ជិះម៉ូតូទៅប្រាប់បុណ្យឱ្យម្ដាយត្រូវចោរបាញ់មួយគ្រាប់ប្លន់យកម៉ូតូបាត់
រាជធានីភ្នំពេញ ៖ បុរសម្នាក់ទើបនឹងទិញម៉ូតូមិនទាន់ធ្វើស្លាកលេខផងបានជិះម៉ូតូទៅប្រាប់បុណ្យសង្ឃទានឱ្យម្ដាយដល់ពាក់កណ្ដាលផ្លូវ
រាជធានីភ្នំពេញ ៖ បុរសម្នាក់ទើបនឹងទិញម៉ូតូមិនទាន់ធ្វើស្លាកលេខផងបានជិះម៉ូតូទៅប្រាប់បុណ្យសង្ឃទានឱ្យម្ដាយដល់ពាក់កណ្ដាលផ្លូវត្រូវបានជនប្រដាប់អាវុធបាញ់មួយគ្រាប់ប្លន់យកម៉ូតូទៅដោយសុវត្ថិភាព ហេតុការណ៍នេះកើតឡើងកាលពីរម៉ោង១២ថ្ងៃត្រង់ ថ្ងៃទី១៨ មីនា ស្ថិតនៅក្នុងភូមិទួល ឃុំបើក ស្រុកឈូក ខេត្តកំពត ។ ជនរងគ្រោះមានឈ្មោះ រុំ រុង ភេទប្រុស អាយុ២៧ឆ្នាំ ជាកសិករមានប្រពន្ធឈ្មោះ វឿន ឈៀង អាយុ២៩ឆ្នាំ ជាកសិករ អ្នកទាំងពីរស្នាក់នៅភូមិកើតហេតុខាងលើ ។
បើតាមសម្ដីពីប្រពន្ធជនរងគ្រោះបានប្រាប់ឱ្យដឹងថា មុនពេលកើតហេតុប្ដីរបស់គាត់បានជិះម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៦ អត់ស្លាកលេខ ក្នុងទិសដៅពីកើតទៅលិចគោលបំណងទៅប្រាប់បុណ្យសង្ឃទានឱ្យម្ដាយ ខណៈពេលជិះមកដល់ពាក់កណ្ដាលផ្លូវបានជួបជនប្រដាប់អាវុធ២នាក់ជិះម៉ូតូសង់មួយគ្រឿងមិនចាំស្លាកលេខជិះមកតាមពីក្រោយបានដកកាំភ្លើងបាញ់មួយគ្រាប់ចំត្រគៀកខាងឆ្វេងបណ្ដាលឱ្យជនរងគ្រោះធ្លាក់ពីលើម៉ូតូសន្លប់ក៏ត្រូវក្រុមជនសង្ស័យប្លន់យកម៉ូតូជិះទៅបាត់ដោយសុវត្ថិភាព បន្សល់ទុកឱ្យជនរងគ្រោះដេកសន្លប់នៅតាមផ្លូវតែម្នាក់ឯង ។ នៅពេលនោះដែរក៏មានប្រជាពលរដ្ឋធ្វើដំណើរបានជួយទូរស័ព្ទប្រាប់ទៅបងប្អូនមកដឹកជនរងគ្រោះទៅសង្គ្រោះនៅមន្ទីរពេទ្យខេត្តកំពត ដោយសារស្ថានភាពជំងឺមានសភាពធ្ងន់ធ្ងរពេកត្រូវបានលោកគ្រូពេទ្យបញ្ចួនទៅសង្គ្រោះបន្ទាប់នៅពេទ្យព្រះកុសុមៈ ហៅពេទ្យលោកសង្ឃ ៕
ចែករំលែកព័តមាននេះ