គ្រោងបង្កើនថវិកាដល់3ប៊ីលានដុល្លារដើម្បីសាងសង់ទីក្រុងរណបជ្រោយចង្វា
រាជធានីភ្នំពេញ ៖ ក្រុមហ៊ុន OCIC គ្រោងបង្កើនថវិការហូតដល់៣ពាន់លានដុល្លារអាមេរិកដើម្បីវិនិយោគទីក្រុងរណបជ្រោយចង្វា ដែលស្ថិតនៅលើផ្ទៃដីជាង២០០ហិកតា។
រាជធានីភ្នំពេញ ៖ ក្រុមហ៊ុន OCIC គ្រោងបង្កើនថវិការហូតដល់៣ពាន់លានដុល្លារអាមេរិកដើម្បីវិនិយោគទីក្រុងរណបជ្រោយចង្វា ដែលស្ថិតនៅលើផ្ទៃដីជាង២០០ហិកតា។
អគ្គនាយករងក្រុមហ៊ុន OCIC លោក ទូច សំណាង បានថ្លែងឲ្យដឹងតាមទូរស័ព្ទកាលពីព្រឹកថ្ងៃទី២៤ មីនា ម្សិលមិញថា ទីក្រុងរណបនេះគ្រោងបង្កើនថវិកាពី១.៦០០លាន ដល់៣ពាន់លានដុល្លារដើម្បីវិនិយោគលើគម្រោងទីក្រុងរណបនេះ ដែលជំហានដំបូង ក្រុមហ៊ុននឹងសាងសង់សាលពិព័រណ៍ និងសាលសម្រាប់រៀបចំអាពាហ៍ពិពាហ៍ មុនចាប់ផ្តើមគម្រោងអភិវឌ្ឍន៍ផ្សេងៗទៀត ។ លោកបន្តថា រហូតមកទល់ពេលនេះ ការសាងសង់ផ្លូវមេកាត់ចំកណ្តាលទីក្រុងរណបនេះបានបញ្ចប់ហើយ នៅសល់តែការចាក់កៅស៊ូបេទីមខ្លះៗប៉ុណ្ណោះ ចំណែកហេដ្ឋារចនាសម្ព័ន្ធផ្សេងៗទៀតកំពុងតែសាងសង់ ។
តាមគម្រោងក្រុមហ៊ុន OCIC នឹងសាងសង់ស្ពានថ្មីមួយទៀតចេញពីតំបន់ជាប់ផ្លូវជាតិលេខ៥ ទៅកាន់ទីក្រុងរណបនេះនៅពេលឆាប់ៗខាងមុខ ។
លោក ទូច សំណាង បន្តថា គម្រោងសាងសង់ទីក្រុងរណបនេះ នឹងចំណាយរយៈពេលសាងសង់ចំនួន២០ឆ្នាំ ទើបអាចបញ្ចប់គម្រោងទាំងមូល ហើយផែនការលម្អិតរបស់គម្រោងនេះ មិនទាន់បញ្ចប់ជាក់លាក់នៅឡើយទេ ។
ក្រុមអ្នកជំនាញអចលនទ្រព្យនិយាយស្រដៀងគ្នាថា ទីក្រុងរណបនេះមានទីតាំងដ៏ល្អ និងជាតំបន់មានសក្តានុពលសម្រាប់អភិវឌ្ឍន៍ ដោយសារទីក្រុងរណបនេះមានទីតាំងនៅជិតកណ្តាលរាជធានីភ្នំពេញ ជាតំបន់មានខ្យល់អាកាសល្អបរិសុទ្ធ ដោយមានទន្លេមេគង្គ និងទន្លេសាបព័ទ្ធជុំវិញ ព្រមទាំងផ្លូវជាតិសំខាន់ៗភ្ជាប់ជាមួយផងដែរ ដូចជា ផ្លូវជាតិលេខ៥ និងផ្លូវជាតិលេខ៦ ។
លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ថ្លែងថា ការសាងសង់ស្ពានថ្មីមួយចេញពីផ្លូវជាតិលេខ៥ ទៅកាន់តំបន់ជ្រោយចង្វា នឹងធ្វើឲ្យដីធ្លីនៅតំបន់នោះឡើងថ្លៃបន្ថែមទៀត ជាពិសេស លើកស្ទួយការអភិវឌ្ឍនៅតំបន់នោះកាន់តែរស់រវើក បន្ថែមលើសក្តានុពលដែលមានស្រាប់ ដូចជា ជាតំបន់មានអាកាសធាតុល្អដោយសារមានទន្លេអមសងខាង មានការតភ្ជាប់ស្ពានជ្រោយចង្វាភ្លោះ ដែលបានជួយលើកកម្ពស់មុខមាត់ និងអចលនទ្រព្យនៅតំបន់នេះរួចទៅហើយ ។
លោកបន្តថា ៖ « គម្រោងទីក្រុងរណបជ្រោយចង្វានឹងទទួលបានជោគជ័យ ប៉ុន្តែកម្រិតនៃភាពជោគជ័យ វាអាស្រ័យលើទំហំគម្រោង និងរយៈពេលនៃការបញ្ចប់គម្រោងនេះ » ។
លោក មាន ចាន់យ៉ាដា អភិបាលរងរាជធានីភ្នំពេញ ថ្លែងថា ការសាងសង់ស្ពាននៅតំបន់ មិនត្រឹមតែជួយលើកកម្ពស់មុខមាត់តំបន់នេះទេ ប៉ុន្តែជាការជួយសម្រួលលំហូរចរាចរណ៍ចេញពីផ្លូវជាតិលេខ៦ មកកាន់ផ្លូវជាតិលេខ៥ កុំឲ្យចូលរាជធានីកាន់តែច្រើនផងដែរ ជាពិសេស វាមិនធ្វើឲ្យចរាចរណ៍ប្រមូលផ្តុំតែមួយកន្លែង ដែលនាំឲ្យមានការកកស្ទះ ។
លោកបន្តថា ៖ « តំបន់ជ្រោយចង្វាជាតំបន់លំនៅឋាន ពាណិជ្ជកម្ម ដោយសារតំបន់នេះមានទីតាំងល្អ និងមានបរិយាកាសល្អបរិសុទ្ធព្រោះមានទន្លេច្រើននៅជុំវិញ » ៕
ចែករំលែកព័តមាននេះ