ឆ្នាំ២០១៦បណ្តេញជនបរទេសចេញ២.៩៩៨នាក់មាន៥០សញ្ជាតិ និងឃាត់ខ្លួនជនល្មើស២.៦៥៦នាក់
រាជធានីភ្នំពេញ ៖ នៅឆ្នាំ២០១៦ អគ្គនាយកដ្ឋាននគរបាលអន្តោប្រវេសន៍បានឃាត់ខ្លួន និងបណ្តេញចេញជនបរទេសខុសច្បាប់សរុប២.៩៩៨នាក់ ស្រី៦៤៦នាក់
រាជធានីភ្នំពេញ ៖ នៅឆ្នាំ២០១៦ អគ្គនាយកដ្ឋាននគរបាលអន្តោប្រវេសន៍បានឃាត់ខ្លួន និងបណ្តេញចេញជនបរទេសខុសច្បាប់សរុប២.៩៩៨នាក់ ស្រី៦៤៦នាក់ មាន៥០សញ្ជាតិក្នុងនោះ អគ្គនាយកដ្ឋានអន្តោប្រវេសន៍ បានបណ្តេញចេញតាមប្រកាសរបស់ក្រសួងមហាផ្ទៃចំនួន២.២៩០នាក់ ស្រី៤៩៨នាក់ មាន៥០សញ្ជាតិ (ភាគច្រើនជនជាតិវៀតណាម១.៦៣២នាក់ ចិន៣៣០នាក់ តៃវ៉ាន់៤៦នាក់ ហ្វីលីពីន២៥នាក់ នីហ្សេរីយ៉ា២៤នាក់ ឥណ្ឌា២២នាក់ រុស្សី១៨នាក់ អង់គ្លេស១៧នាក់ និងអាមេរិក១៦នាក់។
នេះបើយោងតាមរបាយការណ៍អគ្គនាយកដ្ឋាននគរបាលអន្តោប្រវេសន៍ឲ្យដឹងក្នុងពិធីសន្និបាតបូកសរុបលទ្ធផលការងារប្រចាំឆ្នាំ២០១៦ និងលើកទិសដៅការងារឆ្នាំ២០១៧ ដែលរៀបចំនៅសាលប្រជុំទីស្តីការក្រសួងមហាផ្ទៃ នាព្រឹកថ្ងៃទី៣១ ខែមីនា ឆ្នាំ២០១៧ ក្រោមអធិបតីភាពសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។ របាយការណ៍បានឲ្យដឹងទៀតថា ជនបរទេសត្រូវបានបណ្តេញចេញភ្លាមៗតាមបណ្តាប៉ុស្តិ៍ច្រកទ្វារព្រំដែនអន្តរជាតិ នៃនាយកដ្ឋានច្រកទ្វារទី១ នាយកដ្ឋានច្រកទ្វារទី២ និងនាយកដ្ឋានជនបរទេសមិនមែនអន្តោប្រវេសន៍ និងបច្ចេកវិទ្យាចំនួន៣២១នាក់ ស្រី៣៩នាក់ មាន៤៦សញ្ជាតិ។
ហើយបណ្តេញចេញដោយការិយាល័យអន្តោប្រវេសន៍នៃស្នងការដ្ឋាននគរបាលខេត្តជាប់ព្រំដែនចំនួន៣៨៧នាក់ ស្រី១០៩នាក់មាន០៣សញ្ជាតិ ។ ជនបរទេសប្រព្រឹត្តបទល្មើសចំនួន៤០២ករណី ឃាត់ខ្លួន២.៦៥៦នាក់មាន៥០សញ្ជាតិ។ ជនបរទេសដែលបានប្រព្រឹត្តបទល្មើសកំពុងជាប់ឃុំនៅពន្ធនាគារនៅទូទាំងប្រទេសគិតត្រឹមខែធ្នូ ឆ្នាំ២០១៦ មានចំនួនសរុប ៩១៦នាក់ ស្រី២០៨នាក់ មាន៤២សញ្ជាតិ ក្នុងនោះជាប្រភេទ ជនដែលត្រូវចោទមានចំនួន១៨១នាក់ ស្រី២៤នាក់ ជនជាប់ចោទមានចំនួន៨៤នាក់ស្រី១២នាក់ ពិរុទ្ធជនមានចំនួន៤១៣នាក់ ស្រី១១២នាក់ ទណ្ឌិតមានចំនួន២៣៨នាក់ ស្រី៦០នាក់។
ជនបរទេសប្រព្រឹត្តបទល្មើសព្រហ្មទណ្ឌក្នុងនោះមាន ប្រើប្រាស់លិខិតឆ្លងដែនក្លែងក្លាយមាន៥លើកឃាត់ខ្លួន១៤នាក់ ក្លែងឯកសារសាធារណៈមាន១លើក ឃាត់ខ្លួន១នាក់ លួចរៀបការខុសច្បាប់១លើក ឃាត់ខ្លួន១នាក់ ជួញដូរគ្រឿងញៀន១៣លើក ឃាត់ខ្លួន១៨នាក់ ប្រើប្រាស់គ្រឿងញៀន១លើក ឃាត់ខ្លួន២នាក់ ប្រើអំពើហិង្សា៧លើក ឃាត់ខ្លួន១០នាក់ ជួញដូរមនុស្ស៦លើកឃាត់ខ្លួន១៩នាក់ បង្ខាំងមនុស្ស១លើកឃាត់ខ្លួន៣នាក់ លួចបន្លំ និងឆបោក៨លើកឃាត់ខ្លួន១២នាក់ អំពើអនាចារលើកុមារ១១លើក ឃាត់ខ្លួន១១នាក់ បង្កគ្រោះថ្នាក់ចរាចរណ៍១១លើក ឃាត់ខ្លួន១១នាក់ រៀបអាពាហ៍ពិពាហ៍ខុសច្បា់១លើក ឃាត់ខ្លួន០១នាក់ មានវិវាទក្រហមតាមចាប់ខ្លួនរបស់សមត្ថកិច្ចប្រទេសកូរ៉េខាងត្បូង១លើកឃាត់ខ្លួន៤នាក់ មានឈ្មោះក្នុងបញ្ជីហាមចូលកម្ពុជា១លើក ឃាត់ខ្លួន១នាក់។
លក់រូបអាសអាភាស០១លើក ឃាត់ខ្លួន០១នាក់ ជំរិតទារប្រាក់តាមប្រព័ន្ធបច្ចេកវិទ្យា(VOIP)៣លើក ឃាត់ខ្លួន១៤០នាក់ស្រី១៨នាក់ ដើររៃអង្គាសប្រាក់ខុសច្បាប់២លើក ឃាត់ខ្លួន៩នាក់ បើកល្បែងភ្នាល់តាមប្រព័ន្ធអិនធឺណែត៣លើក ឃាត់ខ្លួន៤៧នាក់,ប៉ះពាល់ការសម្ងាត់នៃការសន្ទនាតាមទូរស័ព្ទ២លើក ឃាត់ខ្លួន២នាក់,ប្រព្រឹត្តបទល្មើសសេដ្ឋកិច្ចនៅប្រទេសចិន១លើក ឃាត់ខ្លួន៨នាក់,បទល្មើសឧក្រិដ្ឋកម្មឆ្លងដែន១លើក ឃាត់ខ្លួន១នាក់ ។
របាយការណ៍ដដែលបានបញ្ជាក់ថា ក្នុងបញ្ជីស្ថិតិឆ្នាំ២០០២ មានជនបរទេសអន្តោប្រវេសន៍ចំនួន១៩.៣៤៧គ្រួសារ មនុស្សចំនួន៧០.០១២នាក់(ស្រី៣៤.៦៣៤នាក់)មាន២០សញ្ជាតិក្នុងចំណោមនោះជនជាតិវៀតណាមចំនួន១៩.១៥៩គ្រួសារ ស្មើ៦៩.៤១៣នាក់(ស្រី៣៤.០០០នាក់)ប្រមាណ៩៩.១៤%ដែលក្នុងនោះមាន អ្នកដាក់ពាក្យសុំប្រកាសទទួលស្គាល់ និងប័ណ្ណស្នាក់នៅអចិន្ត្រៃយ៍ចំនួន១១.១៦៥គ្រួសារ មនុស្ស៣៨.៨៩២នាក់(ស្រី១៨.៨១៥នាក់ បានធ្វើការប្រកាសទទួលស្គាល់ជាជនបរទេសអន្តោប្រវេសន៍ចំនួន២៣.២៩៥នាក់(ស្រី១១.៣៣៨នាក់ និងប័ណ្ណស្នាក់នៅអចិន្ត្រៃយ៍ចំនួន៥.៣៨៧នាក់(២.៤៧០នាក់) ។ អ្នកមិនទាន់បានមកដាក់ពាក្យសុំប្រកាសទទួលស្គាល់ និងប័ណ្ណស្នាក់នៅអចិន្ត្រៃយ៍ចំនួន៨.២៧២គ្រួសារ មនុស្ស៣១.១២០នាក់(ស្រី១៥.០៨២នាក់)មាន១១សញ្ជាតិ ក្នុងនោះជនជាតិវៀតណាមមានចំនួន៨.០៥៦គ្រួសារ ស្មើ៣០.៥៩១នាក់(ស្រី១៣.៥៨៥នាក់)។
ធ្វើការបូកសរុបលទ្ធផលជំហានដំបូងបានចំនួន២១.១២២គ្រួសារមនុស្សចំនួន៧៦.៦១៤នាក់(ស្រី៣៧.៥៥៤នាក់)មានចំនួន១៣សញ្ជាតិ ក្នុងនោះជនជាតិវៀតណាមមានចំនួន២១.០០០គ្រួសារស្មើ៧៦.៣៩៨នាក់(ស្រី៣៧.៤៩៦នាក់)ដែលកាន់ឯកសាររដ្ឋបាលកម្ពុជាមិនប្រក្រតី៕
ចែករំលែកព័តមាននេះ