រាជធានីភ្នំពេញ ៖ សេដ្ឋវិទូ និងក្រុមអ្នកជំនាញបានលើកឡើងស្រដៀងគ្នាថា ការដំឡើងប្រាក់ខែគ្រូបង្រៀន មន្ត្រីរាជការ និងការទម្លាក់តម្លៃទឹក ភ្លើង និងអត្រាការប្រាក់ក្នុងវិស័យហិរញ្ញវត្ថុ គឺជាការជួយលើកកម្ពស់ផលិតភាពសេដ្ឋកិច្ចជាតិ ។
លោក សាយ សូនី នាយកប្រតិបត្តិគ្រប់គ្រងទីផ្សារនៃស្ថាប័នមីក្រូហិរញ្ញវត្ថុប្រាសាក់ បានថ្លែងឲ្យដឹងតាមទូរស័ព្ទ កាលពីល្ងាចថ្ងៃទី២៩ មីនា កន្លងមកថា ការទម្លាក់តម្លៃទឹកភ្លើង និងអត្រាការប្រាក់ពី៣០%មកត្រឹម១៨% ដែលអនុវត្តចាប់ពីថ្ងៃទី១ មេសា ខាងមុខនេះ ជាវិធានការដ៏ល្អរបស់រាជរដ្ឋាភិបាល ដែលធ្វើឲ្យប្រជាពលរដ្ឋមានជីវភាពល្អប្រសើរ និងអាចសន្សំប្រាក់បានច្រើនជាងមុន ។
លោកថ្លែងថា ៖ « វិធានការនេះនឹងធ្វើឲ្យផលិតភាពសេដ្ឋកិច្ចកើនឡើងនៅកម្ពុជា ហើយប្រាសាក់នឹងបញ្ចុះអត្រាការប្រាក់តាមការប្រកាសរបស់រាជរដ្ឋាភិបាល ដែលនឹងចាប់អនុវត្តពីថ្ងៃទី១ មេសា ខាងមុខនេះតទៅ»។
ទីប្រឹក្សាសភាពាណិជ្ជកម្មកម្ពុជា លោក ហូ វណ្ឌី បានសម្តែងនូវការអបអរសាទរចំពោះការដាក់ចេញនូវវិធានការរបស់រាជរដ្ឋាភិបាល គឺចូលរួមយ៉ាងសំខាន់លើផ្នែកជាច្រើន ដូចជា កាត់បន្ថយការចំណាយមិនចាំបាច់ ដែលកន្លងមក ម្ចាស់អាជីវកម្មខ្លះសន្សំសំចៃអគ្គិសនី ដោយសារអគ្គិសនីថ្លៃ ប៉ុន្តែពេលតម្លៃអគ្គិសនីថោក ពួកគេអាចបើកភ្លើងពេលយប់ ធ្វើឲ្យទីក្រុងរបស់យើងកាន់តែមានពន្លឺស្រស់ស្អាត ។ ប្រជាពលរដ្ឋអាចសន្សំសំចៃប្រាក់បានច្រើន និងយកទៅចំណាយលើវិស័យដទៃទៀត ដែលធ្វើឲ្យចរន្តសាច់ប្រាក់កាន់តែសកម្ម និងជួយទាក់ទាញវិនិយោគិនមកវិនិយោគនៅកម្ពុជាកាន់តែច្រើនផងដែរ ។
លោក អិុន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី បានថ្លែងផងដែរថា ការរីកចម្រើនរបស់ប្រទេសជាតិ វារួមផ្សំពីការរីកចម្រើនជីវភាពរបស់ប្រជាពលរដ្ឋ។ ដូចនេះ ការបង្កើនប្រាក់ខែគ្រូបង្រៀន នឹងជួយឲ្យជីវភាពពួកគាត់កាន់តែល្អប្រសើរ និងមានទឹកចិត្តបង្រៀនអនាគតកូនខ្មែរជំនាន់ក្រោយ ។ ចំណែកការបញ្ចុះតម្លៃទឹក ភ្លើង ក៏ជាផលប្រយោជន៍ដែលប្រជាជននឹងទទួលបានទាំងអស់គ្នាផងដែរ ។
លោកបន្តថា ងាកមកមីក្រូហិរញ្ញវត្ថុឯណេះវិញ នៅពេលអត្រាការប្រាក់ទាប វានឹងជួយឲ្យមានផលិតកម្ម និងបង់ពន្ធជូនរាជរដ្ឋាភិបាលកាន់តែច្រើន ប៉ុន្តែស្ថាប័នមីក្រូហិរញ្ញវត្ថុត្រូវធ្វើការច្រើនជាងមុនដើម្បីសម្រេចគោលដៅរបស់ខ្លួន ។
សេដ្ឋវិទូកម្ពុជា លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ ថ្លែងថា សម្រាប់អ្នកប្រើប្រាស់អ្វីក៏ដោយឲ្យតែចុះថ្លៃ តែងតែសប្បាយចិត្ត ហើយអ្នកក្រីក្រ និងអ្នកមិនសូវមានលទ្ធភាពសប្បាយចិត្តជាងគេ ប៉ុន្តែការបញ្ចុះតម្លៃទឹកភ្លើង ត្រូវធ្វើយ៉ាងណាកុំឲ្យខាត បើខាតបង់ រាជរដ្ឋាភិបាលត្រូវឧបត្ថម្ភធន ។
ចំណែកការផ្គត់ផ្គង់អគ្គិសនី មិនមែនជាទីកន្លែងរកប្រាក់ចំណេញទេ។ ដូច្នេះ ធ្វើយ៉ាងណាឲ្យតែរួចខ្លួនបានហើយ ព្រោះនៅពេលអគ្គិសនីចុះថោក វានឹងជួយដល់ផលិតភាពសេដ្ឋកិច្ច ។
លោកបណ្ឌិតមានប្រសាសន៍ថា ៖ « នៅពេលគ្រូបង្រៀនមានប្រាក់ខែកើនឡើង ពួកគេនឹងខំបង្រៀន មានកម្លាំងចិត្តបង្រៀន ដែលអាចលើកកម្ពស់គុណភាពអប់រំនៅស្រុកយើង» ។ លោកបន្តថា ៖ « វិស័យអប់រំមានសារសំខាន់ខ្លាំងណាស់សម្រាប់សេដ្ឋកិច្ច និងប្រទេសរបស់យើង បើយុវជនមិនរៀន តើពួកគេធ្វើអ្វីនាពេលអនាគត ។ ហេតុនេះ ការអប់រំមានសារសំខាន់ណាស់ ព្រោះនៅកម្ពុជាមានយុវជនវ័យក្មេងច្រើន » ។
លោកបណ្ឌិត ម៉ី កល្យាណ បន្ថែមថា នៅពេលតម្លៃអគ្គិសនី ទឹក ការប្រាក់ថយចុះ និងប្រាក់ខែគ្រូបង្រៀនកើនឡើង នឹងធ្វើឲ្យជីវភាពគ្រួសាររបស់ប្រជាពលរដ្ឋល្អជាងមុន ទំនិញចុះថោក ហើយ ពួកគាត់មានលទ្ធភាពទិញអ្វីផ្សេងទៀតច្រើនជាងមុន ។ ពេលណាមានអ្នកទិញច្រើន ផលិតភាពនឹងកើនឡើង ហើយសេដ្ឋកិច្ចកម្ពុជា ជាស្វ័យប្រវត្តិនឹងល្អជាងមុន ៕
ចែករំលែកព័តមាននេះ