សមត្ថកិច្ចនគរបាលការិយាល័យព្រហ្មទណ្ឌកំរិតស្រាលរាជធានីភ្នំពេញ កាលពីថ្ងៃទី១៤ ខែតុលា ឆ្នាំ២០២២ បានបង្ហាញមុខជនសង្ស័យមួយក្រុមចំនួន៨នាក់ ដែលជាមុខសញ្ញាលួច ហៅថា (ដង្កូវក្នុងសាច់) ដែលសហការគ្នាជាមួយជាប្រព័ន្ធ
រាជធានីភ្នំពេញ ៖ សមត្ថកិច្ចនគរបាលការិយាល័យព្រហ្មទណ្ឌកំរិតស្រាលរាជធានីភ្នំពេញ កាលពីថ្ងៃទី១៤ ខែតុលា ឆ្នាំ២០២២ បានបង្ហាញមុខជនសង្ស័យមួយក្រុមចំនួន៨នាក់ ដែលជាមុខសញ្ញាលួច ហៅថា (ដង្កូវក្នុងសាច់) ដែលសហការគ្នាជាមួយជាប្រព័ន្ធ លួចខ្ទេចលួចខ្ទីលួចទាល់តែអតិថិជនខ្សឹបប្រាប់ បានថៅកែដឹងខ្លួន ទើបប្តឹងសមត្ថកិច្ចឲ្យចាប់ខ្លួនតែម្តង។
ជនសង្ស័យទាំង៨នាក់ខាងលើនេះ រួមមាន ៖ ១- ឈ្មោះ រ៉ែន សៅ ភេទប្រុស អាយុ១៩ឆ្នាំ មុខរបរអ្នកគ្រប់គ្រងឃ្លាំងដាក់សម្ភារៈ ជាងគ្រប់ប្រភេទ របស់ក្រុមហ៊ុន «លីហ្វា» ស្នាក់នៅឃ្លាំងគ្មានលេខផ្លូវលេខ៩០ ផ្លូវបេតេ សង្កាត់បឹងទំពុន២ ខណ្ឌមានជ័យ រាជធានីភ្នំពេញ។ ២- ឈ្មោះ រិត ទីហ្សេន ហៅពៅ ភេទប្រុស អាយុ១៨ឆ្នាំ មុខរបរអ្នកបើករ៉ឺម៉កដឹកសម្ភារៈជាងគ្រប់ប្រភេទក្រុមហ៊ុនលីហ្វា។ ៣- ឈ្មោះ រ៉ន គីមហេង ហៅគីម ភេទប្រុស អាយុ១៨ឆ្នាំ មុខរបរអ្នកបើករ៉ឺម៉កដឹកសម្ភារៈជាងគ្រប់ប្រភេទ ក្រុមហ៊ុនលីហ្វា។
៤-ឈ្មោះ ហោ ហ៊ុយ ភេទប្រុស អាយុ២០ឆ្នាំ មុខរបរអ្នកបើករ៉ឺម៉កដឹកសម្ភារៈជាងគ្រប់ប្រភេទ ក្រុមហ៊ុនលីហ្វា។ ៥- ឈ្មោះ ចាន់ សម្បត្តិ ហៅ ហុង ភេទប្រុស អាយុ១៨ឆ្នាំ មុខរបរអ្នកបើករ៉ឺម៉កដឹកសម្ភារៈជាងគ្រប់ប្រភេទក្រុមហ៊ុនលីហ្វា។ ៦- ឈ្មោះ យឹម ទី ភេទប្រុស អាយុ១៨ឆ្នាំ មុខរបរជាសិស្ស។ ៧- ឈ្មោះ ឆាយ ស៊ីណា ភេទប្រុស អាយុ១៨ឆ្នាំ មុខរបររើសអេតចាយ និង៨- ឈ្មោះ ណែត សុនី ហៅ នី ភេទប្រុស អាយុ៣០ឆ្នាំ មុខរបរលាងម៉ូតូ។ ពួកគេស្នាក់នៅឃ្លាំងគ្មានលេខ ផ្លូវលេខ៩០ ផ្លូវបេតេ និងផ្ទះជួល នៅសង្កាត់បឹងទំពុន២ ខណ្ឌមានជ័យ រាជធានីភ្នំពេញ។
ក្នុងពិធីបង្ហាញមុខជនសង្ស័យទាំង៨នាក់ខាងលើនោះ លោកវរសេនីយ៍ឯក ប៊ុន សត្យា នាយការិយាល័យនគរបាលព្រហ្មទណ្ឌកម្រិតស្រាលបានឲ្យដឹងថា កាលពីថ្ងៃទី០៩ ខែតុលា ឆ្នាំ២០២២ វេលាម៉ោង២១និង០៥នាទីយប់ កម្លាំងជំនាញនគរបាលព្រហ្មទណ្ឌ បានធ្វើការស្រាវជ្រាវ និងឃាត់ខ្លួនជនសង្ស័យដំបូងចំនួន៧នាក់ ក្រោយមកក៏ចាប់បានម្នាក់ទៀត នៅចំណុចឃ្លាំងគ្មានលេខ ផ្លូវលេខ៩០បេតេ ស្ថិតក្នុងសង្កាត់បឹងទំពុន២ ខណ្ឌមានជ័យ រាជធានីភ្នំពេញ ពាក់ព័ន្ធបទល្មើស (លួច) លួចសម្ភារៈជាងគ្រប់ប្រភេទមានដូចជា ៖ ម៉ូទ័រស្វាន, ម៉ូទ័រឆាប, ម៉ូទ័រដោះប៊ូឡុង, ម៉ូទ័រកាត់ដែក, ម៉ូទ័រលាងរថយន្ត, ម៉ូទ័រជម្រុញទឹក, ម៉ូទ័រទម្លាក់អណ្តូង និងសម្ភារៈផ្សេងៗទៀត ចំនួន៥ ០០០គ្រឿង ដែលគិតជាទឹកប្រាក់ប្រមាណ ៨០ ០០០ ដុល្លារអាមេរិក ប្រព្រឹត្តនៅឃ្លាំងគ្មានលេខ ផ្លូវលេខ៩០បេតេ សង្កាត់បឹងទំពុន២ ខណ្ឌមានជ័យ រាជធានីភ្នំពេញ ។
ក្នុងនោះដែរ សមត្ថកិច្ចក៏បានធ្វើការដកហូតវត្ថុតាងមកវិញ រួមមាន ៖ សម្ភារៈជាងគ្រប់ប្រភេទចំនួន១២៣កេស និង៥៦៧គ្រឿង ដូចជា ៖ ម៉ូទ័រឆាប, ម៉ូទ័រស្វាន, ម៉ូទ័រមីកាតិច, ម៉ូទ័រដោះប៉ូឡុងរថយន្ត, ម៉ូទ័រស្វានម៉ូលា, ម៉ូទ័រឈូស និងសម្ភារៈជាងផ្សេងៗទៀត ។
លោក ប៊ុន សត្យា បញ្ជាក់ទៀតថា ការស្រាវជ្រាវ និងចាប់ឃាត់ខ្លួនជនសង្ស័យជាមុខសញ្ញាលួចខាងលើនេះ គឺយោងតាមពាក្យបណ្តឹងរបស់ជនរងគ្រោះឈ្មោះ លី ថៃហួត ភេទប្រុស អាយុ៣៨ឆ្នាំ មុខរបរជាពាណិជ្ជករ (ថៅឃ្លាំងសម្ភារៈ) មានទីលំនៅផ្ទះលេខ៤៦ អាអឺ០អឺ១ ផ្លូវលេខ៣៣៨ ស្ថិតក្នុងភូមិ៤ សង្កាត់ទួលស្វាយព្រៃ១ ខណ្ឌបឹងកេងកង រាជធានីភ្នំពេញ ។
ដោយមានការចង្អុលបង្ហាញពីលោកឧត្តមសេនីយ៍ឯក ស ថេត អគ្គស្នងការរង ជាស្នងការនគរបាលរាជធានីភ្នំពេញ និងលោកឧត្តមសេនីយ៍ទោ សុង លី ស្នង ការរងទទួលផែនកណ្តាលនគរបាលយុត្តិធម៌ ក្រោមការសម្របសម្រួលពីស្ថាប័នអយ្យការអមសាលាដំបូងរាជធានីភ្នំពេញផងដែរ។
សូមជម្រាបថា អំពើលួចខាងលើនេះ បានកើតឡើងកាលពីខែមិថុនា ឆ្នាំ២០២២ រហូតដល់ថ្ងៃទី០៥ ខែតុលា ឆ្នាំ២០២២ រាល់ថ្ងៃឲ្យតែរំលងអធ្រាត្រ ពាក់កណ្តាលយប់ គឺឈ្មោះ រ៉ែន សៅ (អ្នកគ្រប់គ្រងឃ្លាំង) បានបញ្ជាឲ្យបក្សពួករបស់ខ្លួនធ្វើសកម្មភាព ខ្លះឡើងតាមរបងចំហៀង ខ្លះចូលតាមប្រឡោះជញ្ជាំងឃ្លាំងដាក់សម្ភារៈ ដែលថៅកែ លី ថៃហួត មិននៅ និងបានបិទទ្វារចាក់សោត្រឹមត្រូវ ហើយលួចយកសម្ភារៈជាងគ្រប់ប្រភេទនោះ ។
លុះថ្ងៃទី០៥ ខែតុលា ឆ្នាំ២០២២ ជនរងគ្រោះឈ្មោះ លី ថៃហួត ទើបបានទទួលព័ត៌មានពីអតិថិជនរបស់ខ្លួនថា មានគេកាត់ស្តុកសម្ភារៈជាងតម្លៃពិសេសៗ ហើយយកមកលក់បន្តឲ្យអតិថិជនដល់ទីផ្សារទៀតផង។ ពេលទទួលបានព័ត៌មាននេះភ្លាម ជនរងគ្រោះក៏បានធ្វើការស្រាវជ្រាវ ទើបដឹងថា សម្ភារៈជាងទាំងអស់ ដែលគេកាត់លក់លើទីផ្សារនោះ គឺជារបស់ខ្លួនតែម្តង ដូច្នោះថៅកែឃ្លាំងហៅឈ្មោះ រ៉ែន សៅ ជាអ្នកគ្រប់គ្រងសម្ភារៈជាងគ្រប់ប្រភេទ ទៅធ្វើការសាកសួរ ទើបឈ្មោះ រ៉ែន សៅ សារភាពថា «ខ្លួននិងបក្សពួក ពិតជាសហការគ្នាលួចសម្ភារៈជាងគ្រប់ប្រភេទទាំងអស់នោះមែន ហើយនៅពេលលួចបាន ក៏នាំគ្នាយកទៅលក់បានប្រាក់មកចែកគ្នាចាយវាយរៀងៗខ្លួនទៅ»។
ដោយយោងទៅលើពាក្យបណ្តឹង និងចម្លើយសារភាព រួមជាមួយវត្ថុតាងចាប់យកគ្រប់គ្រាន់ហើយ សមត្តកិច្ចកសាងសំណុំរឿងបញ្ជូនជនសង្ស័យទាំង៨នាក់ទៅសាលាដំបូងរាជធានីភ្នំពេញ តាមនីតិវិធី៕
ចែករំលែកព័តមាននេះ