ភូមិភាគ5កម្ពុជាទទួលស្វាគមន៍ប្រតិភូកងទ័ពជើងទឹកចន្ទបូរី-ត្រាត
ខេត្តបាត់ដំបង ៖ រសៀលថ្ងៃទី៧ ខែមីនា នៅបញ្ជាការដ្ឋានយោធភូមិភាគទី៥ លោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក
ខេត្តបាត់ដំបង ៖ រសៀលថ្ងៃទី៧ ខែមីនា នៅបញ្ជាការដ្ឋានយោធភូមិភាគទី៥ លោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៥ បានទទួលស្វាគមន៍ប្រតិភូកងទ័ពជើងទឹកចន្ទបូរី-ត្រាតចំនួន៤០រូប ដឹកនាំដោយលោកឧត្តមនាវីទោ រតនៈ វង្សារ៉ូត មេបញ្ជាការកងទ័ពការពារព្រំដែនចន្ទបូរី-ត្រាត ដើម្បីពង្រឹងសម្ព័ន្ឋមេត្រីភាពរវាងកងទ័ពថៃតាមព្រំដែន និងកងកម្លាំងយោធភូមិភាគទី៥ ។
ចូលរួមនាឱកាសនោះ ភាគីកម្ពុជាមាន៤០រូប ដែលមានមេបញ្ជាការរងនិងមេបញ្ជាការមកពីតាមបណ្តាអង្គភាពឈរជើងតាមខ្សែបន្ទាត់ព្រំដែនចំណុះយោធភូមិភាគទី៥ ។
លោកឧត្តមសេនីយ៍ឯក ប៊ុន សេង បានថ្លែងថា កិច្ចសហប្រតិបត្តការរួមគ្នារវាងកងទ័ពកម្ពុជា-ថៃប្រមាណជិត២០ឆ្នាំមកនេះ គឺមានភាពល្អប្រសើរឡើងហើយ តែសុំឲ្យខាងភាគីថៃមេត្តាយោគយល់កុំប្រើអំពើហិង្សាទៅលើពលករដែលលួចចូលដោយខុសច្បាប់ ។ បើមានបញ្ហាអ្វីសូមឲ្យសម្រួលដោះស្រាយត្រឹមថ្នាក់តំបន់បានហើយ ចៀសវាងការរំខានដល់រាជរដ្ឋាភិបាលនៃប្រទេសទាំង២ ។ ជាមួយនេះ ក៏សុំឲ្យមានការផ្លាស់ប្តូរទស្សនកិច្ចសិក្សាពីគ្នាទៅវិញទៅមក ដើម្បីពង្រឹងផលប្រយោជន៍ឲ្យមានដូចៗគ្នាទាំងសងខាង ។
ចំណែកភាគីថៃ លោកឧត្តមនាវីទោ រតនៈ វង្សារ៉ូត បានសូមឱ្យជួយផ្សព្វផ្សាយដល់ប្រជាជនកម្ពុជា ត្រូវប្រយ័ត្នកុំឲ្យចាញ់បោកមេខ្យល់ថៃនាំពលករទៅធ្វើការក្នុងប្រទេសថៃដោយខុសច្បាប់ ។ លោកបានពាំនាំតាមបទបញ្ជារបស់រាជរដ្ឋាភិបាល ឲ្យពង្រឹងសុខសន្តិភាពជារួមដល់ប្រជាជនរវាងប្រទេសទាំងពីរឲ្យកាន់តែល្អឡើងថែមទៀត ហើយពង្រឹងកិច្ចសហប្រតិបត្តិការរួមគ្នាទប់ស្កាត់រាល់បទល្មើសបានល្អ ដោយមានការសរសើរពីស្ថានទូត និងរាជរដ្ឋាភិបាលផងដែរ ។ ដូច្នេះ សុំនាំគ្នាពង្រឹងកិច្ចសហប្រតិបត្តិការរួមគ្នាជាបន្តទៀត ។
ប្រតិភូកងទ័ពជើងទឹកថៃ បានសូមខាងភាគីកម្ពុជាដែលចេញចូលនៅច្រកដូង ក្នុងស្រុកកំរៀង សូមឲ្យមានការគោរពពេលវេលានៃការបើកច្រកចេញចូលឲ្យបានត្រឹមត្រូវផងដែរ ដើម្បីចៀសវាងបង្កការលំបាកដល់សមត្ថកិច្ចទាំងសងខាង គឺគោរពទៅតាមការឯកភាពគ្នាកន្លងមក ៕
ចែករំលែកព័តមាននេះ