ខេត្តបាត់ដំបង ៖ ភ្ញៀវទេសចរណ៍ជាតិ និងអន្តរជាតិរាប់រយនាក់ក្នុងមួយថ្ងៃៗ បាននាំគ្នាធ្វើដំណើរទៅទស្សនាហ្វូងសត្វប្រចៀវរាប់លានក្បាល ដែលហោះចេញពីក្នុងល្អាងភ្នំសំពៅ ស្ថិតក្នុង
ខេត្តបាត់ដំបង ៖ ភ្ញៀវទេសចរណ៍ជាតិ និងអន្តរជាតិរាប់រយនាក់ក្នុងមួយថ្ងៃៗ បាននាំគ្នាធ្វើដំណើរទៅទស្សនាហ្វូងសត្វប្រចៀវរាប់លានក្បាល ដែលហោះចេញពីក្នុងល្អាងភ្នំសំពៅ ស្ថិតក្នុងឃុំភ្នំសំពៅ ស្រុកបាណន់ មុនពេលសូរិយាហៀបអស្តង្គត ដែលពួកគេចាត់ទុកថា ជាទស្សនីយភាពដ៏ប្លែកភ្នែក និងកម្របានជួបប្រទះបំផុត។
អ្នកនៅខេត្តបាត់ដំបង ភាគច្រើនសុទ្ធតែធ្លាប់ដឹង និងធ្លាប់បានឃើញហ្វូងសត្វប្រចៀវទាំងនោះហោះចេញពីក្នុងល្អាងភ្នំសំពៅ ផ្ទុយពីប្រជាពលរដ្ឋនៅតាមបណ្ដាខេត្តនានា ក្នុងប្រទេសកម្ពុជា ដែលកម្របានឃើញក្បូនសត្វប្រចៀវហោះចេញស្វែងរកចំណីនាពេលល្ងាច។ ដោយឡែកសម្រាប់ភ្ញៀវទេសចរណ៍បរទេសវិញ រឹតតែកម្របានជួបប្រទះទៀត។ ប៉ុន្តែក្រោយពីបានទស្សនាហ្វូងសត្វប្រចៀវហោះចេញពីល្អាងភ្នំម្ដង ពួកគេបានបង្ហាញពីភាពអស្ចារ្យនៃហ្វូងសត្វប្រចៀវនេះ ហើយចាត់ទុកថា ជាសកម្មភាពប្លែកភ្នែក ល្អមើល និងធ្វើឲ្យចាប់អារម្មណ៏បំផុត។
មុនពេលសូរិយាហៀបអស្ដង្គតនៅចន្លោះម៉ោង៥និង៣០នាទីដល់ម៉ោង៦និង១៥នាទីល្ងាច គឺជាពេលវេលាដ៏ជាក់លាក់ ដែលហ្វូងសត្វប្រចៀវចាប់ផ្ដើមហោះចេញពីល្អាងភ្នំសំពៅ ក្រោមក្រសែភ្នែកមនុស្សរាប់រយនាក់ ដែលរង់ចាំគយគន់ និងផ្ដិតយករូបភាព ដែលមើលទៅហាក់ដូចជាសត្វចម្លែកម្យ៉ាងហោះចេញពីក្នុងរូងភ្នំដូច្នេះដែរ។ នៅលើដងផ្លូវជាប់នឹងជើងភ្នំសំពៅ ស្ថិតចំពីមុខល្អាងប្រចៀវនោះតែម្ដង គេឃើញអ្នកលក់ដូរនៅទីនោះ បានរៀបចំតុកៅអីតម្រៀបគ្នាជាជួរយ៉ាងមានរបៀប សម្រាប់ឲ្យភ្ញៀវទេសចរណ៍គ្រប់ជាតិសាសន៍អង្គុយទស្សនាហ្វូងសត្វប្រចៀវហោះចេញពីក្នុងល្អាងភ្នំជាក្បូនមួយ ។ អ្នកលក់ដូរបានបង្ហាញពីទឹកមុខរីករាយជាមួយនឹងមុខទំនិញរបស់ខ្លួនដែលភ្ញៀវស្រែកកុម្ម៉ង់ទិញមិនដាក់មាត់។
អ្នកស្រី ប៉ែន សូភី អាយុ៣៦ឆ្នាំ ដែលកំពុងមមាញឹកបំផុតក្នុងការលក់ដូរ បាននិយាយថា ការលក់ដូរនៅតំបន់ទេសចរណ៍ភ្នំសំពៅ គឺលក់ដាច់តែពេលល្ងាចរយៈជាង១ម៉ោងប៉ុណ្ណោះ ពេលដែលភ្ញៀវទេសចរណ៍ចាប់ផ្ដើមនាំគ្នាសម្រុកមកអង្គុយទស្សនាហ្វូងសត្វប្រចៀវហោះចេញពីល្អាង។ អ្នកស្រីបន្តថា មិនថាភ្ញៀវជាតិ ឬភ្ញៀវអន្តរជាតិនោះទេ តែងតែនាំគ្នាមកទស្សនាហ្វូងសត្វប្រចៀវនេះយ៉ាងពពាក់ពពូនបំផុត តែអ្នកស្រីបញ្ជាក់ថា ប៉ុន្មានខែចុងក្រោយនេះភ្ញៀវទេសចរណ៍បរទេសហាក់ធ្លាក់ចុះបន្តិច។
អ្នកនាំភ្ញៀវទេសចរណ៏៍បរទេសម្នាក់បាននិយាយថា ភ្ញៀវទេសចរណ៍ស្ទើរគ្រប់ជាតិសាសន៍ គឺចូលចិត្តមើលហ្វូងប្រចៀវនេះបំផុត។ គាត់និយាយថា ស្ទើររាល់ថ្ងៃមុនពេលដល់ម៉ោងហ្វូងសត្វប្រចៀវហោះចេញពីក្នុងល្អាងភ្នំ ពួកភ្ញៀវទេសចរណ៍តែងនាំគ្នាធ្វើដំណើរទៅកាន់ទីនោះដើម្បីទស្សនា និងថតសកម្មភាពហ្វូងប្រចៀវទាំងនោះ។ អ្នកដឹកភ្ញៀវរូបនេះ បានស្រង់សំដីភ្ញៀវរបស់ខ្លួនថា ពួកគេមិនធ្លាប់ឃើញសកម្មភាពហ្វូងសត្វប្រចៀវរាប់លានក្បាលហោះចេញពីភ្នំបែបនេះទេ។ ពួកគេចាត់ទុកសកម្មភាពហ្វូងប្រចៀវនេះថា ជាហ្វូងសត្វចម្លែក ដែលធ្វើឲ្យពួកគេគយគន់មិនចេះជិនណាយ ហើយហ្វូងសត្វទាំងនេះហោះយ៉ាងមានរបៀបទៀតផង។ ពួកភ្ញៀវបរទេសពិតជាចាប់អារម្មណ៍នឹងហ្វូងសត្វប្រចៀវនេះបំផុត។
លោក អ៊ុចអ៊ុំ ភីនីស្សារ៉ា ប្រធានមន្ទីរទេសចរណ៍ខេត្តបានថ្លែងប្រាប់នៅរសៀលថ្ងៃទី៣១ មីនា តាមទូរស័ព្ទថា ភ្ញៀវទេសចរណ៍បរទេសពិតជាកើនឡើងខ្លាំងមែន ក្នុងការធ្វើដំណើរទៅទស្សនាហ្វូងសត្វប្រចៀវចេញពីល្អាងភ្នំសំពៅ នាពេលថ្ងៃលិច។ លោកបាននិយាយថា ភ្ញៀវទេសចរណ៍ដែលទៅទស្សនាហ្វូងប្រចៀវបានកើនឡើងខ្លាំងក្នុងរយៈពេលមួយឆ្នាំកន្លងទៅនេះ បន្ទាប់ពីលោកបានធ្វើការផ្សព្វផ្សាយតាមបណ្ដាញសង្គម តាមវ៉េបសាយ និងតាមសមាគមទេសចរណ៍នានា។
លោក អ៊ុចអ៊ុំ ភីនីស្សារ៉ា បានបញ្ជាក់ដែរថា មូលហេតុដែលនាំឲ្យភ្ញៀវទេសចរណ៍ភ្ញាក់ផ្អើល និងចាប់អារម្មណ៍បំផុត អំពីសកម្មភាពហ្វូងប្រចៀវរាប់លានក្បាលនេះ គឺហ្វូងប្រចៀវទាំងនេះហាក់បានបង្ហាញពីលក្ខណៈពិសេស នៃការធ្វើដំណើរដែលលក្ខណៈជាក្រុមៗ មានមេកើយនាំហ្វូង ហើយថែមទាំងបានកំណត់នូវពេលវេលាយ៉ាងច្បាស់លាស់បំផុត ទាំងពេលចេញដំណើរ ទាំងពេលត្រឡប់ចូលក្នុងជម្រកវិញ។ នេះជាលក្ខណៈពិសេសដែលភ្ញៀវទេសចរណ៍ចាប់ចិត្តបំផុត រហូតនាំគ្នាទៅអង្គុយរង់ចាំមើលហ្វូងសត្វប្រចៀវចេញពីល្អាងភ្នំស្ទើររាល់ថ្ងៃ។ លោកថា ក្រៅពីទៅទស្សនាហ្វូងសត្វប្រចៀវហោះចេញពីភ្នំសំពៅ ភ្ញៀវទេសរណ៍ក៏មិនភ្លេចទៅជិះឡូរីលើផ្លូវដែកកម្សាន្តជាមួយនឹងទេសភាពស្រុកស្រែ និងដើរទស្សនាអគារបេតិកភ័ណ្ឌក្នុងក្រុងបាត់ដំបងផងដែរ៕
ចែករំលែកព័តមាននេះ