ប៉ូលិសអង់គ្លេសរាយការណ៍កាលពីថ្ងៃទី២៣ មីនា ថា ជនវាយប្រហារដែលសម្លាប់មនុស្ស៤នាក់ ហើយធ្វើឱ្យមនុស្ស៤០នាក់ទៀតរងរបួស កាលពីថ្ងៃទី២២ មីនា នៅទីក្រុងឡុងដ៍ ប្រកាសទទួលខុសត្រូវដោយក្រុមរដ្ឋអ៊ិស្លាមជាបុរសជនជាតិអង់គ្លេសម្នាក់អាយុ៥២ឆ្នាំ មានឈ្មោះថា KHALID MASOOD ។
ប៉ូលិសគូសបញ្ជាក់ថា MASOOD កើតថ្ងៃទី២៥ ធ្នូ ឆ្នាំ១៩៦៤ នៅទីក្រុង KENT ភាគអាគ្នេយ៍អង់គ្លេស ហើយទើបមករស់នៅតំបន់ WEST MIDLANDS ភាគកណ្តាលប្រទេស មកទល់ពេលនេះពុំមែនជាកម្មវត្ថុនៃការស៊ើបអង្កេតណាមួយឡើយ ។ បណ្តាភ្នាក់ងារស៊ើបការណ៍ពុំមានភស្តុងតាងពីចេតនារបស់គេធ្វើការវាយប្រហារភេរវកម្មមួយឡើយ ។
កាលពីយប់ថ្ងៃទី២៣ មីនា មនុស្សជាច្រើនរយនាក់បានប្រមូលផ្តុំគ្នានៅទីលាន TRAFALGAR SQUARE នាកណ្តាលក្រុងឡុងដ៍ ដើម្បីគោរពវិញ្ញណក្ខន្ធជនរងគ្រោះ ។
កាលពីថ្ងៃទី២២ មីនា KHALID MASSOOD បានបើករថយន្តរបស់គេបំបុកមនុស្សម្នាលើស្ពាន WESTMINSTER ទល់មុខ BIG BEN ដោយសម្លាប់មនុស្ស២នាក់នៅទីនោះគឺជនជាតិអាមេរិកម្នាក់ និងនារីអង់គ្លេសដើមកំណើតអេស្ប៉ាញម្នាក់ ហើយធ្វើឱ្យរបួសមនុស្សច្រើនសិបនាក់ ។ ជនវាយប្រហារបន្ទាប់មកបានចាក់សម្លាប់ប៉ូលិសម្នាក់ ក្រោយពីរូបគេអាចលុកចូលក្នុងបរិវេណសភា ហើយក្រោយមកត្រូវប៉ូូលិសម្នាក់បាញ់សម្លាប់ ។ បុរសអាយុ៧៥ឆ្នាំម្នាក់ស្លាប់នាថ្ងៃទី២៣ មីនា ព្រោះរបួសធ្ងន់ពេក ធ្វើឱ្យចំនួនអ្នកស្លាប់ឡើងដល់៤នាក់ ។
ទីភ្នាក់ងារព័ត៌មានឃោសនាក្រុមរដ្ឋអ៊ិស្លាម AMAQ អះអាងថា អ្នកវាយប្រហារនៅក្រុងឡុងដ៍ជាទាហានម្នាក់របស់ក្រុមគេ ហើយប្រតិបត្តិការរបស់ជននេះ ធ្វើឡើងជាការឆ្លើយតបចំពោះការអំពាវនាវដល់ពួកជីហាដឱ្យវាយប្រហារក្នុងបណ្តាប្រទេសនៃក្រុមចម្រុះអន្តរជាតិប្រឆាំងជីហាដនាំមុខដោយសហរដ្ឋអាមេរិក ដែលធ្វើអន្តរាគមន៍យោធានៅស៊ីរី និងអីុរ៉ាក់ ។ នេះជាការវាយប្រហារលើកដំបូងលើទឹកដីអង់គ្លេសប្រកាសទទួលដោយក្រុមរដ្ឋអ៊ិស្លាម ។
ក្រោយការវាយប្រហារនេះ ប៉ូលិសអង់គ្លេសចាប់ខ្លួនមនុស្ស៨នាក់មានអាយុពី២១ទៅ៥៨ឆ្នាំ នៅកន្លែង៦ផ្សេងគ្នា ៕
ចែករំលែកព័តមាននេះ