រាជធានីភ្នំពេញ ៖ ក្រសួងទេសចរណ៍បាននិងកំពុងរៀបចំសមាសភាពក្រុមប្រឹក្សាទីផ្សារ និងផ្សព្វផ្សាយវិស័យទេសចរណ៍ជាមួយឯកជន ដើម្បីជំរុញការលើកកម្ពស់ និងការផ្សព្វផ្សាយពីសក្តានុពលទេសចរណ៍នៅកម្ពុជា ។
រដ្ឋមន្ត្រីក្រសួងទេសចរណ៍ លោក ថោង ខុន បានថ្លែងឲ្យដឹងតាមទូរស័ព្ទកាលពីដើមសប្តាហ៍នេះថា កន្លងមក ការធ្វើទីផ្សារ និងផ្សព្វផ្សាយទេសចរណ៍នៅកម្ពុជា រាជរដ្ឋាភិបាលជាអ្នកចំណាយនាំមុខ ហើយផ្នែកឯកជនចូលរួមជាមួយរាជរដ្ឋាភិបាល ប៉ុន្តែការចូលរួមរបស់ផ្នែកឯកជនមានកម្រិតនៅឡើយ ។ ហេតុនេះ ពេលក្រសួងបង្កើតក្រុមប្រឹក្សាទីផ្សារ និងផ្សព្វផ្សាយទេសចរណ៍ រាជរដ្ឋាភិបាលនឹងដាក់វិស័យឯកជនចូលរួមជាមួយ ដែលក្រុមប្រឹក្សានេះ លោករំពឹងថា នឹងបញ្ចប់នៅខែមេសា ខាងមុខ ។
លោករដ្ឋមន្ត្រីថ្លែងថា ៖ « ពីមុនមកដោយសាររាជរដ្ឋាភិបាលមិនទាន់មានរចនាសម្ព័ន្ធក្រុមប្រឹក្សានេះច្បាស់លាស់ ទើបវិស័យឯកជនមិនទាន់បានចូលរួមទូលំទូលាយជាមួយក្រសួងនៅឡើយ ។ ដូច្នេះ បន្ទាប់ពីបង្កើតក្រុមប្រឹក្សានេះ វិស័យឯកជនអាចចូលរួមជាថវិកា និងសម្ភារផ្សព្វផ្សាយកាន់តែទូលំទូលាយថែមទៀត » ។
លោក ហូ វណ្ឌី អគ្គលេខាធិការសមាគមសម្ព័ន្ធទេសចរណ៍ជាតិកម្ពុជា ថ្លែងថា ការបង្កើតក្រុមប្រឹក្សានេះស្ថិតនៅកម្រិតណា និងតើស្ថិតក្រោមនាយកដ្ឋានណាមួយ ឬជាកម្រិតអនុក្រឹត ។ ប្រសិនជាធ្វើឡើងក្នុងកម្រិតអនុក្រឹត វាមានភាពទូលំទូលាយជាង ក្នុងការផ្សព្វផ្សាយពីសក្តានុពលទីផ្សារទេសចរណ៍កម្ពុជា ។
យ៉ាងណាក៏ដោយ លោកបន្តថា ៖ « ទោះជាបង្កើតឡើងក្នុងកម្រិតណាក្តី ក៏វាមានភាពវិជ្ជមានដែរ ព្រោះក្រុមប្រឹក្សានេះនឹងធ្វើឡើងដល់អ្នកធ្វើផ្ទាល់ និងអ្នកទទួលផ្តល់សេវាដោយផ្ទាល់ » ។
កម្ពុជាបានទទួលភ្ញៀវទេសចរចំនួន៥លាននាក់កាលពីឆ្នាំមុន កើនឡើង៥%ធៀបនឹងរយៈពេលដូចគ្នាកាលពីឆ្នាំ២០១៥ និងរំពឹងថា ឆ្នាំនេះកម្ពុជាទទួលបានភ្ញៀវទេសចរ៥,៤លាននាក់ ។
លោក ធួន ស៊ីណាន ប្រធានសហព័ន្ធទេសចរណ៍កម្ពុជា ថ្លែងថា អ្វីដែលក្រសួងបង្កើតនេះ វិស័យឯកជនរង់ចាំជាយូរមកហើយ ប៉ុន្តែសំខាន់តើរាជរដ្ឋាភិបាលបង្កើតឡើងក្នុងរូបភាពណា និងមានរចនាសម្ព័ន្ធបែបណា ហើយតើស្ថាប័ននេះមានភាពឯករាជ្យ ឬស្ថិតក្រោមស្ថាប័នណាមួយ ។ លោកបន្តថា យើងព្រួយបារម្ភពីការអនុវត្ត ព្រោះថា បើអនុវត្តដូចបច្ចុប្បន្ន ការបង្កើតក្រុមប្រឹក្សានេះគ្មានផលប្រយោជន៍ច្រើនទេ ប៉ុន្តែបើអនុវត្តការងារបានទូលំទូលាយជាងបច្ចុប្បន្ន ជាការល្អ ៕
ចែករំលែកព័តមាននេះ