មុននេះបន្តិច សមត្ថកិច្ចចាប់ខ្លួនប៉ូលិសដែលបាញ់បោះនៅបុរីសម្បត្តិមានហេង
រាជធានីភ្នំពេញ ៖ បើតាមអ្នកឆ្លើយឆ្លងព័ត៌មានកោះសន្តិភាពបានឲ្យដឹងនៅប៉ុន្មាននាទីមុននេះថា កងកម្លាំងចម្រុះបានឃាត់ខ្លួនប៉ូលិសម្នាក់ដែលបានប្រើកាំភ្លើង
រាជធានីភ្នំពេញ ៖ បើតាមអ្នកឆ្លើយឆ្លងព័ត៌មានកោះសន្តិភាពបានឲ្យដឹងនៅប៉ុន្មាននាទីមុននេះថា កងកម្លាំងចម្រុះបានឃាត់ខ្លួនប៉ូលិសម្នាក់ដែលបានប្រើកាំភ្លើង AK 47 បាញ់បោះសេរី៥គ្រាប់បង្កឲ្យមានការភ្ញាក់ផ្អើលដល់ប្រជាពលរដ្ឋនៅក្នុងបុរីសម្បត្តិមានហេង ច្បារអំពៅ ។
ការឃាត់ខ្លួនប៉ូលិសឈ្មោះ ស្វាយ ពិសិដ្ឋ អាយុ៣៤ឆ្នាំ បម្រើការងារនៅនាយកដ្ឋានសិ្ថតិនៃអគ្គនាយកដ្ឋានអត្តសញ្ញាណកម្មក្រសួងមហាផ្ទៃនេះ បានធ្វើឡើងភ្លាមៗ បន្ទាប់ពីលោកនាយឧត្តមសេនីយ៍ នេត សាវឿន អគ្គស្នងការនគរបាលជាតិចេញបញ្ជាឲ្យចាប់ខ្លួននៅថ្ងៃទី២០ មីនានេះ ។
គួររំលឹកថា ស្នូរផ្ទុះអាវុធចំនួន៥គ្រាប់បានបន្លឺឡើងយ៉ាងរន្ទឺពេញមេឃ បន្ទាប់ពីបុរសម្នាក់ខឹងប្រពន្ធរបស់ខ្លួនទៅផឹកស៊ីនៅផ្ទះអ្នកជិតខាង ស្រាប់តែយកកាំភ្លើង AK ចេញពីក្នុងរថយន្តបាញ់រះឡើងលើតែម្តង ដែលហេតុការណ៍នេះ បង្កការភ្ញាក់ផ្អើលនៅវេលាម៉ោង០៥ និង៤០នាទីល្ងាចថ្ងៃទី១៩ មីនា ស្ថិតនៅចំណុចផ្ទះលេខ២៦៤ ក្នុងបុរីសម្បត្តិមានហេង ក្រុមទី១ ភូមិតាង៉ៅ សង្កាត់និរោធ ខណ្ឌច្បារអំពៅ ។
ប្រភពបន្តថា មុនពេលកើតហេតុ ស្ត្រីជាប្រពន្ធ (ពុំទាន់ស្គាល់ឈ្មោះ) ត្រូវអ្នកជិតខាងហៅទៅហូបចុកបន្តិចបន្តួច ។ ស្របពេលនោះ បុរសជាប្តីបានជិះរថយន្តមួយគ្រឿងម៉ាក High Lander ពណ៌.ស មិនចាំស្លាកលេខមកដល់ផ្ទះ (ប្រពន្ធពេលឃើញប្តីមកដល់ ទើបរត់មកផ្ទះវិញ) ។ ភ្លាមៗនោះ ប្តីបានសួរទៅប្រពន្ធថា «មានបានផឹកស្រាឬអត់?» ។ ប្រពន្ធតបទៅប្តីថា «ផឹកតែបន្តិចបន្តួចប៉ុណ្ណោះ» ។ ក្រោយមក ប្តីបានរត់ទៅបើកទ្វាររថយន្តទាញកាំភ្លើង AK មួយដើមមកបាញ់រះ នៅមុខផ្ទះរបស់ខ្លួន៥គ្រាប់ ទៅលើវេហា ដើម្បីបញ្ចេញកំហឹង។ ក្រោយការបាញ់រះ ជនបង្កបានបើករថយន្តចេញទៅបាត់ស្រមោលតែម្តង ។
ស្ត្រីជាប្រពន្ធរៀបរាប់ថា ខ្លួនពិតជាត្រូវបានអ្នកជិតខាងបបួលទៅញ៉ាំនៅផ្ទះពួកគេពិតប្រាកដមែន ប៉ុន្តែខ្លួនមិនបានផឹកច្រើននោះទេ គឺផឹកស្រាតែបន្តិចបន្តួចប៉ុណ្ណោះ ។ នាងបន្តថា នាងមិនសូវចេះផឹកឡើយ ពេលអ្នកជិតខាងហៅ នាងក៏មិនចង់ចូលរួមដែរ ប៉ុន្តែដោយនឹកឃើញថា ជាអ្នកជិតខាងគ្នាទើបទៅចូលរួមញ៉ាំបន្តិចទៅ ប៉ុន្តែចង្រៃអ្វីស្របពេលនោះ បុរសជាប្តីបានមកដល់ ស្របពេលដែលនាងកំពុងផឹកជជែកលេងនៅផ្ទះរបស់គេ ក៏កើតចិត្តខឹងសម្បារ ហើយស្ទុះទាញ AK បាញ់រះ បង្កឱ្យមានការភ្ញាក់ផ្អើលឡើង
តែម្តង ។
បច្ចុប្បន្នជនសង្ស័យបានត្រូវសមត្ថកិច្ចបញ្ជូនមកអធិការដ្ឋាននករបាលខណ្ឌច្បារអំពៅ ដើម្បីសួរនំានិងចាត់ការតាមច្បាប់ ៕
ចែករំលែកព័តមាននេះ