ដោយសារតែមានការព្រួយបារម្ភពីសត្វក្រពើរួចចេញពីក្នុងអាងចិញ្ចឹម គ្រាដែលទឹកទន្លេបានជន់លិចអាងចិញ្ចឹមក្រពើ នៅព្រឹកថ្ងៃទី៩ ខែតុលា ឆ្នាំ២០២២ អាជ្ញាធរស្រុកបរិបូណ៌ និងមន្ត្រីជំនាញ បានចុះទៅណែនាំដល់អ្នកចិញ្ចឹមក្រពើ នៅ
ខេត្តកំពង់ឆ្នាំង ៖ ដោយសារតែមានការព្រួយបារម្ភពីសត្វក្រពើរួចចេញពីក្នុងអាងចិញ្ចឹម គ្រាដែលទឹកទន្លេបានជន់លិចអាងចិញ្ចឹមក្រពើ នៅព្រឹកថ្ងៃទី៩ ខែតុលា ឆ្នាំ២០២២ អាជ្ញាធរស្រុកបរិបូណ៌ និងមន្ត្រីជំនាញ បានចុះទៅណែនាំដល់អ្នកចិញ្ចឹមក្រពើ នៅក្នុងឃុំឆ្នុកទ្រូក ឱ្យព័ទ្ធរបាំងលួសសំណាញ់ដើម្បីការពារសត្វក្រពើចេញពីអាង។
លោក ផល សុភាព អភិបាលរងស្រុកបរិបូរណ៍ បានឱ្យដឹងថា ដោយទទួលដំណឹងថា អាងចិញ្ចឹមក្រពើចំនួន២កន្លែងប្រឈមនឹងសត្វក្រពើរួចចេញ ព្រោះតែទឹកទន្លេជន់ឡើង លោកក៏បានដឹកនាំមន្ត្រីជំនាញ និងសមត្ថកិច្ចចុះទៅណែនាំដល់ម្ចាស់អាងចិញ្ចឹមក្រពើ ត្រូវយករបាំងលួសសំណាញ់ព័ទ្ធបន្ថែមពីលើរបាំងសាច់អួន ដែលម្ចាស់អាងចិញ្ចឹមក្រពើ ព័ទ្ធពីមុន ដើម្បីឲ្យមានសុវត្ថិភាព កុំឲ្យសត្វក្រពើចេញពីអាង។ ម្យ៉ាងដោយសារ ក្រពើមានទំហំធំៗ ព្រោះការចិញ្ចឹមបានច្រើនឆ្នាំណាស់ទៅហើយ។
ក្រៅពីការណែនាំឲ្យយកលួសសំណាញ់រាយព័ទ្ធលើអាងចិញ្ចឹមក្រពើបន្ថែម លោកក៏បានណែនាំដល់ម្ចាស់អាងចិញ្ចឹមក្រពើ ឱ្យមើលការពារប្រុងប្រយ័ត្ន ដើម្បីកុំឲ្យក្រពើរួចចេញពីក្នុងអាងចិញ្ចឹមផងដែរ។
គួរបញ្ជាក់ដែរថា ក្នុងឃុំឆ្នុកទ្រូ មានកន្លែងចិញ្ចឹមក្រពើចំនួន៩កន្លែង ប៉ុន្តែ២កន្លែងបានប្រឈមនឹងគ្រោះថ្នាក់ ប្រសិនបើក្រពើរួចចេញពីអាង និង៦កន្លែងទៀត ទឹកលិចមិនទាន់ដល់នោះឡើយ៕
ចែករំលែកព័តមាននេះ