ខេត្តកំពត ៖ មុខសញ្ញាចោរប្លន់ដ៏សកម្មក្នុងខេត្តបីមានខេត្តកំពត កំពង់ស្ពឺ និងខេត្តកែប ត្រូវបានកម្លាំងសមត្ថកិច្ចជំនាញរបស់ក្រសួងមហាផ្ទៃសហការជាមួយកម្លាំងស្នងការដ្ឋាននគរបាលខេត្តកំពត និងខេត្តកំពង់ស្ពឺ
ខេត្តកំពត ៖ មុខសញ្ញាចោរប្លន់ដ៏សកម្មក្នុងខេត្តបីមានខេត្តកំពត កំពង់ស្ពឺ និងខេត្តកែប ត្រូវបានកម្លាំងសមត្ថកិច្ចជំនាញរបស់ក្រសួងមហាផ្ទៃសហការជាមួយកម្លាំងស្នងការដ្ឋាននគរបាលខេត្តកំពត និងខេត្តកំពង់ស្ពឺស្រាវជ្រាវចាប់ខ្លួនបានក្រុមចោរប្លន់ដ៏កក្រើកនៅខេត្តកំពត និងខេត្តកែប នាពេលកន្លងមក ។ ក្រោយពីសួរចម្លើយពេញមួយយប់ចោរបានសារភាពថា ធ្លាប់ប្លន់៩ដង បាញ់សម្លាប់ជនរងគ្រោះ និងយកអស់ទ្រព្យសម្បត្តិយ៉ាងច្រើននាពេលកន្លងមកនេះ ។
លោកស្នងការនគរបាលខេត្តកំពតបានបញ្ជាក់ប្រាប់នៅព្រឹកថ្ងៃទី២៦ ខែមីនា ឆ្នាំ២០១៧ ថា ក្រោយពីសួរចម្លើយពេញមួយយប់ក្រុមចោរប្លន់នៅខេត្តកំពត និងខេត្តកែបដែលបង្ក្រាបបាននៅថ្ងៃទី២៥ ខែមីនា ឆ្នាំ២០១៧ បានសារភាពថា ពួកគេធ្លាប់ធ្វើសកម្មភាពប្លន់បាន៩លើករួចមកហើយ តាំងពីឆ្នាំ២០១៤មកម្ល៉េះ ចំពោះសកម្មភាពប្លន់ទាំង៩លើកពួកគេបានសារភាពប្រាប់សមត្ថកិច្ចថា ធ្លាប់បាញ់សម្លាប់ជនរងគ្រោះ និងយកទ្រព្យសម្បត្តិបានយ៉ាងច្រើនទៀតផងនាពេលកន្លងមក ។
លោកស្នងការបានប្រាប់យ៉ាងលម្អិតថា លើកទី១៖ នៅថ្ងៃទី២៣ ខែតុលា ឆ្នាំ២០១៤ ប្លន់ផ្ទះឈ្មោះ អេង សេង ភេទប្រុស អាយុ៥៦ឆ្នាំ ជាបុគ្គលិកពេទ្យ៣១៧ តេជោអភិវឌ្ឍន៍ និងប្រពន្ធឈ្មោះ ទៀង សារិន អាយុ៥៥ឆ្នាំ ជាបុគ្គលិកពេទ្យ៣១៧ នៅភូមិតេជោ ឃុំតេជោអភិវឌ្ឍន៍ ស្រុកឈូក ហើយបានកាប់ជនរងគ្រោះឈ្មោះ អេង សេងជាប្តី ចំនួន៩ពូថៅបណ្តាលឲ្យស្លាប់នៅក្បែរជញ្ជាំងក្រៅផ្ទះ រីឯឈ្មោះទៀង សារិនជាប្រពន្ឋរបួសធ្ងន់ ។ លើកទី២ ៖ នៅថ្ងៃទី៦ ខែមករា ឆ្នាំ២០១៥ ប្លន់ផ្ទះអ្នកដូរលុយនៅផ្សារលក ក្នុងភូមិលក ឃុំប្ញស្សីស្រុកខាងលិច ស្រុកកំពង់ត្រាច ។ លើកទី៣៖ នៅថ្ងៃទី១១ ខែមិថុនា ឆ្នាំ២០១៥ ប្លន់នៅភូមិកណ្តាលទួល ឃុំកំពង់ត្រាចខាងលិច ស្រុកកំពង់ត្រាច ជនរងគ្រោះ ឈ្មោះ មុយ ឃិ អាយុ៦៨ឆ្នាំ នៅចំណុចលើដីដែលធ្វើផ្ទះក្នុងភូមិកណ្តាលទួល ឃុំកំពង់ត្រាចខាងលិច ប៉ុន្តែចុះឈ្មោះស្នាក់នៅភូមិ ព្រៃតាកុយ ឃុំពងទឹក ស្រុកដំណាក់ចង្អើរ ខេត្តកែប ។ លើកទី៤៖ នៅថ្ងៃទី២៣ ខែវិច្ឆិកា ឆ្នាំ២០១៥ ប្លន់ម៉ូតូ នៅតាមផ្លូវលេខ៣ ខាងលិចកំពត ក្បែរព្រំប្រទល់ក្រុងកំពត និងស្រុកទឹកឈូ ក្នុងភូមិទទឹងថ្ងៃ ឃុំបឹងទូក ស្រុកទឹកឈូ ជនរងគ្រោះឈ្មោះ វង្ស សៀក ភេទស្រី អាយុ៤៨ឆ្នាំ នៅភូមិរលួស ឃុំបឹងទូក បាញ់របួសកំភួនដៃឆ្វេងធ្លាយ (ត្រូវគ្រាប់កាំភ្លើង) និងជនរងគ្រោះម្នាក់ទៀតឈ្មោះ អ៊ិន ក្រូច ភេទប្រុស អាយុ៤៦ឆ្នាំ នៅភូមិរលួស ឃុំបឹងទូក របួសថ្ងាស និងក្បាល ដោយត្រូវក្រុមគ្នាគេកាប់ នឹងពូថៅ ។ លើកទី៥៖ នៅថ្ងៃទី១៥ ខែធ្នូ ឆ្នាំ២០១៥ ប្លន់សម្លាប់ នៅភូមិអង្គ្រង ឃុំកំពង់ត្រាចខាងលិច ស្រុកកំពង់ត្រាច ជនរងគ្រោះឈ្មោះ ភឹម ខន ភេទប្រុស អាយុ៦០ឆ្នាំ ជាជនពិការជើង ផ្ទះនៅភូមិធ្នង់ ឃុំប្ញស្សីស្រុកខាងកើត ស្រុកកំពង់ត្រាច មានដីស្រែ និងដីភូមិ នៅភូមិអង្គ្រង ឃុំកំពង់ត្រាចខាងលិច ស្រុកកំពង់ត្រាច ដោយជនល្មើសវាយ និងកាប់ បណ្ដាលស្លាប់នៅនឹងកន្លែង រីឯកូនស្រីបានវាយរបួសធ្ងន់ និងចងភ្ជាប់ជាមួយខ្មោចឪពុក ។ លើកទី៦៖ នៅថ្ងៃទី១៩ ខែមករា ឆ្នាំ២០១៧ ប្លន់ម៉ូតូរបស់ឈ្មោះលាង លេងប៉ុងភេទប្រុស អាយុ២៣ឆ្នាំ នៅភូមិកូនសត្វ ឃុំកូនសត្វ ស្រុកទឹកឈូ ។ លើកទី៧៖ នៅថ្ងៃទី២០ ខែមករា ឆ្នាំ២០១៧ ប្លន់យកម៉ូតូនៅចំណុចមុខមណ្ឌលសុខភាព ប៊ុនរ៉ានី ហ៊ុនសែន ក្នុងភូមិតេជោអភិវឌ្ឍន៍ ឃុំតេជោអភិវឌ្ឍន៍ ស្រុកឈូក បានបាញ់ទៅលើ ជនរងគ្រោះ ឈ្មោះ ថោង ប៊ុនធិន ភេទប្រុស អាយុ៥៥ឆ្នាំ នៅភូមិកើតហេតុ ត្រូវគល់ភ្លៅខាងស្ដាំរងរបួស ។ លើកទី៨៖ នៅថ្ងៃទី២២ ខែមករា ឆ្នាំ២០១៧ ប្លន់ម៉ូតូនៅចំណុចផ្លូវលំគ្រួសក្រហមចេញពីផ្លូវបេតុង រោងចក្រ ស៊ីម៉ងត៍ K-Cement ចំងាយប្រហែល៥០ម៉ែត្រ ស្ថិតនៅភូមិក្រាំងដូង ឃុំសំរោងក្រោម ស្រុកបន្ទាយមាស ដោយបាញ់៣គ្រាប់ បណ្តាលឲ្យជនរងគ្រោះឈ្មោះ ពៅ ដេវ៉ា ត្រូវពោះ របួសធ្ងន់ និងលើកទី៩៖ នៅថ្ងៃទី១៨ ខែមីនា ឆ្នាំ២០១៧ ប្លន់លើកចុងក្រោយ ប្លន់នៅតាមផ្លូវលំជាប់ជើងភ្នំត្នោត ក្នុងភូមិដំណាក់ត្រយឹង ឃុំតាកែន ស្រុកឈូក ជនរងគ្រោះឈ្មោះ រុំ រ៉ុង ភេទប្រុស អាយុ៣១ឆ្នាំ នៅភូមិទួល ឃុំល្បើក ស្រុកឈូក ដោយបានបាញ់ជនរងគ្រោះ១គ្រាប់ របួសត្រគាកឆ្វេងបៀមគ្រាប់ ។
លោកឧត្តមសេនីយ៍ទោបញ្ជាក់ថា ក្រោយពីបង្ក្រាបបានកម្លាំងជំនាញដកហូតវត្ថុតាងអាវុធខ្លី K59 មួយដើម បង់១ និងគ្រាប់៩គ្រាប់ ម៉ូតូ Honda Dream C125 ឆ្នាំ២០០៩ មួយគ្រឿង ពាក់ស្លាក់លេខភ្នំពេញ1AK-4747 ដែលលោកឧត្តមសេនីយ៍ទោ ឡឹក វណ្ណៈ និងលោកឧត្តមសេនីយ៍ទោ ង៉េង ជួរ អនុប្រធាននាយកដ្ឋាននគរបាលព្រហ្មទណ្ឌ ក្រសួងមហាផ្ទៃ បានដឹកនាំចាប់យកវត្ថុតាងទាំងនេះបាន ។ រីឯម៉ូតូដែលប្លន់នៅកំពង់ស្ពឺនៅថ្ងៃទី២៥ ខែមីនា ឆ្នាំ២០១៧ម្សិលមិញ រក្សាទុកនៅស្នងការដ្ឋាននគរបាលខេត្តកំពង់ស្ពឺ ៕
ចែករំលែកព័តមាននេះ