រាជធានីភ្នំពេញ ៖ បុរសអ្នកលក់ផ្លែមានម្នាក់បានប្រើកន្ត្រៃចាក់ទៅលើបុរសម្នាក់ទៀត ដែលជាអ្នកហៅម៉ូយដាក់រថយន្តឈ្នួល ចំពីក្រោយត្រង់ផុតលិច១កន្ត្រៃ ព្រោះតែទំនាស់គ្នាបន្តិចបន្តួចប៉ុណ្ណោះហើយ បណ្ដាលឲ្យរងរងរបួសយ៉ាងធ្ងន់ធ្ងរដួលដេកនៅនឹងកន្លែង និងត្រូវបានគេបញ្ជូនទៅកាន់មន្ទីរពេទ្យព្រះកុសុមៈ ដើម្បីសង្គ្រោះបន្ទាន់។ ចំណែកឯជនដៃដល់ខាងលើនោះ ត្រូវបានកម្លាំងប្រជាការពារភូមិ រួមជាមួយប្រជាពលរដ្ឋនាំគ្នាចាប់ខ្លួនបាន និងបាននាំទៅប្រគល់ឲ្យនគរបាលប៉ុស្ដិ៍ចោមចៅ ដើម្បីសួរនាំ និងកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមច្បាប់។
ហេតុការណ៏នោះបានកើតឡើងកាលពីវេលាម៉ោង៨ព្រឹក ថ្ងៃទី២០ ខែមីនា ឆ្នាំ២០១៧ នៅតាមផ្លូវជាតិលេខ៣ ស្ថិតនៅក្នុងភូមិព្រៃព្រីងត្បូង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
ជនបង្កឈ្មោះ ទី សុវណ្ណ ហៅហ៊ិន សុវណ្ណ អាយុ៤៥ឆ្នាំ មុខរបរលក់ផ្លែឈើ ស្នាក់នៅផ្ទះជួលក្នុងភូមិ ត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ និងមានស្រុកកំណើតនៅក្នុងភូមិព្រៃឃ្លោក ឃុំស្វាយ តាយារ ស្រុកកំពង់រោទិ៍ ខេត្តស្វាយរៀង។ ដោយឡែកបុរសរងគ្រោះឈ្មោះ សុះ វណ្ណៈ ហៅពេជ្រ អាយុ២៣ឆ្នាំ មុខរបរហៅម៉ូយដាក់រថយន្តឈ្នួល ស្នាក់នៅផ្ទះជួលភូមិចោមចៅ សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅក្នុងភូមិឧត្តមសូរិយា ឃុំស្រង៉ែ ស្រុកត្រាំកក់ ខេត្តតាកែវ។
បើតាមប្រភពព័ត៌មានបានឲ្យដឹងថា នៅមុនពេលកើតហេតុខាងលើ គេបានឃើញជនដៃដល់ និងជនរងគ្រោះជិះម៉ូតូម្នាក់១គ្រឿង ក្នុងទិសដៅពីជើងទៅត្បូង តាមផ្លូវជាតិលេខ៣ លុះពេលទៅដល់ត្រង់ចំណុចកើតហេតុមិនដឹងថា មានរឿងអ្វីកើតឡើងនោះឡើយ ស្រាប់តែឃើញបុរសអ្នកលក់ផ្លែមាននោះ ទាញកន្ត្រៃចាក់ទៅលើជនរងគ្រោះ បណ្ដាលឲ្យរងរបួសធ្ងន់តែម្ដង។ ខណៈនោះជនដៃដល់ប្រុងជិះម៉ូតូរត់គេចខ្លួន ប៉ុន្តែត្រូវបានកម្លាំងប្រជាការពារភូមិ និងប្រជាពលរដ្ឋដែលស្ថិតនៅក្បែរនោះ នាំគ្នាដេញតាមចាប់បានភ្លាមៗ និងបាននាំទៅប្រគល់ឲ្យនគរបាលប៉ុស្ដិ៍ចោមចៅ ដើម្បីសាកសួរ និងកសាងសំណុំរឿង។
ក្រោយពេលនាំទៅដល់ប៉ុស្ដិ៍នគរបាល ជនសង្ស័យបាននិយាយថា ខ្លួនពិតជាបានធ្វើសកម្មភាពចាក់ទៅលើជនរបគ្រោះ១កន្ត្រៃមែន ដោយសារជម្លោះគ្នា ហើយខ្លួន និងជនរងគ្រោះមិនដែលធ្លាប់មានទំនាស់គ្នាពីមុនមកទេ ហើយក៏មិនដែលមានទំនាស់ និងគំនុំជាមួយគ្នាពីមុនមកដែរ។
ដោយឡែកនៅថ្ងៃកើតហេតុ ខ្លួន និងជនរងគ្រោះបានជិះម៉ូតូក្នុងទិសដៅស្របគ្នាពីជើងទៅត្បូង ខណៈនោះខ្លួនបានប៉ះម៉ូតូជនរងគ្រោះបន្តិច ក៏ត្រូវបុរសរងគ្រោះជិះជែងទៅឈប់ស្ទាក់ផ្លូវពីមុខ ហើយបានរករឿងជេរ ព្រមទាំងចង់វាយតប់មកលើខ្លួនទៀត ទើបពេលនោះខ្លួនបានទាញយកកន្ត្រៃចាក់ការពារខ្លួនតែម្ដង។
ទាក់ទិនទៅនឹងរឿងរ៉ាវខាងលើនោះ ខាងសាច់ញាតិបុរសរងគ្រោះ បានឲ្យដឹងថា ពួកគាត់មិនបានដឹងថា រវាងបុររសរងគ្រោះ និងជនដៃដល់មានទំនាស់គ្នារឿងអ្វីនោះឡើយ គ្រាន់តែដឹងថា នៅមុនពេលកើតហេតុជនរងគ្រោះបានរៀបចំធ្វើដំណើរទៅកាន់ខេត្តកំពង់ធំ ប៉ុន្តែដោយសាររង់ចាំប្រពន្ធធ្វើដំណើរមកពីខេត្តតាកែវ ដើម្បីទៅទាំងអស់គ្នា ហើយប្រពន្ធមិនទាន់មកដល់គេ បានហៅម៉ូយដាក់រថយន្តឈ្នួលសិន ហើយបន្ទាប់មកក៏ស្រាប់តែមានទំនាស់ជាមួយជនដៃដល់ ហើយក៏ត្រូវបានជននោះចាក់ បណ្ដាលឲ្យរងរបួសធ្ងន់បែបនេះតែម្ដង៕
ចែករំលែកព័តមាននេះ