រាជធានីភ្នំពេញ ៖ ប្រទេសចិនជាដៃគូពាណិជ្ជកម្មទីមួយ និងជាប្រភពទុនវិនិយោគផ្ទាល់ពីបរទេសធំបំផុតរបស់កម្ពុជា ។ គិតត្រឹមខែមិថុនា ឆ្នាំ២០១៦ ទុនវិនិយោគដោយផ្ទាល់ពីប្រទេសចិននៅកម្ពុជា មានប្រមាណជាង១.២០០លានដុល្លារអាមេរិក ។ នៅឆ្នាំ២០១៥ ទំហំពាណិជ្ជកម្មទ្វេភាគីសរុបមានជាង៤,៣ប៊ីលានដុល្លារអាមេរិក ហើយនៅត្រឹមឆមាសទី១ឆ្នាំ២០១៦ ទំហំពាណិជ្ជកម្មរវាងប្រទេសទាំងពីរមានចំនួន២.៣៤០លានដុល្លារអាមេរិក ពោលគឺកើនឡើង១០,២% បើប្រៀបធៀបនឹងដំណាក់កាលដូចគ្នាកាលពីឆ្នាំមុន ។ នេះបើតាមប្រសាសន៍របស់លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម លើកឡើងក្នុងជំនួបជាមួយលោក ហ៊ូ ហេភីង អភិបាលខេត្តសានស៊ី ប្រទេសចិន ស្តីពី «ការជំរុញពាណិជ្ជកម្ម និងវិនិយោគកម្ពុជា-សានស៊ី» កាលពីថ្ងៃទី២៧ មីនា ម្សិលមិញ ។
លោករដ្ឋមន្ត្រីគូសបញ្ជាក់ថា ៖ « ប្រទេសកម្ពុជា និងចិន មានជំនឿថា នឹងសម្រេចគោលដៅនៃការបង្កើនទំហំពាណិជ្ជកម្មទ្វេភាគីចំនួន៥ពាន់លានដុល្លារអាមេរិកនៅក្នុងឆ្នាំ២០១៧។ ដោយឡែក ទំនាក់ទំនងពាណិជ្ជកម្មរវាងកម្ពុជា និងខេត្តសានស៊ី ប្រទេសចិន ក៏កំពុងមានវឌ្ឍនភាពគួរឲ្យកត់សម្គាល់ផងដែរ ។ តាមរយៈដំណើរទស្សនកិច្ចរបស់ខ្ញុំ ទៅកាន់ក្រុងស៊ីអាន ខេត្តសានស៊ីនាដើមឆ្នាំនេះ បាននាំឲ្យមានការបង្កើតមជ្ឈមណ្ឌលពាណិជ្ជកម្មកម្ពុជានៅទីនោះ ដើម្បីពង្រឹងកិច្ចសហការ និងជំរុញទំនាក់ទំនងពាណិជ្ជកម្មទ្វេភាគី » ។
ដើម្បីសម្រេចបាននូវទំហំពាណិជ្ជកម្មខាងលើនេះ លោករដ្ឋមន្ត្រីក្រសួងពាណិជ្ជកម្មថ្លែងថា ក្រសួងពាណិជ្ជកម្មមានយុទ្ធសាស្ត្រជំរុញ និងសម្របសម្រួលការធ្វើពាណិជ្ជកម្ម និងវិនិយោគរវាងកម្ពុជា-ចិន ដូចតទៅ ៖
១-រៀបចំផែនការមេ និងជំនួបរវាងក្រសួងពាណិជ្ជកម្មនៃប្រទេសទាំងពីរដើម្បីបង្កើនកិច្ចសហប្រតិបត្តិការលើផ្នែកពាណិជ្ជកម្ម និងវិនិយោគ ។
២-បង្កើតក្រុមការងារដើម្បីដោះស្រាយរាល់បញ្ហានានាដែលពាណិជ្ជករ និងវិនិយោគិន ប្រទេសទាំងពីរជួបប្រទះ ។
៣-សម្របសម្រួលឲ្យមានជើងហោះហើរផ្ទាល់ពីទីក្រុងធំៗនៃប្រទេសចិន ដើម្បីទាក់ទាញកំណើនភ្ញៀវទេសចរ និងវិនិយោគិន ព្រមទាំងការផ្លាស់ប្តូរពាណិជ្ជកម្ម ។
៤-បង្កើតមជ្ឈមណ្ឌលពាណិជ្ជកម្ម និងព័ត៌មាននៅតាមបណ្តាខេត្តផ្សេងៗនៃប្រទេសចិនថែមទៀត ដើម្បីជំរុញសកម្មភាពពាណិជ្ជកម្មឲ្យកាន់តែទូលំទូលាយ ។
៥-បើកច្រកទីផ្សារនៅប្រទេសចិន និងប្រទេសដទៃទៀត ដែលកម្ពុជាទទួលបានប្រព័ន្ធអនុគ្រោះពន្ធគយសូន្យ និងមិនជាប់កូតា ដើម្បីជំរុញឲ្យការវិនិយោគនៅកម្ពុជាទទួលបានប្រាក់ចំណេញ និងជោគជ័យ ។
៦-រៀបចំវេទិកាជំរុញពាណិជ្ជកម្មឲ្យបានច្រើនថែមទៀតនៅតាមខេត្ត និងតំបន់នានាក្នុងប្រទេសកម្ពុជា និងសាធារណរដ្ឋប្រជាមានិតចិន ។
លោករដ្ឋមន្ត្រី ក៏បានលើកឡើងផងដែរអំពីបច្ចុប្បន្នភាពនៃទំនាក់ទំនងដ៏ល្អ ដែលត្រូវបានប្រមុខរដ្ឋាភិបាលនៃប្រទេសទាំងពីរជំរុញដល់កម្រិតកំពូលគឺ «កិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ និងចំណងមិត្តភាពដែកថែប» ។ ជាក់ស្តែង កាលពីពេលថ្មីៗកន្លងទៅនេះ ប្រទេសកម្ពុជា ដោយមានការគាំទ្រពេញទំហឹងពីរដ្ឋាភិបាលចិន និងកិច្ចសហការពីអង្គការពាណិជ្ជកម្មពិភពលោក WTO បានរៀបចំកិច្ចប្រជុំតុមូលចិន លើកទី៥ នៅលើទឹកដីអង្គរខេត្តសៀមរាប ក្រោមប្រធានបទ «ការអនុវត្តល្អបំផុតស្តីពីការចូលជាសមាជិកនៃប្រទេសអភិវឌ្ឍន៍តិចតួច (LDCs)»។
លើសពីនេះ នៅក្នុងក្របខ័ណ្ឌ «ខ្សែក្រវាត់មួយ-ផ្លូវមួយ» ដែលផ្តួចផ្តើមដោយលោក ស៊ី ជីងពីង ប្រធានាធិបតីនៃសាធារណរដ្ឋប្រជាមានិតចិន មន្ត្រីរាជការ សេដ្ឋវិទូ ធុរជន និងវិនិយោគិននៃប្រទេសទាំងពីរបានកំពុងធ្វើការជាមួយគដើម្បីកំណត់កាលានុវត្តភាពទាក់ទាញការវិនិយោគសាធារណៈ ដោយប្រើប្រាស់មូលនិធិ «វិថីសូត្រ» ដែលមានទឹកប្រាក់ប្រមាណ៤០ពាន់លានដុល្លារអាមេរិកសម្រាប់ធ្វើពិពិធកម្មវិស័យសេដ្ឋកិច្ច និងពាណិជ្ជកម្ម ព្រមទាំងហេដ្ឋារចនាសម្ព័ន្ធ តាមរយៈការតភ្ជាប់ខេត្តតាមមាត់សមុទ្ររបស់កម្ពុជា និងចិន ៕
ចែករំលែកព័តមាននេះ