ឃាត់ខ្លួនជនបរទេសម្នាក់ អនុវត្តដីកាបង្គាប់ឱ្យនាំខ្លួនរបស់តុលាការខេត្ត
ខេត្តសៀមរាប ៖ កម្លាំងការិយាល័យនគរបាលគ្រប់គ្រងជនបរទេស បានចុះអនុវត្តដីកាបង្គាប់ឱ្យនាំខ្លួនជនបរទេសម្នាក់ ពីបទឆបោក ដែលប្រព្រឹត្តទៅកាលពីអំឡុងខែសីហា
ខេត្តសៀមរាប ៖ កម្លាំងការិយាល័យនគរបាលគ្រប់គ្រងជនបរទេស បានចុះអនុវត្តដីកាបង្គាប់ឱ្យនាំខ្លួនជនបរទេសម្នាក់ ពីបទឆបោក ដែលប្រព្រឹត្តទៅកាលពីអំឡុងខែសីហា ឆ្នាំ២០១៥ ស្ថិតនៅភូមិមណ្ឌល៣ សង្កាត់ស្លក្រាម ក្រុង/ខេត្តសៀមរាប រួចនាំយកមកធ្វើការសួរនាំនៅការិយាល័យជំនាញ ដើម្បីរៀបចំសំណុំរឿងបញ្ជូនទៅតុលាការខេត្តចាត់ការបន្ត។ ហេតុការណ៍ឃាត់ខ្លួនជនបរទេសតាមដីកានោះ បានធ្វើឡើងនៅវេលាម៉ោង២និង០០នាទីរសៀល ថ្ងៃទី២៧ ខែមីនា ឆ្នាំ២០១៧ ស្ថិតនៅចំណុចមុខភោជនីយដ្ឋាន គូលែន២ ក្នុងភូមិមណ្ឌល១ សង្កាត់ស្វាយដង្គំ ក្រុង/ខេត្តសៀមរាប។
លោកវរសេនីយ៍ទោ វ៉ាន់ រិទ្ធ នាយការិយាល័យនគរបាលគ្រប់គ្រងជនបរទេសបានប្រាប់ឱ្យដឹងនៅរសៀលថ្ងៃទី២៨ ខែមីនា ឆ្នាំ២០១៧នេះថា ដោយយោងតាមបទបញ្ជារបស់លោកវរសេនីយ៍ឯក ជា គឹមសាន ស្នងការរងទទួលផែន អន្តោប្រវេសន៍ បានឱ្យកម្លាំងក្រោមឱវាទ ចុះអនុវត្តតាមដីកាបង្គាប់ឱ្យនាំខ្លួនរបស់លោក ឆែ វីរៈ ចៅក្រមស៊ើបសួរនៃសាលាដំបូងខេត្តសៀមរាប ឱ្យនាំខ្លួនជនបរទេសម្នាក់ឈ្មោះ Pike Andrew Howard John ភេទប្រុស អាយុ៥៧ឆ្នាំ ជនជាតិអូស្ត្រាលី សញ្ជាតិអូស្ត្រាលី មុខរបរមិនពិតប្រាកដ កាន់លិខិតឆ្លងដែនលេខN9143462 មកកាន់សាលាដំបូងខេត្តសៀមរាប ពាក់ពន្ធ័ករណី អំពើឆបោក ដែលប្រព្រឹត្តទៅកាលពីអំឡុងខែសីហា ឆ្នាំ២០១៥ ស្ថិតនៅភូមិមណ្ឌល៣ សង្កាត់ស្លក្រាម ក្រុង/ខេត្តសៀមរាប។
លោកបានបន្តថា ក្រោយពីបានធ្វើការសាកសួររួចមក ចៅក្រមស៊ើបសួរ ក៏បានចេញដីកាបញ្ជាឱ្យកម្លាំងសមត្ថកិច្ចយើងដឹកជនត្រូវចោទទៅកាន់ពន្ធនាគារខេត្ត ដើម្បីធ្វើការឃុំខ្លួន ជាបណ្តោះអាសន្នរង់ចាំថ្ងៃសវនការនាពេលខាងមុខជាបន្ត។ បច្ចុប្បន្នជនសង្ស័យត្រូវបានកម្លាំងជំនាញនាំយកទៅដាក់ពន្ធនាគារ តាមបទបញ្ជារបស់លោក ឆែ វីរៈ ចៅក្រមស៊ើបសួរ កាលពីល្ងាចថ្ងៃទី២៧ ខែមីនា ឆ្នាំ២០១៧ បណ្តោះអាសន្ន ដើម្បីរង់ចាំចាត់ការបន្តទៅតាមនីតិវិធី៕
ចែករំលែកព័តមាននេះ