ទីក្រុងស៊ីដនី ៖ អូស្ត្រាលី និងចិនត្រូវបានរំពឹងថា នឹងចុះកិច្ចព្រមព្រៀងទ្វេភាគីថ្មីមួយលើការនាំចេញសាច់គោ អគ្គិសនី និងសន្តិសុខ ក្នុងអំឡុងពេលលោកនាយករដ្ឋមន្ត្រីចិន Li Keqiang ធ្វើទស្សន
ទីក្រុងស៊ីដនី ៖ អូស្ត្រាលី និងចិនត្រូវបានរំពឹងថា នឹងចុះកិច្ចព្រមព្រៀងទ្វេភាគីថ្មីមួយលើការនាំចេញសាច់គោ អគ្គិសនី និងសន្តិសុខ ក្នុងអំឡុងពេលលោកនាយករដ្ឋមន្ត្រីចិន Li Keqiang ធ្វើទស្សនកិច្ចទៅកាន់ប្រទេសអូស្ត្រាលី ដែលបានចាប់ផ្តើមកាលពីថ្ងៃព្រហស្បតិ៍ សប្ដាហ៍មុន ។
ប្រទេសអូស្ត្រាលីចង់ទាញយកប្រ យោជន៍ពីការសម្រេចចិត្តរបស់ចិនកាលពីសប្តាហ៍មុនថា នឹងផ្អាកការនាំចូលសាច់ពីប្រេស៊ីល ជាប្រទេសនាំចេញសាច់គោ និងសាច់បក្សីធំជាងគេលើពិភពលោក ព្រោះតែមានរឿងអាស្រូវទាក់ទិននឹងសាច់ខូចគុណភាព ។
ប៉ុន្តែប្រទេសអូស្ត្រាលីប្រហែលជាគ្មានសមត្ថភាពបង្កើនការនាំចេញសាច់គោបានច្រើនទេ ព្រោះចំនួនសត្វគោរបស់ពួកគេមានតិច ។
យ៉ាងណាក្តី សាច់គោ គឺជាកសិផលមួយក្នុងចំណោមកសិផលដែលនាំចេញទៅកាន់ប្រទេសចិន ដែលមានតម្លៃសរុបច្រើនជាង៦,១៤ប៊ីលានដុល្លារកាលពីឆ្នាំមុន ។ ការនាំចេញសាច់គោនេះ ត្រូវបានជំរុញបន្ថែមដោយកិច្ចព្រមព្រៀងពាណិជ្ជកម្មសេរីរវាងចិន និងអូស្ត្រាលី ដែលបានចុះហត្ថលេខាកាលពីឆ្នាំ២០១៥ ធ្វើឲ្យចិនរក្សាជាដៃគូពាណិជ្ជកម្មធំជាងគេរបស់អូស្ត្រាលី ។
លោកនាយករដ្ឋមន្ត្រី Malcolm Turnbull ថ្លែងថា ៖ « ចិនត្រូវចិញ្ចឹមប្រជាជនរបស់ខ្លួន ប៉ុន្តែពួកគេមានដីដែលអាចធ្វើកសិកម្មបានតែ៧%ប៉ុណ្ណោះ ។ អូស្ត្រាលីកំពុងចាប់យកឱកាសផ្តល់អាហារដែលមានគុណភាពខ្ពស់ និងអនាម័យល្អដល់ប្រទេសចិន » ។
លោក Turnbull បន្តថា លោកនឹងព្យាយាមបន្តដំណើរការកិច្ចព្រមព្រៀងក្នុងតំបន់ផងដែរ ព្រោះប្រទេសអូស្ត្រាលីចង់កាត់បន្ថយផលប៉ះពាល់ដែលបង្កឡើងពីការដកខ្លួនរបស់សហរដ្ឋអាមេរិកចេញពីកិច្ចព្រមព្រៀង TPP កាលពីខែមករា ។
ខណៈលោក Trump គាំទ្រគោលនយោបាយអាមេរិកទី១ ប្រទេសចិនបានបង្ហាញពីគោលបំណងដើរតួនាទីកាន់តែធំឡើងនៅលើឆាកអន្តរជាតិ ជាពិសេស លើកតម្កើងការធ្វើពាណិជ្ជកម្មសេរី ។
មិនយូរប៉ុន្មាន ក្រសួងការបរទេសចិនលើកឡើងថា លោក Li បានប្រាប់លោក Turnbull ថា ចិននឹងបន្តបើកទូលាយ និងសហការជាមួយអូស្ត្រាលី ដើម្បីផ្តល់សញ្ញាវិជ្ជមានពីការលើកតម្កើងការធ្វើពាណិជ្ជកម្មសេរី និងការពារប្រព័ន្ធធ្វើពាណិជ្ជកម្មពិភពលោកក្នុងពេលបច្ចុប្បន្ន ។
លោក Li ត្រូវបានគិតថា នឹងជំរុញអូស្ត្រាលីឲ្យចូលរួមផ្តួចផ្តើមគំនិតកសាងវិថីសូត្ររបស់ប្រទេសចិន ប៉ុន្តែកិច្ចព្រមព្រៀងនេះប្រហែលជាមិនកើតឡើងឡើយក្នុងអំឡុងពេលទស្សនកិច្ចនេះ ។
បញ្ហាសន្តិសុខក្នុងតំបន់ ក៏នឹងត្រូវលើកឡើងមកពិភាក្សាផងដែរ ព្រោះអូស្ត្រាលីចង់កាត់បន្ថយភាពតានតឹងក្នុងសមុទ្រចិនខាងត្បូង ៕
ចែករំលែកព័តមាននេះ