ខេត្តកំពង់ស្ពឺ ៖ រថយន្តដឹកឈើប្រណីត១គ្រឿងត្រូវបានក្រុមសមត្ថកិច្ចនគរបាល និងមន្ទីរកសិកម្មខេត្ត និងបរិស្ថានបង្ក្រាបបាន និង១គ្រឿងទៀតបានបើករត់គេចបាត់ស្រមោល
ខេត្តកំពង់ស្ពឺ ៖ រថយន្តដឹកឈើប្រណីត១គ្រឿងត្រូវបានក្រុមសមត្ថកិច្ចនគរបាល និងមន្ទីរកសិកម្មខេត្ត និងបរិស្ថានបង្ក្រាបបាន និង១គ្រឿងទៀតបានបើករត់គេចបាត់ស្រមោល ខណៈដែលក្រុមឈ្មួញរកស៊ីដឹកឈើដុះស្លែប្រចាំខេត្តកំពង់ស្ពឺបម្រុងលោតឆត្រ័ទៅវៀតណាម ហើយក៏ត្រូវបែកការណ៍ពីមន្ត្រីកងរាជអាវុធហត្ថម្នាក់ដែលមិនបានសើមមាត់សើមកនឹងគេបានរាយការណ៍ទៅថ្នាក់លើ ហើយក៏បានដឹងដល់លោកអភិបាលខេត្តបានបញ្ជាផ្ទាល់ទៅកម្លាំងនគរបាល និងជំនាញមន្ទីរកសិកម្មខេត្តតាមបង្ក្រាប។
ការឆ្មក់ចាប់បង្ក្រាបរថយន្តដឹកឈើប្រណីតបានមួយគ្រឿងពេញនេះ កាលពីល្ងាចថ្ងៃទី២៧ ខែមីនា ឆ្នាំ២០១៧ នៅក្នុងភូមិរោងម៉ាស៊ីន ឃុំតាសាល ស្រុឱរ៉ាល់ ខេត្តកំពង់ស្ពឺ។ តាមការឲ្យដឹងពីមន្ត្រីនគរបាលមួយរូបបានប្រាប់ថា រថយន្តដែលបង្ក្រាបបាននោះ ជាប្រភេទរថយន្តកូរ៉េពណ៌ស ចំណុះ៥តោន ពាក់ស្លាកលេខភ្នំពេញ 3C-3379 ដែលមានដឹកឈើប្រណីតពេញរថយន្តតែម្តង។ ប្រភពពីនគរបាលដែលចុះប្រតិបត្តិការបង្ក្រាបបានបង្ហើបឲ្យដឹងថា រឿងដឹកជញ្ជូនឈើខុសច្បាប់នេះបែកការណ៍ដោយសារតែមន្ត្រីអាវុធហត្ថស្រុកមួយរូបបានរាយការណ៍ទៅថ្នាក់លើដែលមិនមែនជា(មេរបស់ខ្លួន) ទើបមានបញ្ជាពីលើឲ្យតាមបង្ក្រាបឲ្យទាល់តែបាន។
ប្រភពបន្តថា យោងតាមសេចក្តីរាយការណ៍គឺឈ្មួញបានដឹកឈើចំនួន២រថយន្តចេញពីចម្ការមួយកន្លែងក្នុងឃុំតាសាល ដែលដីចម្ការត្រូវបានគេដឹងថា ជារបស់ ចែហៀង។ ទោះជាយ៉ាងណាក្រោមការបញ្ជាពីឯកឧត្តមអភិបាលខេត្តកំពង់ស្ពឺ កម្លាំងគណៈបញ្ជាការឯកភាពស្រុកឱរ៉ាល់ ធ្វើការបង្ក្រាបបាន១រថយន្ត តែគួរឲ្យស្តាយរថយន្ត១គ្រឿងទៀតបានរត់គេចបាត់។ សមត្ថកិច្ចបានដាក់ការសង្ស័យថាឈើខាងលើនេះជារបស់ក្រុមឈ្មួញធំៗចំនួន២រូប ដែលកំពុងតែមានរឿក្តីដឹកជញ្ជូនឈើខុសច្បាប់ជាប់ខ្លួននៅឡើយ ក្នុងការបង្ក្រាបនេះផងដែរគឺសមត្ថកិច្ចបន្តធ្វើដូចភ្លៀងរលឹម មិនលើកលែងឲ្យឈ្មួញណាម្នាក់ឡើយ នេះបើតាមការបញ្ជាក់ប្រាប់ពីលោកអភិបាលខេត្តកំពង់ស្ពឺថា (កុកតែងតែភ្លេចជង់ តែជង់មិនដែលភ្លេចកុកឡើយ)។
គួរបញ្ជាក់ថា សកម្មភាពដឹកឈើរបស់ក្រុមឈ្មួញតែងតែធ្វើឡើងជារៀងរាល់យប់និងថ្ងៃពីព្រោះតែឈ្មួញត្រូវរ៉ូវជាមួយថ្នាក់ក្រោមអស់ទៅហើយ។ ជាក់ស្តែងដូចជាករណីខាងលើ បើគ្មានបញ្ជាពីលោកអភិបាលខេត្តទេ ម្លេះសំឈើទាំងអស់នេះរត់ទៅដល់ប្រទេសវៀតណាមបាត់អស់ទៅហើយ។ឈ្មួញឈើប្រចាំស្រុកឱរ៉ាល់ដ៏ធំមិនបានចេញមុខរកស៊ីដោយផ្ទាល់នោះទេ គឺបានឲ្យប្រពន្ធជាអ្នកចេញមុខជំនួសវិញ។
ប្រភពពីមន្ត្រីតូចតាចបានប្រាប់ថាឈ្មួញដែលរកស៊ីឈើឈ្មោះ ណុប ឌី បានប្តូរឈ្មោះដោយប្រើឈ្មោះផ្សេងវិញហើយដោយងាយស្រួលក្នុងការទំនាក់ទំនងជាមួយមន្ត្រីថ្នាក់ក្រោមៗ មានទាំងកងរាជអាវុធហត្ថស្រុក យោធា និងកងរាជអាវុធហត្ថលើផ្ទៃប្រទេសទៀតផង ដើម្បីងាយស្រួលក្នុងការទំនាក់ទំនងការរកស៊ីនោះ ពីព្រោះបើប្រើឈ្មោះ ណុប ឌី គឺជំនាញ និងសមត្ថកិច្ចស្គាល់សុះសាយមិនចាញ់ក្រុមឈ្មួញធំៗ២នាក់ខាងលើនោះឡើយ។
ជាងនេះទៅទៀតអ្វីជាការកត់សម្គាល់ពីមុន អភិបាលខេត្តលោកតែងតែបញ្ជាកម្លាំងខាងអាវុធហត្ថខេត្តឲ្យបង្ក្រាបបទល្មើសជាច្រើនដង តែជាលទ្ធផលត្រលប់មកវិញសូន្យ (គ្មានបានផល) ទំនងបែបនេះហើយទើបលោកអភិបាលខេត្តងាកទៅបញ្ជាកម្លាំងផ្សេងទៅវិញក្នុងការបង្ក្រាបបទល្មើសព្រៃឈើម្តង។ ក្រោយធ្វើការបង្ក្រាបជំនាញបានប្រគល់ឲ្យដែនជម្រកបរិស្ថានរង់ចាំវាស់វែងនៅពេលក្រោយ៕
ចែករំលែកព័តមាននេះ