រាជធានីភ្នំពេញ ៖ ប្រាកដណាស់ ព្រោះតែមនោសញ្ចេតនារាប់អានទើបអ្នកព្រមឱ្យមិត្តភក្តិ ឬបងប្អូនខ្ចីលុយយកទៅប្រើប្រាស់ដោយសង្ឃឹមថា អ្នកខ្ចីលុយនឹងប្រញាប់សងមកវិញ ក្រោយពេលដែលដោះស្រាយបញ្ហារួចរាល់។ក៏ប៉ុន្តែករណីខ្លះខ្ចីស្រួលតែសងពិបាក។ ដូច្នេះមកដល់ពេលនេះ ហ្វេសប៊ុកបានក្លាយជាវេទិកាដ៏ពេញនិយមបំផុត។អ្នកខ្លះជេរបរិហារគ្នាហែករឿងឈ្លោះទាស់ទែងរវាងប្តីប្រពន្ធ និងដៃគូរកស៊ីប្រជែង…
រាជធានីភ្នំពេញ ៖ ប្រាកដណាស់ ព្រោះតែមនោសញ្ចេតនារាប់អានទើបអ្នកព្រមឱ្យមិត្តភក្តិ ឬបងប្អូនខ្ចីលុយយកទៅប្រើប្រាស់ដោយសង្ឃឹមថា អ្នកខ្ចីលុយនឹងប្រញាប់សងមកវិញ ក្រោយពេលដែលដោះស្រាយបញ្ហារួចរាល់។ក៏ប៉ុន្តែករណីខ្លះខ្ចីស្រួលតែសងពិបាក។
ដូច្នេះមកដល់ពេលនេះ ហ្វេសប៊ុកបានក្លាយជាវេទិកាដ៏ពេញនិយមបំផុត។អ្នកខ្លះជេរបរិហារគ្នាហែករឿងឈ្លោះទាស់ទែងរវាងប្តីប្រពន្ធ និងដៃគូរកស៊ីប្រជែង ពិសេសអ្នកលក់ឡេពេលបែកបាក់ប្តីប្រពន្ធហែកកេរ្តិ៍គ្នាពេញបណ្តាញសង្គម។ក្រៅពីនោះក៏មានអ្នកលេងហ្វេសប៊ុកខ្លះ រួមទាំងអ្នកសិល្បៈជាដើម បានបង្ហោះពេញហ្វេសប៊ុករឿងខ្ចីលុយគ្នាមិនសង។
ជាក់ស្តែងករណី តារាស្រីស្រស់ នាង ជេស៊ីការ ឈ្មោះពិត តាន់ សុផា បានប្រកាសក្ដែងៗលើបណ្ដាញសង្គមឱ្យតារាសម្តែងស្រីជើងចាស់ និងជាម្ចាស់ផលិតកម្ម PR គឺអ្នកនាង ព្រំ រដ្ឋា ឱ្យចូលខ្លួនដោះស្រាយរឿងលុយជំពាក់។ចំណែកករណីមួយទៀត គឺតារាស្រីសិចស៊ីនាងកញ្ញាអៀ ម៉េងលី ហៅអូនម៉ី ថ្មីនេះក៏បានប្រើបាស់បណ្តាញសង្គមហ្វេសប៊ុកជាវេទិកា ដើម្បីបង្ហោះសារទារលុយអ្នកដែលជំពាក់បំណុលរបស់នាង។ដោយក្នុងនោះស្រីស្អាតសាច់សខ្ចី អៀ ម៉េងលី បានពោលថា នាងបង្ខំចិត្តបង្ហោះមុខអ្នកជំពាក់លុយនាង ជាង៨ម៉ឺនដុល្លារ និងសម្ភារៈផ្សេងទៀតដោយសារតែអស់ការអត់ធ្មត់ និងទាក់ទងអ្នកជំពាក់មិនបាន។
ក្រៅពីអ្នកសិល្បៈក៏មានអ្នកលេងហ្វេសប៊ុកច្រើនទៀតបានបង្ហោះសារថា បុគ្គលនេះបុគ្គលនោះខ្ចីលុយមិនសងបុគ្គលនេះគេចវេសមិនសងលុយគ្រប់រូបភាពទើបគេ(ម្ចាស់លុយ) មិនមានជម្រើសក៏សម្រេចបង្ហោះហ្វេសប៊ុកតែម្តង។
ដូច្នេះក្នុងសង្គមខ្មែរយើងមួយរយៈចុងក្រោយនេះបែរជាយកបណ្តាញសង្គមហ្វេសប៊ុកជាទីកន្លែង ឬវេទិកាដែលម្ចាស់លុយបង្ហោះបង្ហាញមុខអ្នកខ្ចីលុយមិនសង។ករណីនេះចូលដល់វគ្គ«ទៀងមិនឈ្នះទ័ល»។ខ្ចីស្រួលសងពិបាក។ពេលខ្ចីសម្តីផ្អែម តែដល់ពេលម្ចាស់លុយតាមទារលុយមកវិញប្រែជាសម្តីជូរចត់ដាក់ម្ចាស់លុយទៅវិញ។
ដោយពិត បើខ្ចីគេត្រូវសងគេ ព្រោះជាកម្លាំងញើសឈាមគេ។កុំខ្ចីគេ យកមកហ៊ឺហារ ហើយមិនសងគេ ឬក៏ខ្ចីគេយកមកទិញសម្ភារៈទំនើប តែងខ្លួនឬលេងល្បែងស៊ីចាយដល់ចុងក្រោយគេចវេសមិនសងគេ។អ្នកមានលុយឱ្យគេខ្ចីក៏ត្រូវមើលផង។បើគេខ្ចីយកទៅរកស៊ី ហើយមានរបស់បញ្ចាំ និងស៊ើបប្រវត្តិផងចាំឱ្យខ្ចីដើម្បីកុំឱ្យប្រាក់ក៏បង់ថង់ក៏ដាច់ ព្រោះ គឺបាត់ទាំងដើមទាំងការ។
ម្យ៉ាងទៀត បើជាបងប្អូន និងមិត្តភក្តិ បើជៀសបានគួរតែជៀសវាងរឿងខ្ចីលុយ។និយាយដូច្នេះ មិនមែនឱ្យអ្នកមានលុយមានទ្រព្យក្នុងត្រកូលគ្រួសារនីមួយៗ ឬក៏មិត្តភក្តិអ្នករាប់អានគ្នាមានចិត្តឃើញបងប្អូន និងមិត្តភក្តិជួបអាសន្នអន់ក្រហើយមិនជួយយកអាសារគ្នានោះទេ។ពោលគឺបើជាពិសោធន៍ក្នុងសង្គមខ្មែរយើងនៅពេលបងប្អូនខ្ចីលុយគ្នា បើសិនជាអ្នកខ្ចីនោះទៀងត្រង់ ខ្ចីហើយសងវិញគ្រប់ចំនួន គឺមិនជាអ្វីទេ។ផ្ទុយទៅវិញភាគច្រើនពេលខ្ចីលុយផ្អែមល្ហែម តែនៅពេលបានលុយហើយដល់ថ្ងៃកំណត់ត្រូវសងវិញ គឺបងប្អូនដែលឱ្យលុយខ្ចីនោះ ឬក៏មិត្តភក្តិនោះនឹងត្រូវឈ្លោះគ្នា ដោយសារតែអ្នកខ្ចីមិនមានលុយសង។
ដូច្នេះករណីបងប្អូន និងមិត្តភក្តិនេះ បើសិនជាទុកមុខរាប់អានគ្នាបានយូរអង្វែង គឺរឿងលុយកាក់នេះកុំខ្ចីគ្នាតែម្តង។តែបើទាល់ខ្លាំង អ្នកខ្ចី ត្រូវតែទៀងត្រង់ ពោល គឺខ្ចីប៉ុន្មានកំណត់ត្រឹមថ្ងៃណា គឺត្រូវតែសងគ្រប់ចំនួន និងតាមកាលកំណត់នោះទើបមិត្តភាពរវាងមិត្តភក្តិ និងបងប្អូនមិនឈ្លោះគ្នាហើយបន្តល្អូកល្អឺនបានយូរអង្វែង។
មួយវិញទៀត ជាបងប្អូន និងជាមិត្តភក្តិ បើសិនជាម្ចាស់លុយមានលទ្ធភាពប៉ុន្មានត្រូវឱ្យដាច់តែម្តង។ពោល គឺជៀសវាងឱ្យខ្ចី។ ដូចជា បើសិនជាប្អូន ឬក៏បងមិត្តភក្តិត្រូវការលុយបន្ទាន់១០០០ដុល្លារ តែយើងម្ចាស់លុយមានលទ្ធភាពត្រឹមប៉ុន្មានរយនោះសម្រេចថា ឱ្យបង ឱ្យប្អូន ឬក៏ឱ្យមិត្តភក្តិនោះដាច់តែម្តង ហើយជួយគិតគ្នារកមធ្យោបាយ ដើម្បីដោះស្រាយបញ្ហា ដែលបងប្អូន ឬមិត្តភក្តិ ត្រូវការលុយយកទៅប្រើប្រាស់នោះ។ក្នុងនាមជាបងប្អូន និងជាមិត្តភក្តិល្អនឹងគ្នាយើងត្រូវរួមសុខរួមទុក្ខនឹងគ្នា។បើសិនជាមិត្តភក្តិ ឬបងប្អូនណាមានលទ្ធភាពធូរធារក៏ត្រូវជួយមិត្តភក្តិ ឬបងប្អូននោះទៅតាមលទ្ធភាព ហើយចូលរួមគិត និងស្វែងរកដំណោះស្រាយលើបញ្ហាដែលបងប្អូន និងមិត្តភក្តិនោះជួបប្រទះ។
ដោយឡែក សម្រាប់អ្នកស្គាល់រាប់អានគ្នា បើត្រូវការខ្ចីលុយកាក់ក៏ត្រូវតែមានលិខិតស្នាមច្បាស់លាស់ ហើយបើអាចមានរបស់បញ្ចាំជៀសវាងអ្នកខ្ចីក្លាយជាទុំ គឺខ្ចីមិនសង។ទោះជាអ្នកខ្ចី មិនសងក៏អ្នកឱ្យខ្ចីជាម្ចាស់លុយមានរបស់សម្រាប់កាត់កងកុំឱ្យបាត់បង់ទាំងលុយ ហើយបាត់បង់ទាំងមិត្តភាព និងខាតពេលឈ្លោះទាស់ទែងគ្នាថែមទៀត។
តែបើយកល្អអ្នកមានលុយ ឬមានរបស់ឱ្យគេខ្ចីគួរតែកុំប្រកបរបរចងការប្រាក់ ព្រោះតែចង់បានការប្រាក់គេ។កន្លងមក អ្នកមានលុយចងការប្រាក់មិនតិចទេ ត្រូវអ្នកខ្ចីបោកប្រាស់ពិសេសស្ថាប័នធំៗមួយចំនួនហ៊ានឱ្យការប្រាក់ថ្លៃៗ តែចុងក្រោយម្ចាស់លុយត្រូវចាញ់បោកគេអស់រាប់ពាន់ចូលខ្ទង់ម៉ឺនដុល្លារ ដោយសារតែចង់ស៊ីការប្រាក់គេនេះ។
ងាកមកសម័យហ្វេសប៊ុកនេះវិញពិសេសអ្នកសិល្បៈមិនមានអ្វីក្រៅតែពីអស់ទាំងលុយហើយអស់ទាំងមិត្តភាព និងខាតទាំងពេលព្រោះតែរឿងឱ្យខ្ចីលុយចង់បានការប្រាក់នេះឯង។អ្នកខ្ចីលុយគេក៏ត្រូវតែថ្លៃថ្នូរ។ បើខ្ចីមិនសងដូច្នេះ ថ្ងៃក្រោយខ្ចីនរណាបានទៀត ហើយត្រូវម្ចាស់លុយ ហែកកេរ្តិ៍ពេញហ្វេសប៊ុកថែមទៀត។បើខ្ចីធនាគារ ឬមីក្រូហិរញ្ញវត្ថុវិញ តើអ្នកខ្ចីហ៊ានមិនសងលុយធនាគារ និងមីក្រូហិរញ្ញវត្ថុឬទេ? បើមិនបង់លុយសងតាមកាលកំណត់ទេច្បាស់ណាស់ អ្នកខ្ចីនឹងត្រូវផាកពិន័យ ហើយចុងក្រោយនឹងត្រូវគេរឹបអូសយកផ្ទះយកដី ឬរបស់របរ ដែលដាក់បញ្ចាំជាមិនខាន៕
ចែករំលែកព័តមាននេះ