រាជធានីភ្នំពេញ ៖ គណៈមេធាវី នៃព្រះរាជាណាចក្រកម្ពុជា កាលពីព្រឹកថ្ងៃទី២០ ខែតុលា ឆ្នាំ២០២២ បានរៀបចំធ្វើសន្និសិទសារព័ត៌មាន ស្តីពីការចូលកាន់តំណែងប្រធានគណៈមេធាវី អាណត្តិទី១៤…
រាជធានីភ្នំពេញ ៖ គណៈមេធាវី នៃព្រះរាជាណាចក្រកម្ពុជា កាលពីព្រឹកថ្ងៃទី២០ ខែតុលា ឆ្នាំ២០២២ បានរៀបចំធ្វើសន្និសិទសារព័ត៌មាន ស្តីពីការចូលកាន់តំណែងប្រធានគណៈមេធាវី អាណត្តិទី១៤ និងទិសដៅផែនការការងារសម្រាប់អាណត្តិទី២ តទៅមុខទៀត ។
ដូចអង្គមហាសន្និបាត ប្រចាំឆ្នាំលើកទី២៧ កាលពីថ្ងៃ១៦ ខែតុលា ឆ្នាំ២០២២ រួចហើយ គឺលទ្ធផលសន្លឹកឆ្នោតបោះជូនលោក លី ច័ន្ទតុលា ស្ទើ១០០% ក្នុងចំណោមមេធាវីជាង ២,០០០នាក់ ឲ្យធ្វើជាប្រធានគណៈមេធាវីបន្តអាណត្តិថ្មីនោះ ។
ក្នុងពិធីប្រកាសឡើងកាន់តំណែងលោក លី ច័ន្ទតុលា បានសន្ទរកថា យ៉ាងដូច្នេះថា ជាបឋមខ្ញុំសូមថ្លែងអំណរគុណយ៉ាងជ្រាលជ្រៅ និងស្វាគមន៍យ៉ាងកក់ក្តៅ ចំពោះលោក លោកស្រីអ្នកសារព័ត៌មាន ដែលបានអញ្ជើញចូលរួមក្នុងសន្និសិទសារព័ត៌មានថ្ងៃនេះ ។ ថ្ងៃនេះគណៈ មេធាវី នៃព្រះរាជាណាចក្រកម្ពុជា ផ្តើមធ្វើសន្និសិទសារព័ត៌មាន ក្នុងគោលជម្រាបជូនអំពី ៖
ទី១. ប្រកាសចូលកាន់តំណែងរបស់ លោក លី ច័ន្ទតុលា ប្រធានគណៈមេធាវីអាណត្តិទី១៤ ដែលជាអាណត្តិទី២ ។
ទី២. ទិសដៅ និងផែនការការងារសម្រាប់ដឹកនាំគណៈមេធាវីអាណ ត្តិទី២ ។
ខ្ញុំត្រូវបានអង្គមហាសន្និបាតប្រចាំឆ្នាំលើកទី២៧ ដែលប្រព្រឹត្តទៅកាលពីថ្ងៃទី១៦ ខែតុលា ឆ្នាំ២០២២ បោះឆ្នោតជ្រើសតាំងជាប្រធានគណៈមេធាវីបន្តអាណត្តិទៀត គឺអាណត្តិទី១៤ (២០២២-២០២៤) ដោយទទួលបានសំឡេងគាំទ្រ ២,០១៦ សំឡេង ស្មើនិង៩៨,៥៨% ។
ដោយអនុលោមតាមប្រការ១៥ បទបញ្ជាផ្ទៃក្នុង នៃគណៈមេធាវី នៃព្រះរាជាណាចក្រកម្ពជា កាលពីថ្ងៃទី១៩ ខែតុលា ឆ្នាំ២០២២ ក្រុមប្រឹក្សាគណៈមេធាវីបានប្រជុំ និងទទួលដឹងឭ អំពីលទ្ធផល នៃការបោះឆ្នោត ហើយគណៈមេធាវីបានជូនដំណឹងពីលទ្ធផល នៃការបោះឆ្នោតនេះទៅអគ្គព្រះរាជអាជ្ញា នៃមហាអយ្យការសាលាឧទ្ធរណ៍ភ្នំពេញ រួចរាល់ផងដែរ ហើយថ្ងៃនេះ ជាថ្ងៃប្រកាសចូលកាន់តំណែងរបស់ខ្ញុំ ។
ដើម្បីលើកកម្ពស់ឧត្តមភាព និងកិត្យានុភាព នៃវិជ្ជាជីវៈមេធាវី សម្រាប់ឆ្នាំទី១ ក្នុងអាណត្តិទី២ របស់ខ្ញុំនេះ បានដាក់ចេញនូវទិសដៅការងារចំនួន ១៣ចំណុច ៖
១. បន្តអនុវត្តតាមគោលនយោបាយដឹកនាំ និងបេសកកម្មរបស់គណៈមេធាវី ដែលបានដាក់ចេញ ដើម្បីសម្រេចបានចក្ខុវិស័យ”រួមគ្នាដើម្បីឧត្តភាពនិងកិត្យានុភាពវិជ្ជាជីមេធាវី” ។
២. បន្តរួមចំណែកជាមួយនិងរាជរដ្ឋាភិបាលក្នុងកំណែទម្រង់ប្រព័ន្ធយុត្តធម៍និងតុលាការ ។
៣. បន្តពង្រឹងការអនុវត្តច្បាប់ស្តីពីលក្ខន្តិកមេធាវី ក្រមសីលធម៍ បទបញ្ជាផ្ទៃក្នុង និងសេចក្តីសម្រេចនានារបស់គណៈមេធាវីឲ្យមានប្រសិទ្ធិភាព ។
៤. បន្តពនិត្យនិងពិភាក្សាលើច្បាប់ស្តីពីលក្ខន្តិកមេធាវី ដើម្បីធ្វើវិសោធនកម្មឲ្យស្របតាមបច្ចុប្បន្នភាពនៃសង្គមនិងផលប្រយោជន៍វិជ្ជាជីវៈមេធាវី ។
៥. បន្តពិនិត្យនិងការពារមេធាវីឲ្យមានប្រសិទ្ធិភាពខ្ពស់ ។
៦. បន្តពិនិត្យតាមដាន និងមានវិធានការម៉ឺងម៉ាត់ចំពោះមេធាវីក្នុងការអនុវត្តវិជ្ជាជីវៈមេធាវី ដែលមិនគោរពច្បាប់នឹងវិធានការរបស់គណៈមេធាវី និងការសិក្សាឡើងវិញអំពីយន្តការដាក់ទណ្ឌកម្មវិន័យរបស់ក្រុមប្រឹក្សាគណៈមេធាវី ។
៧. បន្តកិច្ចពិភាក្សានិងដោះស្រាយបញ្ហានៃការអនុវត្តសិទ្ធិរបស់មេធាវី នៅដំណាក់កាលនគរបាលយុត្តិធម៍ ។
៨. បន្តចាត់វិធានការតាមផ្លូវច្បាប់ ចំពោះជនដែលប្រកបវិជ្ជាជីវៈមេធាវីខុសច្បាប់ ។
៩. បន្តពិនិត្យសម្រេច និងរៀបចំយន្តការ ដើម្បីអនុវត្តសេចក្តីសម្រេចស្តីពីគ្រឿងកិត្តិយស គណៈមេធាវីនៃព្រះរាជាណាចក្រកម្ពុជា សម្រាប់ផ្តល់ជូនមេធាវីនិង ឥស្សរជនដែលមានស្នាដៃលេចធ្លោនៅក្នុងការជួយដល់គណៈមេធាវី វិជ្ជាជីវៈមេធាវី និងកិច្ចការយុត្តិធម៍សង្គម ។
១០. បន្តពង្រឹងកិច្ចការពារក្តីជូនជនក្រីក្រ និងការងារប្រតិភូគណៈមេធាវីនៅទូទាំងប្រទេស និងអនុវត្តគោលនយោបាយលេខ០៩៨/សសគម/២១ ចុះថ្ងៃទី៥ ខែកុម្ភៈ ឆ្នាំ២០២១ ស្តីពីការពិគ្រោះយោបល់និងការពារជនក្រីក្រដោយឥតគិតកម្រៃ ។
១១. បន្តផ្សព្វផ្សាយនិងបញ្ជ្រាបការយល់ដឹងនិងការទទួលស្គាល់តួនាទីរបស់មេធាវី ក្នុងសង្គមទាំងលើឆាកជាតិនិងអន្តរជាតិ រួមទាំងការអនុវត្តគម្រោងមេធាវីចុះដល់មូលដ្ឋាន ។
១២. បន្តពង្រឹងគុណភាព សមត្ថភាព និងជំនាញដល់មេធាវី តាមរយៈការបណ្តុះបណ្តាលជាប្រចាំ សិក្ខាសាលា ទស្សនកិច្ចសិក្សា ទាំងក្នុងនិងក្រៅប្រទេស ដើម្បីឆ្លើយតបនិងការអភិវឌ្ឍសង្គម សេដ្ឋកិច្ច និងចរន្តនៃសកលភាវូបនីយកម្ម ។
១៣. បន្តពង្រឹងកិច្ចសហប្រតិបត្តការរវាងស្ថាប័នជាតិ និងអន្តរជាតិ ដើម្បីពង្រឹងការងារអនុវត្តច្បាប់ និងវិជ្ជាជីវៈមេធាវីឲ្យបានកាន់តែប្រសើឡើង ។ ទាំង១៣ចំណុចខាងលើនេះលោក ប្រធានគណៈមេធាវី លី ច័ន្ទតុលា បានធ្វើអត្ថាធិបាយយ៉ាងលម្អិត រួមទាំងផ្តល់ការអនុញ្ញាតិ ឲ្យអ្នកសារព័ត៌មានសួរសំណួរណាដែលមិនយល់នៅមានមន្ទិលសង្ស័យនោះទៀតផង ៕
ចែករំលែកព័តមាននេះ