ករណីគ្រោះថ្នាក់ចរាចរណ៍២កន្លែងផ្សេងគ្នា បណ្ដាលឲ្យមនុស្សស្លា.ប់២នាក់របួស២នាក់
ខេត្តរតនគិរី ៖ ករណីគ្រោះថ្នាក់ចរាចរណ៍ចំនួន២លើកបណ្តាលឲ្យស្លា.ប់ពីរនាក់ និងរបួសធ្ងន់ពីរនាក់ ហេតុការណ៍គ្រោះថ្នាក់ចរាចរណ៍ទី១នៅស្រុកលំផាត់
ខេត្តរតនគិរី ៖ ករណីគ្រោះថ្នាក់ចរាចរណ៍ចំនួន២លើកបណ្តាលឲ្យស្លាប់ពីរនាក់ និងរបួសធ្ងន់ពីរនាក់ ហេតុការណ៍គ្រោះថ្នាក់ចរាចរណ៍ទី១នៅស្រុកលំផាត់ បានកើតឡើងនៅថ្ងៃទី២៤ ខែមីនា ឆ្នាំ២០១៧ វេលាម៉ោង៤ទាបភ្លឺ ចំណុចគ្រោះថ្នាក់ព្រំប្រទល់ខេត្តរតនគិរី-មណ្ឌលគិរី លើផ្លូវជាតិលេខលេខ៧៨ ចំណុចអូរល្វាក់ ក្នុងភូមិជ័យឧត្តម ឃុំជ័យឧត្តម ស្រុកលំផាត់។ បើតាមប្រភពព័ត៌មានពីប្រជាពលរដ្ឋដែលរស់នៅតំបន់នោះបានឲ្យដឹងថា នៅមុនពេលកើតហេតុ ពួកគាត់បានឃើញរថយន្តម៉ាកសាំយ៉ុងពណ៌ស ១គ្រឿងបានដឹកឈើប្រណីតពេញ ចេញពីស្រុកកោះញែកឆ្ពោះមកខេត្តរតនគិរី ជិះគ្នាពីរនាក់ក្នុងរថយន្តដែលគ្មានស្លាកលេខមកដល់ចំណុចកើតហេតុស្រាប់តែបែកកង់មុខខាងធ្វេងបណ្តាលឲ្យក្រឡាប់៤-៥ត្រឡប់។
រថយន្តខ្ទេចអស់តែម្តង និងមានមនុស្សស្លាប់ភ្លាមៗក្នុងរថយន្តម្នាក់ និងម្នាក់ទៀតរងរបួសធ្ងន់ ក្រោយមកទៀតមានម្ចាស់រថយន្ត និងម្ចាស់ឈើបានមកដល់កន្លែងកើតហេតុ និងជួលកម្មករឲ្យលើកឈើដាក់រថយន្តផ្សេងទៀតព្រមទាំងអ្នករបួសឆ្ពោះមកខេត្តរតនគិរីបាត់។ ទាក់ទិននឹងហេតុការណ៍នេះសារព័ត៌មានយើងបានទូរស័ព្ទជាច្រើនលើកទៅលោក និមល អធិការរងស្រុកលំផាត់ ទទួលបន្ទុកចរាចរណ៍ តែគ្មានអ្នកលើកទើបអ្នកសារព័ត៌មាន មិនអាចសុំព័ត៌មានលម្អិតពីសមត្ថកិច្ចបានតើអ្នកស្លាប់ អ្នករងរបួស និងម្ចាស់ឡាន និងឈើប្រណីតយកទុកទីណានោះទេ នេះជាគ្រោះថ្នាក់ចរាណ៍មួយយ៉ាងអាថ៌កំបាំង។
ដោយឡែកស្រុកអូរយ៉ាដាវវិញមានគ្រោះថ្នាក់ចរាចណ៍១ បានកើតឡើងនៅថ្ងៃទី២៣ ខែមីនា ឆ្នាំ២០១៧ វេលាម៉ោង៦និង២០នាទីល្ងាច លើផ្លូវជាតិលេខ៧៨ ស្ថិតក្នុងភូមិអ៊ុន ឃុំអន្លុងជ័រ ស្រុកអូរយ៉ាដាវ ដោយមានរថយន្តមួយគ្រឿងម៉ាកវីហ្គូល ពណ៌សដែលមិនចាំស្លាកលេខបានបុកបុរសម្នាក់កំពុងដើរលើផ្លូវជាតិស្របទិសគ្នាបណ្តាលឲ្យរងរបួសធ្ងន់ដេកស្តូកស្លាប់នៅកន្លែងកើតហេតុ និងរថយន្តរេចង្កូតទៅបុកម៉ូតូ១គ្រឿងទៀត ដែលបើកបញ្ច្រាសទិសគ្នាបណ្តាលឲ្យរងរបួសធ្ងន់។
ក្នុងហេតុការណ៍នេះបើតាមប្រជាពលរដ្ឋបានឃើញហេតុការផ្ទាល់បានឲ្យដឹងថា នៅមុនពេលកើតហេតុពួកគាត់បានឃើញរថយន្តម៉ាកខាងលើបើកមកពីទិសខាងកើតស្រាប់តែមកដល់កន្លែងកើតហេតុបានបុកបុរសម្នាក់ដើរតាមផ្លូវ បណ្តាលឲ្យរងរបួសធ្ងន់បើតាមស្ថានភាពបុរសឡានបុកសង្ឃឹមរស់តិចណាស់ព្រោះបុរសនោះបានបែកមុខខ្ទេចហូរឈាមតាមមាត់ រីឯអ្នកជិះម៉ូតូម៉ាកសង់កូរ៉េសេ១០០ ពណ៌ខ្មៅ ពាក់ស្លាកលេខកោះកុង 1B-0899 ជិះម្នាក់ឯងពេលរថយន្តបុកម៉ូតូ ម៉ូតូក៏រេចង្កូតទៅបុកគូថរថយន្តម៉ាកកាមរីបាឡែនពណ៌ទឹកប្រាក់ ពាក់ស្លាកលេខភ្នំពេញ 2I-8827 របស់លោក កុសល ជាមេបញ្ជាការរងកងរាជអាវុធហត្ថស្រុកអូរយ៉ាដាវ ដែលរថយន្តចតនៅស្ងៀមបណ្តាលឲ្យក្រពិតគូថខាងក្រោយ។
ក្នុងហេតុការណ៍គ្រោះថ្នាក់ចរាចរណ៍នៅស្រុកអូរយ៉ាដាវនេះ សារព័ត៌មានយើងបានសុំការបំភ្លឺពីសមត្ថកិច្ចកងរាជអាវុធហត្ថ និងនគរបាល ក៏ប៉ុន្តែខាងសមត្ថកិច្ចថាមិនទាន់បានស្គាល់ឈ្មោះនោះទេ មូលហេតុបងប្អូនជនរងគ្រោះបានដឹកអ្នករងរបួសទៅភ្នំពេញទាំងយប់៕
ចែករំលែកព័តមាននេះ