខាងលើបើកលេងល្បែស៊ីសងរាល់ថ្ងៃ នៅពេលសមត្ថកិច្ចថ្នាក់ខេត្តចុះមកបង្ក្រាប ស្ងាត់ឈឹងទំនងម្ចាស់ទីតាំងដឹងខ្លួនមុន៕
ចែករំលែកព័តមាននេះ