ភ្នំពេញ៖ លោក ឌិត ទីណា ​ជា​កូន​​ប្រុស​របស់​​លោក​ ឌិត​ មន្ទី ប្រធាន​តុលាការ​កំពូល​។ លោករៀន​ចប់ជំនាញរ៉ែ នៅទីក្រុងប៉ារីស ប្រទេសបារាំង មុននឹង​វិលត្រឡប់​មកបម្រើការងារ​ក្នុងជួររាជ​រដ្ឋាភិបាល ដោយចាប់ផ្តើម​ជាអនុរដ្ឋលេខាធិការក្រសួងពាណិជ្ជកម្ម ហើយ​ឡើងជារដ្ឋលេខាធិការ​ក្រសួង​ពាណិជ្ជកម្ម។ ក្រោយមក លោក ឌិត ទីណា បានកាន់ការ ជា​រដ្ឋលេខាធិការក្រសួង​រ៉ែ និងថាមពល បន្ត​ដល់​​សព្វថ្ងៃ​។

កើតនៅថ្ងៃទី៧ ខែមករា ឆ្នាំ១៩៧៩ ចំថ្ងៃជ័យជម្នះលើខ្មែរក្រហម លោក ឌិត ទីណា ក៏ធ្លាប់​ឈរ​ឈ្មោះ ជាបេក្ខជនបម្រុង លំដាប់លេខរៀងទី២​ ក្នុងការបោះឆ្នោត​ជ្រើសតាំងតំណាងរាស្ត្រ នីតិកាលទី៥ ឆ្នាំ២០១៣ របស់គណបក្ស​ប្រជាជនកម្ពុជា​ នៅមណ្ឌលខេត្តកណ្តាល។

ក្រោយ​ការ​បោះ​ឆ្នោត និង​ការបង្កើត​រាជរដ្ឋាភិបាល នីតិកាលទី៥ នៅ​ឆ្នាំ២០១៣​ ក្រសួង​ឧស្សាហកម្ម រ៉ែ និងថាមពល ត្រូវបាន​បំបែក​ជាពីរ។ គឺ​ក្រសួង​រ៉ែ និងថាមពល ដែល​មានលោក ស៊ុយ សែម ជារដ្ឋមន្ត្រី និងក្រសួង​ឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ដែលមានលោក ចម ប្រសិទ្ធ ជារដ្ឋមន្ត្រី​។

ឯកសារ​ក្នុងហ្វេសប៊ុកផ្លូវការរបស់​លោក ឌិត ទីណា បង្ហាញថា លោក បាន​រៀននៅ​​វិទ្យាល័យ​ព្រះស៊ីសុវត្ថិ ក្នុង​រាជ​ធានី​ភ្នំពេញ ចន្លោះ​ពី​ឆ្នាំ​១៩៩១ ដល់ឆ្នាំ១៩៩៤​ មុននឹងលោក ចាកចេញ​​ទៅ​រៀន​ថ្នាក់វិទ្យាល័យ នៅប្រទេសបារាំង Lycée Gérard de Nerval bac ក្នុង​ឆ្នាំ១៩៩៦។ លោក ឌិត ទីណា ក៏បានរៀនចប់ជំនាញរ៉ែ នៅ​​សាលាជាតិរ៉ែ នៅ​ទីក្រុង​ប៉ារីស ប្រទេសបារាំង​ École Nationale Superieure des mines de Paris។

នៅថ្ងៃទី​៣០ ខែមករា ឆ្នាំ​២០០៩ លោក ឌិត ទីណា​ ត្រូវបានព្រះមហាក្សត្រ ចេញព្រះរាជក្រឹត្យ តែង​តាំងជាអនុរដ្ឋលេខាធិការក្រសួងពាណិជ្ជកម្ម។ ក្រោយមក លោក​ឡើងជារដ្ឋលេខាធិការ​ក្រសួងពាណិជ្ជកម្ម មុននឹងផ្ទេរ​មកកាន់តំណែង​ជារដ្ឋលេខាធិការក្រសួងរ៉ែ និងថាមពល បន្ត​រហូតដល់​សព្វថ្ងៃ​។

សូមរម្លឹកថា នៅថ្ងៃទី១០ ខែតុលា ឆ្នាំ២០២២ នេះ មានការផ្សព្វផ្សាយ​នូវ​លិខិតរបស់សម្តេចតេជោ ហ៊ុន សែន ស្នើទៅកាន់រដ្ឋសភា ដើម្បី​បោះឆ្នោត​តែង​តាំង​លោក ឌិត ទីណា ជារដ្ឋមន្ត្រី​ក្រសួង​កសិកម្ម រុក្ខាប្រមាញ់ និងនេសាទ​ ជំនួស​លោក វេង សាខុន ដែល​ត្រូវបានដក​តំណែង កាលពី​ថ្ងៃទី៨ ខែតុលា ឆ្នាំ២០២២​ ក្នុងអំឡុងពេលលោក បំពេញបេសកកម្ម នៅអឺរ៉ុប​ ដោយយក​ភរិយា​ទៅជាមួយផង​។

ឆ្លើយ​តប​នឹង​ការស្នើសុំរបស់សម្តេចតេជោ នាយករដ្ឋមន្ត្រី រដ្ឋសភាបានកំណត់​​បើក​កិច្ចប្រជុំ​គណៈកម្មាធិការអចិន្ត្រៃយ៍​ នាព្រឹក​​ថ្ងៃ​ទី​១៣ ខែ​តុលា ឆ្នាំ២០២២៕