ខេត្តកំពង់ឆ្នាំង៖ ទូកប្រភេទ «បាឡាស្មាច់» បានបុកបង្គោលព្រំដីឡូត៍ ដែលលិចទឹក បណ្ដាលឱ្យទូកកាណូតនោះ ក្រឡាប់ ហើយប្ដីជួយសង្គ្រោះបានតែប្រពន្ធ។ អនិច្ចាកូនតូច បានបាត់បង់ជីវិត។…
ខេត្តកំពង់ឆ្នាំង៖ ទូកប្រភេទ «បាឡាស្មាច់» បានបុកបង្គោលព្រំដីឡូត៍ ដែលលិចទឹក បណ្ដាលឱ្យទូកកាណូតនោះ ក្រឡាប់ ហើយប្ដីជួយសង្គ្រោះបានតែប្រពន្ធ។ អនិច្ចាកូនតូច បានបាត់បង់ជីវិត។ កុមារីរងគ្រោះ ឈ្មោះ ហេង ជូអ៊ីង អាយុ ១ខួបកន្លះ។
គ្រោះថ្នាក់ចរាចរណ៍ផ្លូវទឹក ក្រឡាប់ទូក ដោយសារបង្គោលព្រំដីឡូត៍នោះ បានកើតឡើង នៅចំណុចជិតបឹងបួនមុំ ស្ថិតនៅក្នុងភូមិឧទុម្ពរ ឃុំគ្រាំងដីមាស ស្រុករលាប្អៀរ ខេត្តកំពង់ឆ្នាំង។
អាជ្ញាធរឃុំក្រាំងដីមាស បានឱ្យដឹងថា នៅម៉ោងជាង ៩ព្រឹកថ្ងៃទី១៨ ខែតុលា ឆ្នាំ២០២២ នេះ មានគ្រួសារមួយ ដែលមានសមាជិក ៣នាក់ ឪពុក.ម្ដាយ និងកូនក្មេងអាយុ ១ខួបកន្លះ បានធ្វើដំណើរតាមមធ្យោបាយកាណូតបាឡាស្មាច់ ត្រឡប់ពីផ្សារទៅផ្ទះវិញ ស្រាប់តែទូកបាឡាស្មាច់បានទៅបុកជាមួយនឹងបង្គោលថ្មដីឡូត៍ ពេញទំហឹង នាំឱ្យក្រឡាប់ លិចទៅក្នុងទឹកទាំងអស់គ្នា។ ម្ដាយក្មេងស្រីរងគ្រោះ មិនចេះហែលទឹក តែឪពុក ចេះហែលទឹក បានទៅជួយសង្គ្រោះបានតែប្រពន្ធ។ រីឯកូនបានលិច ទៅក្នុងទឹក ទម្រាំរាវរកឃើញ កុមារីបានបាត់បង់ជីវិតបាត់ទៅហើយ។
បន្ទាប់ពីទទួលបានព័ត៌មាននេះ ភ្លាម លោក ប៉ា សុខុម ប្រធានក្រុមការងារចុះមូលដ្ឋាន ឃុំក្រាំងដីមាស និងលោក យី ភួន មេឃុំក្រាំងដីមាស ព្រមទាំងសហការី បានចុះទៅជួបក្រុមគ្រួសារស.ព និងសម្ដែងនៅការអាណិតអាសូរ សោកស្ដាយយ៉ាងក្រៃលែង ព្រមទាំងបាននាំយកជាគ្រឿងឧបភោគបរិភោគ និងថវិកាមួយចំនួន ដែលជាអំណោយរបស់ឯកឧត្តមបណ្ឌិតសភាចារ្យ អ៊ុក រ៉ាប៊ុន ចំនួន ៥០ម៉ឺនរៀល ជូនដល់គ្រួសារសព៕ ពៅ សុខហ៊ាន
ចែករំលែកព័តមាននេះ