មេធាវីចូលក្លិបខារ៉ាអូខេ ប៉ះជើងខ្លាំងដើរបុកគ្នា ទាត់ធាក់ដាល់ខៀវភ្នែក
ខេត្តព្រះសីហនុ ៖ កាលពីម៉ោងប្រមាណជា១០កន្លះយប់ថ្ងៃទី១៨ មីនា មានករណីប្រើអំពើហិ.ង្សាមួយកើតឡើងក្នុងក្លិបខារ៉ាអូខេ ស៊ីធីហ្គោល
ខេត្តព្រះសីហនុ ៖ កាលពីម៉ោងប្រមាណជា១០កន្លះយប់ថ្ងៃទី១៨ មីនា មានករណីប្រើអំពើហិង្សាមួយកើតឡើងក្នុងក្លិបខារ៉ាអូខេ ស៊ីធីហ្គោល ដែលមានទីតាំងស្ថិតនៅក្រុមទី១៣ ភូមិ១ សង្កាត់លេខ៤ ក្រុង-ខេត្តព្រះសីហនុ ។ ជនរងគ្រោះឈ្មោះ ហេង រិទ្ធី ជាមេធាវីខេត្តព្រះសីហនុ អាយុ៣៦ឆ្នាំ ទីលំនៅបច្ចុប្បន្នភូមិ១ សង្កាត់លេខ២ ក្រុង-ខេត្តព្រះសីហនុ ។
លោកមេធាវីបានឱ្យដឹងថា ករណីប្រើអំពើហិង្សាខាងលើបង្កឡើងដោយជនសង្ស័យមិនស្គាល់អត្តសញ្ញាណមកលើរូបគាត់ក្នុងក្លិបខារ៉ាអូខេ ស៊ីធីហ្គោលនោះ ខណៈដែលរូបគាត់ត្រូវមិត្តភក្តិហៅទៅចូលរួមនៅក្នុងកម្មវិធីក្នុងក្លិបនោះ។ ក្រោយពេលកើតហេតុ លោកបានដាក់ពាក្យបណ្តឹងនៅប៉ុស្តិ៍នគរបាលរដ្ឋបាលសង្កាត់លេខ៤ ក្រុង-ខេត្តព្រះសីហនុ ដើម្បីឱ្យសមត្ថកិច្ចស្រាវជ្រាវរកជនសង្ស័យម្នាក់នោះមកដោះស្រាយតាមនីតិវិធីច្បាប់ ។
លោកមេធាវីបានបញ្ជាក់ថា មុនពេលកើតហេតុ រូបលោកបានឡើងជណ្តើរទៅជាន់ខាងលើ ក៏បានប៉ះស្មាគ្នាជាមួយជនសង្ស័យដែលបានដើរចុះមកខាងក្រោម ។ ពេលនោះលោកមេធាវីក៏បានសួរថា ហេតុអ្វីបានជាដើរមកបុកខ្ញុំយ៉ាងនេះ? ពេលនោះជនសង្ស័យមិនបានឆ្លើយតបទេ ហើយក៏បានដាល់រូបលោកមួយដៃចំចិញ្ចើមឡើងហើមជាំ និងទាត់ធាក់់បន្ថែមទៀតរួចក៏នាំបក្សពួកឡើងរថយន្តវីហ្គោ ពណ៌ស ពាក់ផ្លាកលេខ ខ.ម2-2525 គេចខ្លួនបាត់ស្រមោលដោយមិនមានការឃាត់ខ្លួនពីសំណាក់សមត្ថកិច្ច និងសន្តិសុខដែលយាមប្រចាំការនៅក្លិបកម្សាន្តខារ៉ាអូខេខាងលើនោះឡើយ ។
ក្រោយពេលកើតហេតុ លោកមេធាវី ហេង រិទ្ធី ក៏បានទៅដាក់ពាក្យបណ្តឹងនៅប៉ុស្តិ៍រដ្ឋបាលសង្កាត់លេខ៤ នៅវេលាម៉ោងប្រមាណជាជិត១០កន្លះយប់ថ្ងៃទី១៨ មីនា ២០១៧ ដោយភ្ជាប់ជាមួយរូបភាពនៅក្នុងកាមេរ៉ាសុវត្ថិភាពដែលជនសង្ស័យរួមនឹងបក្សពួកចូលច្រៀងនៅក្នុងបន្ទប់ខារ៉ាអូខេមុនពេលកើតហេតុ ។
រហូតមកដល់ពេលនេះ នគរបាលប៉ុស្តិ៍ កំពុងធ្វើការស្រាវជ្រាវរកជនសង្ស័យនិងបក្សពួកដើម្បីយកមកដោះស្រាយទៅតាមនីតិវិធីច្បាប់ មិនឱ្យជនបង្ករួចផុតពីសំណាញ់ច្បាប់បានឡើយ ។
ភ្ញៀវដែលបានចូលទៅក្នុងក្លិបកម្សាន្តខាងលើ ដែលបានឃើញហេតុការណ៍បានសម្តែងការខកចិត្តយ៉ាងខ្លាំងខណៈដែលសមត្ថកិច្ច និងសន្តិសុខដែលយាមប្រចាំការនៅក្នុងក្លិបនោះមិនបានឃាត់ខ្លួនជនបង្ករបួសស្នាម ។ ដូច្នេះគ្រប់អតិថិជនគួរស្វែងយល់ដោយខ្លួនឯង ថាតើគួរចូលទៅកម្សាន្តនៅក្លិបខាងលើនោះទៀត ឬយ៉ាងណា ?
ពាក់ព័ន្ធក្នុងហេតុការណ៍ខាងលើ ភ្នាក់ងារយកព័ត៌មានយើងមិនអាចរកការបកស្រាយពីម្ចាស់ក្លិបខាងលើនេះបានទេ ព្រោះមិនមានលេខទូរស័ព្ទដើម្បីទំនាក់ទំនង ៕
ចែករំលែកព័តមាននេះ