ញាតិកូនកំលោះ-កូនក្រមុំ ឈឺឆ្អាលប្រាក់ចំណងដៃ វាយតប់គ្នារបួសសងខាង
រាជធានីភ្នំពេញ ៖ ដោយសារតែឈឺឆ្អាលរឿងប្រាក់ចំណងដៃបានធ្វើឱ្យសាច់ញាតិកូនកំលោះ និងកូនក្រមុំបើកឆាកប្រយុទ្ធគ្នាស៊ីសាច់ហុតឈាមរហូតរងរបួសទាំងសងខាង
រាជធានីភ្នំពេញ ៖ ដោយសារតែឈឺឆ្អាលរឿងប្រាក់ចំណងដៃបានធ្វើឱ្យសាច់ញាតិកូនកំលោះ និងកូនក្រមុំបើកឆាកប្រយុទ្ធគ្នាស៊ីសាច់ហុតឈាមរហូតរងរបួសទាំងសងខាង និងត្រូវបានសាច់ញាតិបញ្ជូនទៅមន្ទីរពេទ្យរៀងៗខ្លួន ។
លោកវរសេនីយ៍ឯក អ៊ូច ហៀង អធិការនគរបាលក្រុងច្បារមន បានប្រាប់នៅព្រឹកថ្ងៃទី១៩ ខែមីនា ថា ករណីនេះបានកើតឡើងកាលពីវេលាម៉ោង១១និង៣០នាទីយប់ថ្ងៃទី១៧ ខែមីនា នៅផ្ទះការកូនរបស់ឈ្មោះ ពេជ្រ សាវ៉េន ភេទប្រុស អាយុ៤៦ឆ្នាំ នៅភូមិស្គុះ សង្កាត់ស្វាយក្រវាន់ ក្រុងច្បារមន ។ ជនរងគ្រោះទាំងសងខាង ភាគីខាងកូនស្រី ឈ្មោះ ផុន សោភា ភេទប្រុស អាយុ២៨ឆ្នាំ នៅភូមិជុំស្រុក ឃុំជង្រុក ស្រុកគងពិសី ។ ឯភាគីខាងកូនកំលោះ ឈ្មោះ ផុន ណាវី ភេទប្រុស អាយុ៣២ឆ្នាំ នៅភូមិឈូកគៀប ឃុំផុង ស្រុកបរសេដ្ឋ ។
លោកអធិការបន្តថា ក្រោយកើតហេតុ នៅព្រឹកថ្ងៃទី១៨ ខែមីនា កម្លាំងនគរបាលក្រុងបានចុះធ្វើកំណត់ហេតុស្រាវជ្រាវអំពីមូលហេតុដែលបង្កឱ្យមានអំពើហិង្សាដោយចេតនានេះ ។
ក្រោយស្រាវជ្រាវទើបដឹងថា រឿងនេះបង្កឡើងដោយភាគីកូនក្រមុំនិងភាគីកូនកំលោះ នៅពេលបញ្ចប់កម្មវិធីទទូលភ្ញៀវក៏មានការផឹកស៊ីក្រោមផ្ទះកូនក្រមុំជាបន្តទៀត ។ ពេលផឹកស៊ីយូរៗទៅ ភាគីកូនក្រមុំ ក៏សួរអំពីការប្រគល់លុយចំណងដៃ ឱ្យមកខាងកូនក្រមុំ ។ ពេលនោះការជជែកគ្នាឈានដល់តឹងសរសៃករៀងៗខ្លួន ក៏កើតមានជម្លោះវាយតប់គ្នាទៅវិញទៅមក បណ្តាលឱ្យរងរបួសទាំងសងខាងចំនួន២នាក់តែម្តង ។
ក្រោយកើតហេតុ ភាគីសាច់ញាតិទាំងសងខាងបានបញ្ជូនអ្នករងរបួសទៅមន្ទីរពេទ្យរៀងៗខ្លួន ដោយមិនទាន់មានអ្នកណាប្តឹងអ្នកណាឡើយ ។ រីឯលទ្ធផលនែការប្រយុទ្ទគ្នានេះ គឺភាគីកូនក្រមុំរងរបួសដៃស្តាំដេរ២២ថ្នេរ និងក្បាលដេ៣ថ្នេរ ចំណែកភាគីកូនកំលោះរងរបួសដៃដេរ១២ថ្នេរ ។
បន្ទាប់ពីធ្វើការស្រាវជ្រាវរួច សមត្ថកិច្ចបានចងក្រងសំណុំរឿងបញ្ជូនទៅការិយាល័យជំនាញដើម្បីចាត់ការតាមនីតិវិធី ។ លោកឧត្តមសេនីយ៍ត្រី សម សាមួន ស្នងការនគរបាលខេត្ត បានឱ្យដឹងដែរថា ករណីនេះខាងសមត្ថកិច្ចមិនបានឃាត់ខ្លួនភាគីទាំង២ឡើយ ។ ការមិនឃាត់ខ្លួននេះ ធ្វើឡើងតាមការស្នើសុំរបស់ចាស់ទុំទាំងសងខាង ដោយខាងសមត្ថកិច្ចទុកឱកាសត្រឹមថ្ងៃទី១៩ ខែមីនា បើសម្របសម្រួលមិនត្រូវគ្នាទេ នឹងបញ្ជូនសំណុំរឿងទៅសាលាដំបូងដើម្បីចាត់ការបន្ត ។
លោកស្នងការ បានបញ្ជាក់ទៀតថា មូលហេតុដែលបណ្តាលឱ្យកើតមានរឿងវាយតប់គ្នានេះ បើតាមការសើុបសួរគឺផ្តើមចេញពីរឿងសាច់ញាតិកូនក្រមុំសួរទៅខាងកូនកំលោះថា «តើបានចំណងដៃប៉ុន្មាន បើសំបុត្រយកទៅដល់ម្ភៃសំបុត្រ ។ ពេលនោះខាងកូនកំលោះឆ្លើយថាលុយចំណងដៃបានតែម្ភៃម៉ឺនរៀលទេ» ស្រាប់តែភាគីកូនក្រមុំឆ្លើយថា ក្រែងលុយចំណងដៃបាន២លានរៀល ហេតុអីនៅសល់តែម្ភៃម៉ឺនរៀលទៅវិញ ។ និយាយមិនទាន់ចប់ផង ភាគីខាងកូនកំលោះបានវាយទៅលើភាគីកូនក្រមុំបណ្តាលឱ្យកើតការវាយតប់គ្នាតែម្តង ។
មានការលើកឡើងថា ការបង្កអំពើហិង្សាដាក់គ្នាទៅវិញទៅមករវាងសាច់ញាតិកូនកំលោះនិងកូនក្រមុំនេះ មិនត្រឹមតែធ្វើឱ្យសាមីខ្លួនខ្មាសអ្នកស្រុកភូមិផងរបងជាមួយគ្នានោះទេ ថែមទាំងធ្វើឱ្យមានការរិះគន់យ៉ាងខ្លាំងដល់អ្នកទាំង២នាក់ថា មិនគួរណានាំគ្នាធ្វើទង្វើមិនគួរធ្វើបែបនេះសោះ ។ ជាងនេះទៅទៀត មិនត្រឹមតែធ្វើឱ្យខ្លួនខ្មាសគេនោះទេ គឺបានអូសឲ្យកូនកំលោះនិងកូនក្រមុំខ្មាសញាតិទាំងសងខាងមិនស្ទើរនោះទេ តែរឿងរ៉ាវទាំងនេះមិនបានធ្វើឱ្យរំខានដល់បំណងកូនកំលោះនិងកូនក្រមុំដែលក្លាយជាគូស្វាមីភរិយាថ្មោងថ្មីនេះឡើយ ៕
ចែករំលែកព័តមាននេះ