របាំគងស្គរ គឺជារបាំតាំងពីបុរាណកាលរបស់អ្នកភូមិឯលិច (វីដេអូ)
- កំពង់ឆ្នាំង
របាំគងស្គរ គឺជារបាំមួយប្រភេទ ដែលបានកើតឡើងតាំងពីបុរាណកាល របស់អ្នកភូមិឯលិច ឃុំច្រណូក ស្រុកកំពង់លែង ខេត្តកំពង់ឆ្នាំង
ខេត្តកំពង់ឆ្នាំង ៖ របាំគងស្គរ គឺជារបាំមួយប្រភេទ ដែលបានកើតឡើងតាំងពីបុរាណកាល របស់អ្នកភូមិឯលិច ឃុំច្រណូក ស្រុកកំពង់លែង ខេត្តកំពង់ឆ្នាំង។
បើតាមលោក សុខ ធួក ប្រធានមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង បានឲ្យដឹងថា ដើម្បីបំផុសសិល្បៈមហាជន និងចង់ថែរក្សារបាំបុរាណ ដែលជាមរតកមនុស្សរស់ ឱ្យបានគង់វង្ស និងមានទម្រង់ត្រឹមត្រូវតាមក្បួនខ្នាត នៅរសៀលថ្ងៃទី១៣ ខែតុលាឆ្នាំ ២០២២ លោកបានដឹកនាំមន្ត្រីជំនាញទៅភូមិឯលិច ឃុំច្រណក ដើម្បីឲ្យក្រុមអ្នករាំរបាំទាំងនោះ សម្ដែងឲ្យមន្ត្រីនៃមន្ទីរវប្បធម៌ និងវិចិត្រសិល្បៈទស្សនា ក្នុងគោលបំណងកែលម្អ ការសម្ដែងឲ្យបានត្រឹមត្រូវតាមក្បួនខ្នាត។
ប្រធានមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង បានបន្តថា របាំគងស្គរ គឺជារបាំមួយដែលកើតមានតាំងពីសម័យបុរាណកាល ហើយប្រជាពលរដ្ឋអ្នកភូមិឯលិច បានថែរក្សាប្រពៃណីនេះ រហូតដល់បច្ចុប្បន្ន គ្រាន់តែខុសទម្រង់ខ្លះ ដោយសារតែវាមានភាពយូរអង្វែង។
ទោះបីជាយ៉ាងនេះក្តី របាំគងស្គរ ត្រូវបានប្រជាពលរដ្ឋ អ្នកភូមិឯលិច សម្ដែងជារៀងរាល់ឆ្នាំ នៅក្នុងថ្ងៃ១៤ និងថ្ងៃទី១៥ កើតខែផល្គុន ក្នុងពិធីបុណ្យឡើងភ្នំ ពណ្ណរាយ។ ក្រៅពីគោរពវិធីឡើងភ្នំពណ្ណរាយ ក៏ត្រូវបានអ្នកស្រុកយកទៅសម្ដែងសម្រាប់លាបំណន់ សុំសេចក្តីសុខ និងឧទ្ទិសថ្វាយដល់ទសបារមី ជាដើមផងដែរ។
ហើយចំពោះ ឧបករណ៍របស់ របាំគងស្គរ មានដូចជា ស្ករធំ ស្ករដៃ ទ្រ គង និងកញ្ចែ ដែលមានអ្នកសម្ដែង និងអ្នកប្រគំភ្លេងប្រមាណ១០នាក់ឯណោះ៕
ចែករំលែកព័តមាននេះ