តាមប្រមាញ់ចោរប្លន់ប្រដាប់អាវុធចាប់បាន2នាក់
ខេត្តកំពង់ស្ពឺ ៖ ក្រុមចោរប្លន់ម៉ូតូដែលតែងតែធ្វើសកម្មភាពនៅតាមបណ្តាខេត្តនានា ពេលនេះត្រូវបានកម្លាំងនគរបាលខេត្តកំពត និងកម្លាំងនគរបាលខេត្តកំពង់ស្ពឺ
ខេត្តកំពង់ស្ពឺ ៖ ក្រុមចោរប្លន់ម៉ូតូដែលតែងតែធ្វើសកម្មភាពនៅតាមបណ្តាខេត្តនានា ពេលនេះត្រូវបានកម្លាំងនគរបាលខេត្តកំពត និងកម្លាំងនគរបាលខេត្តកំពង់ស្ពឺ សហការជាមួយកម្លាំងនគរបាលនាយកដ្ឋានព្រហ្មទណ្ឌក្រសួងមហាផ្ទៃ កាលពីថ្ងៃទី២៥ ខែមីនាកន្លងមកនេះ បានបើកប្រតិបត្តិការតាមបង្ក្រាបក្រុមជនល្មើសទាំងនោះបាន២នាក់ជាបន្តបន្ទាប់ ។ ការបង្ក្រាបនេះធ្វើឡើងគឺបន្ទាប់ពីជនល្មើសបានប្លន់ម៉ូតូពីអ្នកស្រុកមួយគ្រឿងនៅភូមិតាយុង ឃុំដំបូករូង ស្រុកភ្នំស្រួច ។
តាមនគរបាលស្រុកភ្នំស្រួចបាននិយាយថា ក្រោយពីក្រុមចោរទាំងនោះបានធ្វើសកម្មភាពភ្ជង់ប្លន់ម៉ូតូពីជនរងគ្រោះនៅស្រុកភ្នំស្រួចបានហើយ ពួកគេក៏ជិះម៉ូតូនោះសំដៅទៅខេត្តកំពត ។ ក្រោយទទួលបានព័ត៌មានអំពីករណីប្លន់ខាងលើ កម្លាំងនគរបាលខេត្តកំពត បានចេញស្ទាក់ក្នុងភូមិសាស្ត្រជាប់ព្រំប្រទល់ខេត្តកំពង់ស្ពឺ ស្រាប់តែជនល្មើសហាក់ដូចជាដឹងខ្លួនមុន ក៏បានជិះម៉ូតូត្រឡប់មកខេត្តកំពង់ស្ពឺវិញតាមផ្លូវជាតិលេខ៤១ ហើយត្រូវបានសមត្ថកិច្ចខាងខេត្តកំពង់ស្ពឺចាប់បាននៅមុខអធិការដ្ឋាននគរបាលស្រុកគងពិសី ។
តាមមន្ត្រីនគរបាលបានបញ្ជាក់ថា ជនល្មើសដែលត្រូវឃាត់ខ្លួនបាននៅខេត្តកំពង់ស្ពឺឈ្មោះ ម៉ៅ គឹមអេង ហៅចន អាយុ៣៨ឆ្នាំ មុខរបរមិនពិតប្រាកដស្នាក់នៅបណ្តោះអាសន្ននៅក្នុងភូមិមានជ័យ ឃុំដំបូករូង ស្រុកភ្នំស្រួច មានស្រុក កំណើតនៅភូមិចំលងជ្រៃ ឃុំស្តេចគង់ខាងលិច ស្រុកបន្ទាយមាស ខេត្តកំពត។ ក្រោយការឃាត់ខ្លួនជនសង្ស័យបានហើយ សមត្ថកិច្ចខេត្តកំពង់ស្ពឺបានដកហូតម៉ូតូរបស់ជនរងគ្រោះនៅភូមិឃុំជាមួយគ្នាដែលប្លន់បាននោះម៉ាកហុងដាធុនC125 ស៊េរីឆ្នាំ២០១៧ ពណ៌ខ្មៅ ពាក់ផ្លាកលេខកំពង់ស្ពឺ 1H-6919 ដែលមានម្ចាស់ឈ្មោះផាត សារឿន ភេទប្រុស អាយុ៤១ឆ្នាំរស់នៅក្នុងភូមិតាយ៉ុង ឃុំដំបូករូង ស្រុកភ្នំស្រួច ខេត្តកំពង់ស្ពឺ ។
បន្ទាប់ពីឃាត់ខ្លួនជនសង្ស័យបានម្នាក់ កម្លាំងនគរបាលបានសហការជាមួយនាយកដ្ឋានព្រហ្មទណ្ឌដឹកនាំដោយលោកឧត្តមសេនីយ៍ទោ ង៉េង ជួ និងលោកឧត្តមសេនីយ៍ទោ ឡឹក វណ្ណៈ ចាប់បានគូកនម្នាក់ទៀត ដែលកំពុងយកម៉ូតូទៅលក់នៅភ្នំពេញ នៅគល់ស្ពានអាកាសស្ទឹងមានជ័យ។ ជនសង្ស័យទី២ដែលត្រូវបានចាប់ខ្លួនឈ្មោះចាន់ រ័ត្ន ភេទប្រុស អាយុ៣៧ឆ្នាំ មុខរបរមិនពិតប្រាកដ ស្នាក់នៅបណ្តោះអាសន្ន នៅភូមិមានជ័យ ឃុំដំបូករូង ស្រុកភ្នំស្រួច ខេត្តកំពង់ស្ពឺ មានស្រុកកំណើតនៅភូមិកោះតាចាន់ ឃុំកំពង់ត្រាចខាងកើត ស្រុកកំពង់ត្រាច ខេត្តកំពត ។
ការឃាត់ខ្លួនជនសង្ស័យនេះ កម្លាំងនគរបាលនាយកដ្ឋានព្រហ្មទណ្ឌ បានដកហូតបានម៉ូតូដែលក្រុមជនល្មើសតែងតែជិះធ្វើសកម្មភាពបាន១គ្រឿង ម៉ាកសេ១២៥ ស៊េរីឆ្នាំ២០១១ ពណ៌ខ្មៅ ពាក់ផ្លាកលេខ 1AK-4747 ភ្នំពេញ ដែលជិះធ្វើសកម្មភាពកន្លងមកនៅខេត្តកំពតនិងតាមបណ្តាខេត្តនានានោះ ។ ក្រោយការចាប់ខ្លួន នគរបាលនាយកដ្ឋានព្រហ្មទណ្ឌ បាននាំជនសង្ស័យទៅយកអាវុធ ដែលបានលាក់ទុកផងដែរគឺកាំភ្លើងខ្លី១ដើម ។ វត្ថុតាមរួមនឹងក្រុមជនសង្ស័យទាំង២នាក់ត្រូវបាននាំទៅសួរនាំបន្តនៅនាយកដ្ឋានព្រហ្មទណ្ឌក្រសួងមហាផ្ទៃ ដើម្បីចាត់ការបន្តតាមផ្លូវច្បាប់ ។
ស្តាប់ការសារភាពរបស់ជនសង្ស័យ
ខេត្តកំពត ៖ មុខសញ្ញាចោរប្លន់ដ៏សកម្មនៅក្នុងខេត្តចំនួន៣មាន ខេត្តកំពត ខេត្តកំពង់ស្ពឺ និងខេត្តកែប ចំនួន២នាក់ បានត្រូវកម្លាំងសមត្ថកិច្ចជំនាញរបស់ក្រសួងមហាផ្ទៃ សហការជាមួយស្នងការដ្ឋាននគរបាលខេត្តកំពត និងខេត្តកំពង់ស្ពឺ ស្រាវជ្រាវចាប់ខ្លួនបាន ហើយក្រោយពីសួរចម្លើយពេញមួយយប់ ជនសង្ស័យបានសារភាពថា ធ្លាប់ប្លន់៩ដង បាញ់សម្លាប់ជនរងគ្រោះ និងយកបានទ្រព្យសម្បត្តិយ៉ាងច្រើននាពេលកន្លងមក ។
លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្ត ថ្លែងថា ក្រោយពីសួរចម្លើយពេញមួយយប់ ក្រុមចោរប្លន់នៅខេត្តកំពត និងខេត្តកែប ដែលបង្ក្រាបបានកាលពីថទី២៥ ខែមីនា សារភាពថា ពួកគេធ្លាប់ធ្វើសកម្មភាពប្លន់ចំនយន៩លើក តាំងពីឆ្នាំ២០១៤មក ។ លោកឧត្តមសេនីយ៍ស្នងការ បានប្រាប់លម្អិតថា ៖
លើកទី១-នៅថ្ងៃទី២៣ ខែតុលា ឆ្នាំ២០១៤ ប្លន់ផ្ទះឈ្មោះ អេង សេង ភេទប្រុស អាយុ៥៦ឆ្នាំ ជាបុគ្គលិកបណ្តែតពេទ្យ៣១៧តេជោអភិវឌ្ឍន៍ និងប្រពន្ធឈ្មោះ ទៀង សារិន អាយុ៥៥ឆ្នាំ ជាបុគ្គលិកពេទ្យ៣១៧ នៅភូមិតេជោ ឃុំតេជោអភិវឌ្ឍន៍ ស្រុកឈូក ។ ពេលនោះបានកាប់ឈ្មោះ អេង សេង ជាប្តី ចំនួន៩ពូថៅបណ្តាលឲ្យស្លាប់នៅក្បែរជញ្ជាំងក្រៅផ្ទះ រីឯប្រពន្ធឈ្មោះ ទៀង សារិន របួសធ្ងន់ ។
លើកទី២-នៅថ្ងៃទី៦ ខែមករា ឆ្នាំ២០១៥ប្លន់ផ្ទះអ្នកដូរលុយនៅផ្សារលក ក្នុងភូមិលក ឃុំប្ញស្សីស្រុកខាងលិច ស្រុកកំពង់ត្រាច ។
លើកទី៣-នៅថ្ងៃទី១១ ខែមិថុនា ឆ្នាំ២០១៥ ប្លន់នៅភូមិកណ្តាលទួល ឃុំកំពង់ត្រាចខាងលិច ស្រុកកំពង់ត្រាច ។
លើកទី៤-នៅថ្ងៃទី២៣ ខែវិច្ឆិកា ឆ្នាំ២០១៥ ប្លន់ម៉ូតូនៅតាមផ្លូវជាតិលេខ៣ ក្បែរព្រំប្រទល់ក្រុងកំពតនិងស្រុកទឹកឈូ ក្នុងភូមិទទឹងថ្ងៃ ឃុំបឹងទូក ស្រុកទឹកឈូ ។ ជនរងគ្រោះឈ្មោះ វង្ស សៀក ភេទស្រី អាយុ៤៨ឆ្នាំ នៅភូមិរលួស ឃុំបឹងទូក បាញ់របួសកំភួនដៃឆ្វេងធ្លាយ និងជនរងគ្រោះម្នាក់ទៀតឈ្មោះ អុិន ក្រូច ភេទប្រុស អាយុ៤៦ឆ្នាំ នៅភូមិរលួស ឃុំបឹងទូក របួសថ្ងាសនិងក្បាល ដោយត្រូវពួកគេកាប់នឹងពូថៅ ។
លើកទី៥-នៅថ្ងៃទី១៥ ខែធ្នូ ឆ្នាំ២០១៥ ប្លន់សម្លាប់នៅភូមិអង្គ្រង ឃុំកំពង់ត្រាចខាងលិច ស្រុកកំពង់ត្រាច ។ ជនរងគ្រោះឈ្មោះ ភឹម ខន ភេទប្រុស អាយុ៦០ឆ្នាំ ជាជនពិការជើង ផ្ទះនៅភូមិធ្នង់ ឃុំប្ញស្សីស្រុកខាងកើត ស្រុកកំពង់ត្រាច មានដីស្រែនិងដីភូមិនៅភូមិអង្គ្រង ដោយវាយនិងកាប់បណ្ដាលស្លាប់នៅនឹងកន្លែង។ រីឯកូនស្រីបានវាយឲ្យរបួសធ្ងន់ និងចងភ្ជាប់ជាមួយសពឪពុក ។
លើកទី៦-នៅថ្ងៃទី១៩ ខែមករា ឆ្នាំ២០១៧ ប្លន់ម៉ូតូរបស់ឈ្មោះ លាង ឡេងប៉ុង ភេទប្រុស អាយុ២៣ឆ្នាំ នៅភូមិកូនសត្វ ឃុំកូនសត្វ ស្រុកទឹកឈូ ។
លើកទី៧-នៅថ្ងៃទី២០ ខែមករា ឆ្នាំ២០១៧ ប្លន់ម៉ូតូនៅមុខមណ្ឌលសុខភាព ប៊ុនរ៉ានី ហ៊ុន សែន ក្នុងភូមិតេជោអភិវឌ្ឍន៍ ឃុំតេជោអភិវឌ្ឍន៍ ស្រុកឈូក ដោយបាញ់ទៅលើជនរងគ្រោះឈ្មោះ ថោង ប៊ុនធិន ភេទប្រុស អាយុ៥៥ឆ្នាំ ត្រូវគល់ភ្លៅខាងស្ដាំ ។
លើកទី៨-នៅថ្ងៃទី២២ ខែមករា ឆ្នាំ២០១៧ ប្លន់ម៉ូតូនៅផ្លូវលំក្រួសក្រហមចេញពីផ្លូវបេតុង រោងចក្រស៊ីម៉ង់ត៍ K-Cement ចម្ងាយប្រហែល៥០ម៉ែត្រ ស្ថិតក្នុងភូមិក្រាំងដូង ឃុំសំរោងក្រោម ស្រុកបន្ទាយមាស ដោយបាញ់៣គ្រាប់ បណ្តាលឲ្យជនរងគ្រោះឈ្មោះ ពៅ ដេវ៉ា ត្រូវពោះរបួសធ្ងន់ ។
លើកទី៩-នៅថ្ងៃទី១៨ ខែមីនា ឆ្នាំ២០១៧ ប្លន់នៅតាមផ្លូវលំជាប់ជើងភ្នំត្នោត ក្នុងភូមិដំណាក់ត្រយឹង ឃុំតាកែន ស្រុកឈូក ។ ជនរងគ្រោះឈ្មោះ រុំ រ៉ុង ភេទប្រុស អាយុ៣១ឆ្នាំ នៅភូមិទួល ឃុំល្បើក ស្រុកឈូក ដោយបានបាញ់ជនរងគ្រោះ១គ្រាប់របួសត្រគាកឆ្វេងបៀមគ្រាប់ ។
លោកឧត្តមសេនីយ៍ស្នងការ បានបញ្ជាក់ថា «កាលពីថ្ងៃទី១០ ខែកុម្ភៈ ឆ្នាំ២០១៦ យើងបានចាប់ជនសង្ស័យឈ្មោះ លឹម ភី អាយុ៣៧ឆ្នាំ ជាគូកនរបស់ក្រុមចោរនេះ បច្ចុប្បន្នកំពុងឃុំខ្លួននៅក្នុងពន្ធនាគារខេត្ត»។
លោកបន្តថា ក្រោយពីបង្ក្រាបបាន កម្លាំងសមត្ថកិច្ចដកហូតបានវត្ថុតាងមានកាំភ្លើងខ្លី១ដើមម៉ាកកា៥៩ បង់១ និងគ្រាប់៩គ្រាប់ ម៉ូតូហុងដាឌ្រីមសេ១២៥ ស៊េរីឆ្នាំ២០០៩ មួយគ្រឿង ពាក់ផ្លាកលេខ ភ្នំពេញ ១AK-៤៧៤៧ដែលលោកឧត្តមសេនីយ៍ទោ ឡឹក វណ្ណៈ និងលោកឧត្តមសេនីយ៍ទោ ង៉េង ជួរ អនុប្រធាននាយកដ្ឋាននគរបាលព្រហ្មទណ្ឌ ក្រសួងមហាផ្ទៃដឹកនាំចាប់យកវត្ថុតាងទាំងនេះបាន ។ រីឯម៉ូតូដែលប្លន់នៅខេត្តកំពង់ស្ពឺ កាលពីថ្ងៃទី២៥ ខែមីនា ឆ្នាំ២០១៧ រក្សាទុកនៅស្នងការដ្ឋាននគរបាលខេត្តកំពង់ស្ពឺ ។
លោកស្នងការថ្លែងទៀតថា បក្សពួកចោរប្លន់២នាក់ដែលបង្ក្រាបបាននៅពេលនេះ ម្នាក់ឈ្មោះ ម៉ៅ គឹមអេង ហៅ ចន មានដីកាចាប់ខ្លួនរបស់សាលាដំបូងខេត្តកំពត ករណីប្លន់សម្លាប់ កាលពីថ្ងៃទី១៥ ខែធ្នូ ឆ្នាំ២០១៥ នៅភូមិអង្គ្រង ឃុំកំពង់ត្រាចខាងលិច ស្រុកកំពង់ត្រាច និងម្នាក់ទៀតឈ្មោះ ចាន់ រ័ត្ន មានដីកាចាប់ខ្លួនរបស់សាលាដំបូងខេត្តកំពត ករណីប្លន់សម្លាប់ កាលពីថ្ងៃទី២៣ ខែតុលា ឆ្នាំ២០១៤ នៅភូមិតេជោអភិវឌ្ឍន៍ ឃុំតេជោអភិវឌ្ឍន៍ ស្រុកឈូក ។
សូមបញ្ជាក់ថា ជនសង្ស័យទាំង២នាក់ ត្រូវបានកម្លាំងនគរបាលខេត្តកំពង់ស្ពឺ ខេត្តកំពត និងកម្លាំងនគរបាលនាយកដ្ឋានព្រហ្មទណ្ឌក្រសួងមហាផ្ទៃសហការគ្នាតាមចាប់ខ្លួនបានម្នាក់នៅមុខអធិការដ្ឋាននគរបាលស្រុកគងពិសី ខេត្តកំពង់ស្ពឺ បន្ទាប់ពីប្លន់ម៉ូតូរបស់អ្នកស្រុកនៅស្រុកភ្នំស្រួច និងម្នាក់ទៀតចាប់ខ្លួនបាននៅគល់ស្ពានស្ទឹងមានជ័យ ក្នុងខណ្ឌមានជ័យ រាជធានីភ្នំពេញ ៕
ចែករំលែកព័តមាននេះ