រាជធានីភ្នំពេញ ៖ ស្របពេលដែលប្រទេសកម្ពុជា កំពុងអភិវឌ្ឍន៍ទៅលើសំណង់អគារ មានខុនដូ អាផាត់មែនសណ្ឋាគារ អគារការិយាល័យ និងសំណង់លំនៅឋានផងដែរនោះ វិនិយោគិនចិន បានសហការជាមួយវិនិយោគិនក្នុងស្រុកខ្មែរ នាំចូលនិងចែកចាយសម្ភារៈគ្រឿងសង្ហារឹមពីប្រទេសចិន មកកាន់ទីផ្សារប្រទេសកម្ពុជា សម្រាប់ផ្គត់ផ្គង់ដល់សំណង់អគារដែលកំពុងសាងសង់នៅពេលបច្ចុប្បន្ននេះ ។ កិច្ចសហការបើកការនាំចូលមកកាន់ប្រទេសកម្ពុជា បានប្រកាសជាផ្លូវការ កាលពីថ្ងៃទី ២៦ មីនា ២០១៧ និងបង្ហាញពីអគារតាំងបង្ហាញគ្រឿងសង្ហារឹមទាំងនោះផងដែរ ។
លោកអ៊ិត ដារ៉ា អ្នកគ្រប់គ្រងក្រុមហ៊ុន Phal Sovan Décor , Co.,Ltdនិងជាភាគីវិនិយោគកម្ពុជា បានឱ្យដឹងថា សម្ភារៈគ្រឿងសង្ហារឹមដែលនាំចូលមកកាន់ប្រទេសកម្ពុជានៅពេលនេះ មានប្រភពមកពីប្រទេសចិន ដែលមានសាខានៅលើពិភពលោកជាង១ពាន់សាខា ដូចជាអូស្ត្រាលី អាល្លឺម៉ង់ សឹង្ហបុរី និងបណ្ដាប្រទេសរីកចម្រើនជាច្រើនទៀត ។ លោកនិយាយថា៖« បច្ចុប្បន្ននេះ រោងចក្រផលិតសម្ភារៈគ្រឿងសង្ហារឹមម៉ាក Shangpin មាន៥កន្លែងនៅក្នុងប្រទេសចិន ដែលអាចផលិតសម្រាប់ចែកចាយទៅកាន់បណ្ដាប្រទេសជាច្រើនជុំវិញពិភពលោក » ។
លោកបន្តថា ការចូលមកកាន់ទីផ្សារប្រទេសកម្ពុជា នៃគ្រឿងសង្ហារឹម Shangpin វាឱកាសមួយជួយដល់បណ្ដាម្ចាស់សំណង់អគារនានា នៅក្នុងប្រទេសកម្ពុជា សម្រាប់តែងលំអរ ធ្វើឱ្យអគារ ខុនដូ អាផាត់មែន សណ្ឋាគារ ការិយាល័យ និងលំនៅឋានកាន់តែមានភាពទាក់ទាញ និងមានគុណភាព ។ លោកថា៖« ការមដកល់ទីផ្សារប្រទេសកម្ពុជា នៃគ្រឿងសង្ហារឹមនេះ វាមិនយឺតពេល ហើយក៏មិនឆាប់ពេកដែរ គឺវាទាន់សភាពការណ៍ល្អ ព្រោះពេលនេះ ដូចយើងឃើញស្រាប់ សំណង់អគារ និងតម្រូវការផ្ទះ នៅក្នុងប្រទេសកម្ពុជា មានច្រើន ដូចនេះនៅពេលដែលសាងសង់សំណង់អគារទាំងនោះ ចាំបាច់ណាស់គឺគ្រឿងសង្ហារឹមសម្រាប់បំពាក់នៅខាងក្នុង ដូចនេះហើយទើបយើងសម្រេចចិត្តនាំចូលមកផ្គត់ផ្គង់នៅពេលនេះតែម្ដង» ។
លោកបន្ថែមទៀតថា បើសិនជាទៅថ្ងៃអនាគតគ្រឿងសង្ហារឹម Shangpin មានការគាំទ្រពីសំណាក់ប្រជាពលរដ្ឋកម្ពុជានោះនៅឆ្នាំក្រោយៗ ក្រុមហ៊ុនទាំងពីរ នឹងពង្រីកកាន់តែធំបន្ថែមទៀត ដោយនឹងពង្រីកអគារតាំងបង្ហាញជាបន្តបន្ទាប់ តែពេលនេះសម្រាប់ម្ចាស់សំណង់នៅតាមបណ្ដាខេត្តក៏អាចមកមើលគ្រឿងសង្ហារឹមម៉ាក Shangpin នៅអគារតាំងបង្ហាញថ្មីទី១ នៅភ្នំពេញ បានផងដែរ ។
លោកMingkun Young ប្រធានផ្នែកទីផ្សារគ្រឿងសង្ហារឹមម៉ាក Shangpin របស់ប្រទេសចិន បានឱ្យដឹងថាបច្ចុប្បន្នគ្រឿងសង្ហារឹមម៉ាក Shangpin នេះមានវត្តមាននៅបណ្ដាប្រទេសជាច្រើន ហើយនៅក្នុងឆ្នាំ ២០១៧នេះដែរ ក្រុមហ៊ុន ផលិតគ្រឿងសង្ហារឹមម៉ាក Shangpin នឹងពង្រីកសាខាបន្ថែមទៀត នៅបណ្ដាប្រទេសនានា ។ លោកនិយាយថា ៖ « ពេលនេះក្រុមហ៊ុនរបស់យើងក៏បានចូលទៅក្នុងទីផ្សារហ៊ុនប្រទេសចិនផងដែរ ដូចនេះយើងនឹងពង្រីកសាខាក្រៅប្រទេសឱ្យបាន៣០បន្ថែមទៀត » ។
វិនិយោគិនទាំងពីរប្រទេសដែលសហការគ្នានាំចូលសម្ភារៈគ្រឿងសង្ហារឹមម៉ាក Shangpin មកកាន់កម្ពុជាសុទ្ធតែបង្ហាញពីជំនឿជាក់លើទីផ្សារកម្ពុជានៃគ្រឿងសង្ហារឹមសម្រាប់ផ្គត់ផ្គង់តាមអគារ និងលំនៅឋាន ថានឹងទទួលបានការគាំទ្រពីម្ចាស់សំណង់អគារ និងលំនៅឋាន នៅក្នុងប្រទេសផងដែរ ។
បើតាមលោកជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់បានបញ្ជាក់តម្រូវការលំនៅឋាននៅក្នុងប្រទេសកម្ពុជា ក្នុងមួយឆ្នាំៗ មានប្រមាណ ៥ម៉ឺនលំនៅឋាន នៅក្នុងរាជធានីភ្នំពេញក្រុង និងទីប្រជុំជន ។
ចែករំលែកព័តមាននេះ