បញ្ជូនខ្លួនជនសង្ស័យម្នាក់ រួមជាមួយវត្ថុតាងថ្នាំញៀន ទៅសាលាដំបូងខេត្ត
ខេត្តព្រះវិហារ ៖ ជនសង្ស័យម្នាក់ឈ្មោះ គង់ និច ភេទប្រុស អាយុ២១ឆ្នាំ រស់នៅភូមិបុស្សធំ ឃុំប្រមេរ ស្រុកត្បែងមានជ័យ ខេត្តព្រះវិហារ
ខេត្តព្រះវិហារ ៖ ជនសង្ស័យម្នាក់ឈ្មោះ គង់ និច ភេទប្រុស អាយុ២១ឆ្នាំ រស់នៅភូមិបុស្សធំ ឃុំប្រមេរ ស្រុកត្បែងមានជ័យ ខេត្តព្រះវិហារ ត្រូវបានស្នងការដ្ឋាននគរបាលខេត្ត ព្រះវិហារឃាត់ខ្លួនបញ្ជូនទៅសាលាដំបូងខេត្តព្រះវិហារ ពាក់ព័ន្ធករណីចែកចាយ គ្រឿងញៀន នៅចំណុចភូមិកណ្តាល សង្កាត់កំពង់ប្រណាក ក្រុងព្រះវិហារ កាលពីថ្ងៃទី១៤ ខែមីនា ឆ្នាំ២០១៧កន្លងទៅថ្មីៗនេះ។
តាមការបញ្ជាក់ពីលោកវរៈសេនីយ៍ឯក ឆយ បូរិន នាយសេនាធិការដ្ឋាន នៃស្នងការដ្ឋាននគរបាលខេត្តព្រះវិហារ បានឲ្យដឹងនៅរសៀលថ្ងៃទី១៦ ខែមីនា ឆ្នាំ២០១៧នេះថា កម្លាំងអធិការដ្ឋាននគរបាលក្រុងព្រះវិហារ បានធ្វើការបង្ក្រាប ករណីជួញដូរ ចែកចាយដោយខុសច្បាប់នូវសារធាតុញៀន នៅចំណុចផ្លូវភ្លោះ ក្បែរមន្ទីរកសិកម្ម រុក្ខាប្រមាញ់ និងនេសាទ ខេត្តព្រះវិហារ វេលាម៉ោង៨នឹង៤០នាទីយប់ ថ្ងៃទី១៤ ខែមីនា ឆ្នាំ២០១៧កន្លងទៅ ខណៈដែលជនសង្ស័យខាងលើនេះ ជិះម៉ូតូមកឈប់ នៅចំណុចកើតហតុខាងលើ បម្រុងនឹងធ្វើសកម្ម ភាពចែកចាយថ្នាំញៀន ក៏ត្រូវបានសមត្ថកិច្ចឃាត់ខ្លួន ឆែកឆេរឃើញថ្នាំញៀនប្រាកដមែន។
ក្នុងការចុះឃាត់ខ្លួននេះដែរ សមត្ថកិច្ចរឹបអូសបានថ្នាំញៀនប្រភេទ មេតំហ្វេតាមីនប្រភេទម្សៅក្រាមពណ៌សថ្លា១កញ្ចប់ មានទម្ងន់ ០.៤៤ក្រាម ម៉ូតូម៉ាកហុងដាឌ្រីម ពណ៌ខ្មៅ១គ្រឿង ស៊េរី២០១៥ និងទូរស័ព្ទដៃមួយគ្រឿងផងដែរ។ បន្ទាប់មកក៏បានបញ្ជូនខ្លួនមកកាន់អធិការដ្ឋាននគរបាលក្រុងព្រះវិហារ ដើម្បីសាកសួរ ហើយក៏បានបញ្ជូនបន្តទៅស្នងការដ្ឋាននគរបាលខេត្តព្រះវិហារ ដើម្បីកសាងសំណុំរឿងបន្ថែម។
សូមបញ្ជាក់ថា មកដល់ពេលនេះ ជនសង្ស័យត្រូវបានស្នងការដ្ឋាននគរបាល ខេត្តព្រះវិហារ បញ្ជូនខ្លួនទៅសាលាដំបូងខេត្តព្រះវិហារហើយ នៅរសៀលថ្ងៃទី១៦ ខែមីនា ឆ្នាំ២០១៧នេះ ដើម្បីចាត់ការតាមនីតិវិធី៕
ចែករំលែកព័តមាននេះ