រាជធានីភ្នំពេញ ៖ ប្រព័ន្ធលូក្រោមដីត្រូវបានចាត់ទុកជាប្រព័ន្ធដ៏មានសារសំខាន់ទាក់ទងនឹងសុខុមាលភាពនៃការរស់នៅ ខណៈប្រព័ន្ធនេះបាននិងកំពុងចោទជាបញ្ហាយ៉ាងច្រើននៅក្នុងរាជធានីភ្នំពេញ និង
រាជធានីភ្នំពេញ ៖ ប្រព័ន្ធលូក្រោមដីត្រូវបានចាត់ទុកជាប្រព័ន្ធដ៏មានសារសំខាន់ទាក់ទងនឹងសុខុមាលភាពនៃការរស់នៅ ខណៈប្រព័ន្ធនេះបាននិងកំពុងចោទជាបញ្ហាយ៉ាងច្រើននៅក្នុងរាជធានីភ្នំពេញ និងបណ្តាទីក្រុងនានា ។
លោកបណ្ឌិត សេង ប៊ុនរិទ្ធ អ្នកជំនាញការនិងទីប្រឹក្សានៃធនាគារអភិវឌ្ឍន៍អាស៊ី និងជាអគ្គនាយកក្រុមហ៊ុន RLS International បានពន្យល់ពីបញ្ហា និងសារសំខាន់នៃប្រព័ន្ធលូក្រោមដីដូចខាងក្រោម ។
បច្ចុប្បន្ននេះ មានចលនាពុះដីឡូត៍លក់ច្រើន តើលោកបណ្ឌិតមើលឃើញដូចម្តេចទាក់ទងនឹងហេដ្ឋារចនាសម្ព័ន្ធដែលបានរៀបចំ ?
អ្វីដែលខ្ញុំផ្តោតសំខាន់គឺលើប្រព័ន្ធផ្លូវ និងប្រព័ន្ធលូក្រោមដី ខ្ញុំផ្តោតជាពិសេសទៅលើប្រព័ន្ធក្រោមដី មានការបែងចែកជាពីរ គឺទី១ ប្រព័ន្ធលូទឹកស្អុយ និងប្រព័ន្ធបង្ហូរទឹកភ្លៀងរួមបញ្ចូលគ្នា ដែលអនុវត្តភាគច្រើននៅកម្ពុជា និងទី២ ការសាងសង់ប្រព័ន្ធលូបែងចែករវាងទឹកស្អុយ និងប្រព័ន្ធបង្ហូរទឹកភ្លៀងដាច់ពីគ្នា ។ ប្រព័ន្ធទាំងពីរនេះមានផលប្រយោជន៍ផ្សេងគ្នា ប៉ុន្តែទំហំនៃការចំណាយលើការរៀបចំប្រព័ន្ធបែងចែកដាច់ពីគ្នារវាងលូទឹកស្អុយ និងទឹកភ្លៀង គឺមានការចំណាយលើសពាក់កណ្តាល បើធៀបនឹងប្រព័ន្ធដែលប្រើប្រាស់រួមបញ្ចូលគ្នា ។
តើការបែងចែកប្រព័ន្ធទាំងពីរនេះមានផលប្រយោជន៍យ៉ាងដូចម្តេច ?
បើសង់លូទឹកភ្លៀង និងលូទឹកស្អុយរួមបញ្ចូលគ្នាធ្វើឲ្យមានការចំណាយទាប ប៉ុន្តែការបែងចែកលូទឹកភ្លៀង និងទឹកស្អុយដាច់ពីគ្នាមានផលប្រយោជន៍ ព្រោះពេលគេឌីសាញលូឡើង គេគិតពីកម្ពស់ទឹកភ្លៀងដែលនឹងធ្លាក់ចុះមក ដើម្បីធ្វើយ៉ាងណា កុំឲ្យមានការលិចលង់នៅតំបន់ណាមួយ ប៉ុន្តែចៃដន្យអាក្រក់ ឆ្នាំណាមួយភ្លៀងធ្លាក់ខ្លាំង បើគ្មានការបែងចែករវាងទឹកភ្លៀង និងទឹកស្អុយ នឹងធ្វើឲ្យលិចប្រព័ន្ធលូ ដែលធ្វើឲ្យទឹកស្អុយខ្ពុរឡើងមកខាងលើ ។ ដូច្នេះ ផ្នែកខាងលើលែងមានការបែងចែករវាងទឹកភ្លៀង និងទឹកស្អុយទៀតហើយ តែវាជាការលាយបញ្ចូលគ្នារវាងទឹកភ្លៀង និងទឹកស្អុយ ដែលធ្វើឲ្យមានមេរោគប៉ះពាល់ដល់សុខភាពប្រជាពលរដ្ឋ ។
តើការចម្រោះទឹកស្អុយមានសារសំខាន់ និងគួរអនុវត្តយ៉ាងដូចម្តេច ?
ជាទូទៅ នៅប្រទេសណាក៏ដូចជាប្រទេសណាដែរ ទឹកស្អុយគេមិនចាក់ចោលទាំងស្រុងទេ គឺគេយកវាចម្រោះសិន ។ នៅពេលគេយកវាទៅសម្អាត ត្រង់នេះហើយជាផលប្រយោជន៍នៃប្រព័ន្ធញែករវាងទឹកភ្លៀង និងទឹកស្អុយ ។ ឧទាហរណ៍ ទឹកស្អុយនៅតំបន់មួយបង្កើតបាន១០ម៉ែត្រគីបក្នុង១ថ្ងៃ តំបន់នោះគ្មានប្រព័ន្ធញែកទេ មានតែប្រព័ន្ធលូរួម ។ អីចឹងនៅពេលទឹកភ្លៀងធ្លាក់មក ទឹកភ្លៀងក្នុងលូមិនមែនមានបរិមាណ១០ម៉ែត្រគីបទេ គឺឡើងដល់៣០០ម៉ែត្រគីប ឬច្រើនជាងនេះ ។
តើនៅក្នុងទីក្រុងមួយ ឬទីប្រជុំជនមួយគួរតែមានការវិនិយោគប្រព័ន្ធញែកនេះឬទេ ?
គួរតែធ្វើ ពីព្រោះក្រសួងបរិស្ថានក៏បានគិតដែរ គឺចង់ឲ្យទីក្រុងទាំងអស់មានប្រព័ន្ធបែងចែងបែបនេះ ប៉ុន្តែដោយសារកម្ពុជាមានកង្វះខាតទាំងធនធានមនុស្ស និងថវិកា ទើបយើងធ្វើជាលក្ខណៈរួមសិន ។ សព្វថ្ងៃនេះ នៅកម្ពុជាមានទីក្រុងពីរហើយ ដែលមានអាងធ្វើប្រព្រឹត្តកម្ម ឬចម្រោះទឹកស្អុយ គឺក្រុងព្រះសីហនុ និងក្រុងសៀមរាប ដែលបាននិងកំពុងដំណើរការដោយរាជរដ្ឋាភិបាល ។ ក្រុងព្រះសីហនុមានការរៀបចំប្រព័ន្ធញែករវាងទឹកលូ និងទឹកភ្លៀងហើយ ។
តើប្រព័ន្ធញែកទឹកស្អុយ និងទឹកភ្លៀង និងការបង្កប់ខ្សែភ្លើងក្រោមដីជួយការពារហានិភ័យអ្វីខ្លះ ?
សម្រាប់ខ្សែភ្លើងក្រោមដី វាជួយជាសោភ័ណភាព និងការពារការឆក់ ឬដាច់អ្វីមួយបាន ប៉ុន្តែសម្រាប់ប្រព័ន្ធលូញែករវាងទឹកភ្លៀង និងទឹកស្អុយ មានន័យថា កន្លែងណារស់នៅល្អ គឺមានប្រព័ន្ធរំដោះទឹកភ្លៀងល្អ មិនធ្វើឲ្យលិចលង់នៅពេលភ្លៀងទេ ហើយទឹកស្អុយចេញពីលំនៅឋាន ត្រូវបានគេយកទៅចម្រោះឲ្យស្អាត ទើបបង្ហូរចោលទៅទីណាមួយ។
ការសម្អាតទឹកស្អុយ វានឹងមិនធ្វើឲ្យប៉ះពាល់ដល់គុណភាពទឹកក្រោមដី និងទឹកសម្រាប់ប្រើប្រាស់ទេ ។ ផ្ទុយទៅវិញ ប្រសិនជាទឹកស្អុយមិនត្រូវបានសម្អាត វានឹងមានហានិភ័យដល់សុខភាពខ្ពស់ ព្រោះតាមរយៈការសិក្សារកឃើញថា ប្រជាពលរដ្ឋនៅក្រុងភ្នំពេញ ពួកគេបានប្រើប្រាស់អាងទឹកក្រោមបង្គន់ ដែលមិនត្រឹមត្រូវតាមបទដ្ឋានបច្ចេកទេស ជាអាងធ្វើតាមនឹកឃើញ ។ ជាទូទៅ យើងបានរកឃើញគឺ៧០%ទៅ៨០% នៃអាងទឹកបង្គន់ មិនបានបិទបាតទេ ដែលធ្វើឲ្យទឹកស្អុយជ្រាបចូលប្រព័ន្ធទឹកនៅខាងក្រោមដី ហើយប្រសិនជាគាត់ជីកអណ្តូងយកទឹកមកប្រើប្រាស់នោះ គឺមានហានិភ័យខ្ពស់ណាស់ដល់សុខភាព ។
តើការសាងសង់លូ គួរស្ថិតក្នុងទំហំណាមួយទើបមានភាពសមស្រប ?
ការសាងសង់លូទំហំប៉ុណ្ណា មិនអាចនិយាយបានទេ ព្រោះបើគណនាលូសម្រាប់ទឹកភ្លៀង ឬទឹកស្អុយ វាអាស្រ័យទំហំទីតាំងដី និងចំនួនប្រជាពលរដ្ឋ តើផ្ទៃរងទឹកភ្លៀងធំប៉ុណ្ណា គេនឹងធ្វើការឌីហ្សាញលូធំទំហំតាមនោះ និងតូចទៅតាមផ្ទៃរងទឹកភ្លៀងជាក់ស្តែង ប៉ុន្តែវាក៏អាស្រ័យលើហេដ្ឋារចនាសម្ព័ន្ធ និងប្រព័ន្ធលូត្រូវហូរទៅកាន់ខ្នែងដទៃច្រើន ឬតិចផងដែរ ។
បើសាងសង់លូធំ ត្រូវចំណាយប្រាក់ច្រើន ដូច្នេះ ប្រសិនជាមានប្រព័ន្ធប្រឡាយទម្លាក់ពីខាងមុខបណ្តើរៗ គេមិនបាច់សង់លូខាងចុងធំទេ ។ ផ្ទុយទៅវិញ បើគ្មានប្រព័ន្ធលូបែងចែកតូចៗទេ អ្នកវិនិយោគគម្រោងណាមួយត្រូវសាងសង់លូធំ ៕
ចែករំលែកព័តមាននេះ