ខេត្តមណ្ឌលគិរី ៖ ក្រុមអ្នកតាមដានបរិស្ថានបាននិយាយថា ចាប់តាំងពីមានការផ្លាស់ប្តូរមន្ទីរបរិស្ថានខេត្តមណ្ឌលគិរីថ្មី គេសង្កេតឃើញថា បទល្មើសព្រៃឈើធំៗបានកើតមាន ហើយយុទ្ឋនាការបង្ក្រាបបទល្មើសព្រៃឈើខុសច្បាប់ទាំងនោះ ភាគច្រើនគឺសុទ្ឋសឹងមន្ត្រីកងរាជអាវុធហត្ថលើផ្ទៃប្រទេសជាអ្នកបង្ក្រាប ខណៈមន្ត្រីក្នុងមូលដ្ឋានបានត្រឹមចូលរួមសហការ លំៗយករួចខ្លួនប៉ុណ្ណោះ ។
ប្រភពបានរាយការណ៏ថា ចាប់ពីចុងខែធ្នូ ២០១៦ មកទល់នឹងដើមខែមករា ២០១៧ បទល្មើសព្រៃឈើធំៗជិត១០ករណី ត្រូវបានគណៈកម្មធិការថ្នាក់ជាតិបង្ក្រាបនិងទប់ស្តាត់បទល្មើសព្រៃឈើ ដែលគណៈកម្មការនេះដឹកនាំដោយនាយឧត្តមសេនីយ៏ សៅ សុខា មេបញ្ជាការកងរាជអាវុធហត្ថលើផ្ទៃប្រទេសជាប្រធាន បានធ្វើសកម្មភាពបង្ក្រាប និងចាប់ឃាត់ខ្លួនជនពាក់ព័ន្ឋទាំងជនជាតិខ្មែរ និងជនជាតិវៀតណាមរាប់សិបនាក់ដាក់ពន្ឋនាគាខេត្ត។
ប្រភពថា គ្រាន់តែអំឡុងថ្ងៃទី២០ កុម្ភៈ ២០១៧ រហូតដល់ថ្ងៃទី២៨ មិនា ២០១៧ ជនជាតិវៀតណាមជាង១០នាក់ ត្រូវបានអាជ្ញាធរខេត្តចាប់បញ្ជូនដាក់គុក ព្រោះតែជាប់ពាក់ព័ន្ឋករណីចូលកាប់ឈើក្នុងទឹកដីខ្មែរខុសច្បាប់តាមព្រំដែន ។
ចំណែកក្រុមឈ្មួញដែលធ្លាប់រកស៊ីឈើក្នុងខេត្តមណ្ឌលគិរីបាននិយាយថា ការជួញដូរនិងដឹកជញ្ជូនឈើយកទៅលក់នៅព្រំដែនកម្ពុជា-វៀតណាម ពួកគេត្រូវរត់ការបើកផ្លូវជាមុនសិន ទើបអាចដឹកឈើទាំងនោះឆ្លងដែនបាន ។ ពួកគេថា មានមន្ត្រីជាច្រើនដែលតម្រូវឲ្យពួកគេ រត់ការបង់ផ្លូវរួមមាន៖ នគរបាលការពារព្រំដែន នគរបាលសេដ្ឋកិច្ចខេត្ត នគរបាលសេដ្ឋកិច្ចក្រសួង នគរបាលប៉ុស្តិ៍រដ្ឋបាល នគរបាលវរៈព្រំដែន មន្ត្រីអាវុធហត្ថ (អាវុធហត្ថលើផ្ទៃប្រទេស អាវុធហត្ថខេត្ត អាវុធហត្ថស្រុក អាវុធហត្ថស្នាក់ការសន្តិសុខ ) មន្ត្រីយោធា(យោធាខេត្តយោធាព្រំដែន យោធាវរៈ យោធាស៊ើបការណ៏ យោធាអគ្គ) មន្ត្រីបរិស្ថាន(មន្ត្រីបរិស្ថានខេត្ត មន្ត្រីបរិស្ថានឧទ្យានុរក្ស មន្ត្រីបរិស្ថានស្រុក មន្ត្រីបរិស្ថានដែនជម្រក) មន្ត្រីមេព្រៃ (មន្ត្រីមេព្រៃ ខណ្ឌរដ្ឋបាលព្រៃឈើ មន្ត្រីមេព្រៃផ្នែករដ្ឋបាលព្រៃឈើ មន្ត្រីមេព្រៃសង្កាត់រដ្ឋព្រៃឈើ )មន្ត្រីសាលាស្រុក សហគមន៏ គយ កាសែត-ទូរទស្សន៏ មួយចំនួន…។ ជាក់ស្តែងករណីថ្មីមួយទៀត សមត្ថកិច្ចកម្ពុជាចាប់ជនជាតិវៀតណាមចំនួន៤នាក់ ដែលបានចូលលួចកាប់ឈើខុសច្បាប់កាលពីថ្ងៃទី២៧ មីនា ២០១៧ នៅចំណុចអូរល្វេរ ស្ថិតក្នុងភូមិកោះម្យើល ឃុំណងឃីលឹក ស្រុកកោះញែកនោះ គឺសង្ស័យស្ថិតក្នុងចំណោមមនុស្ស៤០នាក់ ដែលត្រៀមកាប់ឈើក្នុងដែនជម្រកសត្វព្រៃស្រែពក សម្រាប់ដឹកចេញពេលបុណ្យចូលឆ្នាំខ្មែរ ។ ប្រភពព័ត៌មានមិនផ្លូវការមួយពីមន្ត្រីយោធាខេត្តមណ្ឌលគិរីម្នាក់បានប្រាប់ថា មន្ត្រីឧទ្យានុរក្សដែនជម្រកសត្វព្រៃស្រែពក បានចាប់ជនជាតិវៀតណាមចំនួន២៨នាក់ កាលពីថ្ងៃទី២៧ មីនា ២០១៧ នៅចំណុចអូរល្វេរ ភូមិកោះម្យើល ឃុំណងឃីលឹក ស្រុកកោះញ៉ែក ពីបទចូលលួចកាប់ឈើក្នុងទឹកដីនៃព្រៃកាពារខេត្តមណ្ឌលគិរី តែមន្ត្រីបរិស្ថានខេត្តបានអះអាងថា ចាប់បានតែតែ៤នាក់ប៉ុណ្ណោះ ។ នៅក្នុងគណនីបណ្តាញសង្គមផ្លូវការរបស់មន្ទីរបរិស្ថានខេត្តមណ្ឌលគិរី បានបង្ហោះរូបភាពនិងសរសេរថា បានចាប់ខ្លួនជនជាតិវៀតណាមចំនួន៤នាក់ ព្រមទាំងវត្ថុតាងមួយចំនួនធំ ក្នុងនោះក៏មានឈើអាររំលំរួចផងដែរ ប៉ុន្តែក្នុងករណីចាប់ជនជាតិវៀតណាមកាលពីថ្ងៃ២៧មីនានោះ មន្ត្រីយោធានៅឈរជើងក្នុងទឹកដីស្រុកកោះញ៉ែក បានរាយការណ៍ផ្ទាល់ទៅមេកើយរបស់គេថា មន្ត្រីបរិស្ថានដែលដឹកនាំដោយលោក កែវ សុភគ៌ ប្រធានមន្ទីរបរិស្ថាន បានចាប់ជនជាតិវៀតណាមបានចំនួន២៨នាក់ឯណោះ។
ដោយលើកទី១ពេលថ្ងៃត្រង់ចំនួន២០នាក់ ពេលរសៀលចំនួន៧នាក់ និងពេលល្ងាចចំនួនម្នាក់ ព្រមទាំងវត្ថុតាងមួយចំនួនទៀតផង។
ប្រភពដដែលប្រាប់ថា ជនជាតិវៀតណាមចំនួន២៨នាក់ខាងលើ ជាមនុស្សក្នុងចំណោមកម្មករជនជាតិវៀតណាមចំនួន៤០នាក់ ដែលគេបានបញ្ជូនចូលក្នុងភូមិសាស្ត្រព្រៃស្រុកកោះញ៉ែក ខេត្តមណ្ឌលគិរី និងព្រៃស្រុកលំផាត់ខេត្តរតនគិរី ដោយឆ្លងកាត់ក្រុមហ៊ុនមួយឈ្មោះយ៉ា ឡាយ ដើម្បីកាប់ឈើត្រៀមដឹកចេញទៅស្រុកយួន ក្នុងថ្ងៃបុណ្យចូលឆ្នាំប្រពៃណីខ្មែរ ដោយមានការរត់ការបើកផ្លូវក្នុងរង្វង់ទឹកប្រាក់រាប់សែនដុល្លាររបស់ឧកញ៉ាឈើម្នាក់ជូនដល់សមត្ថកិច្ចក្នុងតំបន់ ប៉ុន្តែសកម្មភាពនោះ ត្រូវបានបែកការណ៏ដល់ជំនាញ ទើបគម្រោងការលួចដឹកឈើក្នុងថ្ងៃចូលឆ្នាំថ្មីត្រូវបង្ក្រាប។ ពាក់ព័ន្ធនឹងករណីចាប់ជនជាតិវៀតណាមចូលក្នុងភូមិសាស្ត្រស្រុកកោះញ៉ែកនេះដែរ នាថ្ងៃ២៨ មីនា លោកអភិបាលស្រុកកោះញែក មើល សឿន ប្រាប់ថាលោកមិនបានដឹងរឿងអ្វីនោះទេ ព្រោះរវល់នៅប្រជុំឯភ្នំពេញ។
ទោះជាយ៉ាងណា កាលពីរសៀលថ្ងៃទី២៧មីនាដដែលនោះ លោកកែវ សុភគ៌ បានបដិសេធថា គ្មានការចាប់ខ្លួនជនជាតិវៀតណាមជាងម្ភៃនាក់នោះទេ គឺចាប់បានតែ០៤នាក់តែប៉ុណ្ណោះ ហើយកំពុងកសាងសំណុំរឿងតាមនិតិវិធី។ ក្នុងករណីដដែលមិនអាចស្វែងរកប្រភពការពិតណាមួយថា តើជំនាញចាប់បានជនជាតិវៀតណាម ៤នាក់ឬ២៨នាក់ដូចការខ្សឹបប្រាប់ពីមន្ត្រីយោធាបាននោះទេ ដោយសង្ស័យថាដូចជាមានអាថ៌កំបាំង។
គួរបញ្ជាក់ថា ជនជាតិវៀតណាមចំនួន៤នាក់ ត្រូវបានមន្ត្រីឧទ្យានុរក្សដែនជម្រកសត្វព្រៃស្រែពក ចាប់ឃាត់ខ្លួនកាលពីវេលាម៉ោង១១និង៥០នាទីព្រឹកថ្ងៃទី២៧ មីនា ឆ្នាំ២០១៧ ពីបទកាប់បំផ្លាញព្រៃឈើនៅក្នុងតំបន់ការពារធម្មជាតិ ស្ថិតក្នុងភូមិកោះម្យើល ឃុំណងឃីលឹក ស្រុកកោះញែក ។ វត្ថុតាងល្មើសដែលត្រូវសមត្ថកិច្ចបរិស្ថានដកហូតរួមមាន៖ រណាយន្ត ៣គ្រឿង, ម៉ូតូ៤គ្រឿង និងឈើប្រភេទលេខ១(សុក្រំនិងផ្ចឹក) ចំនួន២០ដើមត្រូវបានកាប់រំលំ។
សេចក្តីរាយការណ៏ថ្មីនៅព្រឹកថ្ងៃទី២៩ មិនា ២០១៧ ជនជាតិយួនចំនួន៨នាក់ផ្សេងទៀត ត្រូវបានកម្លាំងជំនាញចាប់ឃាត់ខ្លួននៅក្នុងតំបន់ដែនជម្រកសត្វព្រៃស្រែពក តាមបណ្តោយបន្ទាត់ព្រំដែនកម្ពុជាយួន នៅស្រុកកោះញែក ។ ចំណែកប្រភពក្រៅផ្លូវការជាច្រើនបាននិយាយថា ករណីជនជាតយួនចូលទឹកដីកម្ពុជាកាប់ឈើតាមចិត្តនេះ គឺមិនខុសពីពាក្យចាស់ពោលថា ខ្មោចស្រុកមិនឲ្យដៃ ខ្មោចព្រៃមិនហ៊ានចូល ។ បើតាមសម្តីខ្សឹបខ្សៀវគ្នាថា មានមន្ត្រីប្រដាប់អាវុធ និងមន្ត្រីជំនាញជាច្រើនរូបក្នុងស្រុកកោះញែក ជាអ្នកនាំជនជាតិយួនទាំងនោះ ចូលតាមច្រកខេត្តរតនគិរី ដើម្បីទៅកាប់ឈើនៅស្រុកកោះញែកខេត្តមណ្ឌលគិរី ។ ប្រភពនិយាយបន្តថា មិនត្រឹមនាំផ្លូវជនជាតិយួនទាំងនោះមកដីខ្មែរកាប់ឈើទេ ថែមទាំងផ្តល់ទីតាំងសម្រាប់ជនជាតិយួនទាំងនោះស្នាក់នៅក្នុងកន្លែងធ្វើការរបស់ខ្លួនថែមទាំងផង។ ប្រធានដែនជម្រកសត្វព្រៃស្រែពកលោក ឌិន ប៊ុនធឿន កោះសន្តិភាពមិនអាចសុំការបំភ្លឺបានទេ លើករណីមានជនជាតិយួនរាប់សិបនាក់ចូលកាប់ឈើក្នុងតំបន់ស្នូលនៃព្រៃដែនជម្រក ខណៈលោកក៏ត្រូវបានមហាជននិយាយថា បានឃុបឃិតឲ្យមានការកាប់បំផ្លាញព្រៃឈើ ដើម្បីផលប្រយោជន៏ផ្ទាល់ខ្លួន ។
សូមបញ្ជាក់ថា បីខែដើមឆ្នាំ២០១៧នេះ ជនជាតិយួនចំនួន២១នាក់ ត្រូវបានអាជ្ញាធរខេត្តមណ្ឌលគិរី ឃាត់ខ្លួនពាក់ព័ន្ឋនិងបទល្មើសព្រៃឈើ សត្វព្រៃ ស្របពេលមន្ត្រីជំនាញ និងមន្ត្រីពាក់ព័ន្ឋជាច្រើនក្នុងខេត្ត ត្រូវគេមើលឃើញថា មានភាពកំសោយក្នុងការទប់ស្តាត់ ឬ បង្ក្រាបក្រុមបទល្មើសទាំងនោះ ប៉ុន្តែមតិជាច្រើននិយាយថា បើពួកគេមិនបាន ទទួលផលប្រយោជន៏ កុំថាឡើយជនជាតិយួនចំនួន២១នាក់ សូម្បីម្នាក់ក៏មិនអាចចូលដីខ្មែរកាប់ឈើបានមួយដើមឡើយ ៕
ចែករំលែកព័តមាននេះ