ខេត្តកំពង់ស្ពឺ ៖ មុខសញ្ញាជួញដូរថ្នាំញៀនម្នាក់ដែលសមត្ថកិច្ចទើបចាប់បញ្ជូនឱ្យតុលាការចាត់ការកាលពីពេលកន្លងទៅថ្មីៗនេះត្រូវចាប់ខ្លួនម្តងទៀតជាមួយថ្នាំញៀន១កញ្ចប់ធំ
ខេត្តកំពង់ស្ពឺ ៖ មុខសញ្ញាជួញដូរថ្នាំញៀនម្នាក់ដែលសមត្ថកិច្ចទើបចាប់បញ្ជូនឱ្យតុលាការចាត់ការកាលពីពេលកន្លងទៅថ្មីៗនេះត្រូវចាប់ខ្លួនម្តងទៀតជាមួយថ្នាំញៀន១កញ្ចប់ធំ ក្រោយឃាត់ខ្លួនសមត្ថកិច្ចបានកសាងសំណុំរឿងបញ្ជូនទៅកាន់សាលាដំបូងម្តងទៀតហើយរង់ចាំមើលថា តើលើកនេះគេមានវាសនាបានរួចផុតពីពន្ធនាគារលឿនដូចលើកមុនដែរ ឬយ៉ាងណា ។
ប្រភពពីសមត្ថកិច្ចស្រុកសំរោងទងបានឱ្យដឹងនៅព្រឹកថ្ងៃទី២០ ខែមីនា ឆ្នាំ២០១៧ ថាដើម្បីរក្សាបាននៅគោលនយោបាយភូមិ-ឃុំមានសុវត្តិភាពកាលពីវេលាម៉ោង១៤និង២០នាទីថ្ងៃទី១៩ ខែមិនា ឆ្នាំ២០១៧ នៅផ្លូវជាតិលេខ៤ភូមិវល្លិស ឃុំវល្លិស ស្រុកសំរោងទង ខេត្តកំពង់ស្ពឺ កម្លាំងកងរាជអាវុធហត្ថស្រុកសំរោងទង បង្ក្រាបមុខសញ្ញាគ្រឿងញៀន១ករណីដោយបានឃាត់ខ្លួនឈ្មោះ ហន ឃីម ភេទប្រុស អាយុ៣៤ឆ្នាំ រស់នៅភូមិស្រះស្រង់ ឃុំសែនដី ស្រុកសំរោងទង ខេត្តកំពង់ស្ពឺ ជាមុខសញ្ញាចាស់ ។
ក្នុងការឃាត់ខ្លួននេះដែរកម្លាំងសមត្ថកិច្ចបានដកហូតវត្ថុតាងរួមមាន ថ្នាំញៀន១កញ្ចប់ធំ ម៉ូតូDUKE ស្លាកលេខ 1CW-3919 និងទូរស័ព្ធ១គ្រឿង ។ នៅចំពោះមុខសមត្ថកិច្ចជនសង្ស័យបានឆ្លើយសារភាពថាថ្នាំញៀនដែលសមត្ថកិច្ចឆែករកឃើញនៅលើខ្លួនគេនេះគឺគេបានទិញពីមនុស្សម្នាក់នៅក្រុងភ្នំពេញ ។ ក្រោយឃាត់ខ្លួនសមត្ថកិច្ចបានកសាងសំណុំរឿងបញ្ជូនទៅកាន់បញ្ជាការដ្ឋានកងរាជអាវុធហត្ថខេត្ត ដើម្បីចាត់ការទៅតាមនីតិវិធី ។
ក្នុងការឃាត់ខ្លួនជនសង្ស័យជួញដូរថ្នាំញៀននេះផងដែរធ្វើឱ្យមហាជនមានការងឿងឆ្ងល់យ៉ាងខ្លាំងព្រោះជនម្នាក់នេះបើតាមដឹងគឺសមត្ថកិច្ចទើបតែចាប់ខ្លួនបានកាលពីពេលកន្លងទៅថ្មីៗនេះដោយបញ្ជូនទៅតុលាការហើយតុលាការបានបញ្ជូនទៅដាក់ពន្ធនាគាដើម្បីចាត់ការបន្តតែមិនបានប៉ុន្មានផង ស្រាប់តែចេញមកវិញហើយធ្វើសកម្មភាពជួញដូរថ្នាំញៀនលើសដើម ៕
ចែករំលែកព័តមាននេះ