ចង់ដឹងឈ្មោះមន្ត្រីបើកដៃឱ្យយួនចូលកា.ប់ឈើដូចហ្វូងស្រមោច មើលក្នុងអត្ថបទនេះ
ខេត្តមណ្ឌលគិរី ៖ យ៉ាងហោចណាស់មនុស្សចំនួន២០នាក់ ត្រូវបានគណៈកម្មការថ្នាក់ជាតិទប់ស្កាត់បទល្មើសព្រៃឈើហៅទៅបំភ្លឺនៅសាលាខេត្
ខេត្តមណ្ឌលគិរី ៖ យ៉ាងហោចណាស់មនុស្សចំនួន២០នាក់ ត្រូវបានគណៈកម្មការថ្នាក់ជាតិទប់ស្កាត់បទល្មើសព្រៃឈើហៅទៅបំភ្លឺនៅសាលាខេត្ត ដែលមានទាំងមន្ដ្រីយោធាព្រំដែន នគរបាលព្រំដែន និងមន្ត្រីបរិស្ថាន មានទាំងមេមានទាំងកូន ហៅទាំងអស់ឲ្យតែជាប់សង្ស័យក្នុងសំណុំរឿងកាប់បំផ្លាញព្រៃឈើយ៉ាងរង្គាល ដូចហ្វូងស្រមោច ។
រហូតមកដល់ថ្ងៃទី១៦ ខែមីនា មានរយៈពេល៣សប្តាហ៍មកហើយ ដែលប្រតិបត្តិការបង្ក្រាបបទល្មើសព្រៃឈើតាមព្រំដែនពីលើមេឃ ត្រូវបានអនុវត្ដយ៉ាងក្ដៅគគុក ។ ការបើកប្រតិបត្ដិការពីលើមេឃនេះ ដោយសារជិះម៉ូតូ រថយន្ដ ឬដើរទៅចាប់ ពួកឈ្មួញនឹងផ្អើលរត់ចែកជើងគ្នាអស់ មុនពេលកម្លាំងសមត្ថកិច្ចទៅដល់ ។ ដូច្នេះមានតែប្រើឧទ្ធម្ភាគចក្រ៣គ្រឿងហោះទៅបង្ក្រាបទើបចាប់បាន ។
ដែនជម្រកសត្វព្រៃកែវសីមា ដែលទើបប្តូរឈ្មោះពីតំបន់អភិរក្សជីវចម្រុះសីមា ស្ថិតក្នុងស្រុកកែវសីមា មានទំហំជាង២០ម៉ឺនហិកតា ជាប់ខេត្តក្រចេះ ជាប់ព្រំដែនវៀតណាម ត្រូវគេកាប់បំផ្លាញជាង២០ឆ្នាំហើយ និងប្រហែលជាជិតរលាយអស់ក្នុងពេលឆាប់ៗនេះផងដែរ បើនៅតែមានមន្ត្រីពុករលួយនៅធ្វើការកន្លែងអស់ទាំងនោះ។ ពួកគេមិនមែនពុករលួយតែម្នាក់ពីរនាក់នោះទេ គឺជាប្រព័ន្ធ ដែលធ្វើឲ្យរលាយហិនហោចលឿនណាស់ ដោយសារតែការឃុបឃិតគ្នាបែបនេះ ។
នៅតាមព្រំដែន មានទាហានការពារព្រំដែន មាននគរបាលការពារព្រំដែន នៅក្នុងព្រៃមានមន្ត្រីបរិស្ថានជាអ្នកការពារ ប៉ុន្តែបែរជាមានជនជាតិវៀតណាមចូលទៅកាប់ឈើពេញដែនជម្រកសត្វព្រៃ មានតាំងពីរថយន្ដកែច្នៃបង្កុង ដំរីទឹកធំៗ ដឹកឈើហុបធំៗដែលជាឈើរបស់ខ្មែររាប់ពាន់ម៉ែត្រគូបឆ្លងដែនចូលទឹកដីវៀតណាមធ្វើព្រងើយ ។
នៅពេលសាកសួរមន្ត្រីប្រចាំការនៅតាមគោលដៅដែលកើតបទល្មើស ពួកអស់លោកទាំងនោះបានត្រឹមគំរាមតបវិញ ហើយឆ្លើយថា មិនដឹង មិនមានអីផង កុំចេះតែថា ប្រយ័ត្នគេប្តឹង ! លុះកាលពីថ្ងៃទី២១ ខែកុម្ភៈកន្លងមក ឧទ្ធម្ភាគចក្រ៣គ្រឿងបានហោះទៅទម្លាក់កងកម្លាំងចុះចាប់ដល់កន្លែង ទើបគេនាំគ្នាធ្វើភ្នែកស្លឺ ភ្នែកស ភ្នែកលៀនត្លែដូចក្ដាម ឆ្លើយដាក់អ្នកនេះ ឆ្លើយដាក់អ្នកនោះយករួចខ្លួន ។
ចំណែកមេនគរបាលវរៈការពារព្រំដែនម្នាក់ត្រូវគេខ្សឹបខ្សៀវពីមាត់មួយទៅមាត់មួយថា មិនត្រឹមទទួលសំណែនម៉ឺនៗដុល្លារនោះទេ ថែមទាំងដាក់រណារយន្ត ដាក់រថយន្ដកែច្នៃរបស់ខ្លួនឯង ចូលទៅអារ កាប់ ច្រៀក និងដឹកជញ្ជូនយកលុយដាក់ខោប៉ៅរបស់ខ្លួនថែមទៀតផង ដែលមើលទៅល្មមដល់ពេលបែកពោះហើយ ។
ពេលនេះមន្ត្រីយោធាចំនួន៧រូប និងមន្ត្រីនគរបាលចំនួន១១រូប ដែលថ្នាក់ជាតិកោះហៅទៅសាកសួរពាក់ព័ន្ធនឹងបទល្មើសព្រៃឈើ ជាលទ្ធផលក្នុងចំណោមកងកម្លាំងប្រដាប់អាវុធទាំងនេះ មានមន្ត្រីខ្លះអាចប្រឈមមុខនៅតុលាការ ខណៈខ្លះទៀតត្រូវបានអប់រំ និងផ្លាស់ប្តូរទៅកន្លែងផ្សេង ។
សមត្ថកិច្ចខេត្តមណ្ឌលគិរី បានលួចបង្ហើបថា ការកោះហៅមន្ត្រីយោធា និងនគរបាលទាំងនោះទៅសាកសួរ បានធ្វើឡើងនៅថ្ងៃទី១៤-១៥-១៦ ខែមីនា ហើយអាចនឹងបន្តនីតិវិធីទៀត ដែលពួកគេសង្ស័យមានជាប់ពាក់ព័ន្ធនឹងបទល្មើសព្រៃឈើនៅស្រុកអូររាំង ខេត្តមណ្ឌលគិរី ។
មន្ត្រីយោធាដែលជាប់ពាក់ព័ន្ធនឹងរឿងបទល្មើសព្រៃឈើ ដែលគណៈកម្មការថ្នាក់ជាតិទប់ស្កាត់និងបង្ក្រាបបទល្មើសធនធានធម្មជាតិ ហៅមកសាកសួររួមមាន លោក ឯម សុងហ៊ួ មានតួនាទីជាប្រធាន«ខ» និងជាមេប៉ុស្តិ៍របៀងការពារព្រំដែនអូរហ៊ុច លោក កើត វេហា ជាមន្ត្រី លោក ឡាយ សាវី ជាមន្ត្រី លោក លី ឆេងលីម ជាមន្ត្រី លោក ទា ខៃម៉េង មានតួនាទីជាប្រធាន«គ៣» ។
បន្ទាប់ពីសាកសួរមន្ត្រីខាងលើរួច គណៈកម្មការបានកោះហៅមន្ត្រីយោធាចំនួន២រូបទៀត នៅថ្ងៃដដែលដើម្បីសាកសួរ គឺលោក ហ៊ឹម សុផាត និងលោក យិន ចាន់ទី មេបញ្ជាការយោធាវរៈការពារព្រំដែនគោកលេខ១០៣ ។ ជាលទ្ធផលពុំទាន់មានប្រភពណាមួយទម្លាយឲ្យដឹងថា បានទទួលលទ្ធផលយ៉ាងណានៅឡើយទេ ។
ដោយឡែក មន្ត្រីនគរបាលចំនួន៩រូប អាចទំនងជាធ្វើការអប់រំណែនាំ និងផ្ទេរឲ្យទៅកន្លែងផ្សេង កន្លែងអត់ស៊ី ខណៈមន្ត្រីនគរបាលចំនួន២រូបទៀត មានតួនាទីជាប្រធានច្រករបៀងការពារព្រំដែនប៉ុស្តិ៍អូរហ៊ុច និងប៉ុស្តិ៍អូរជុំ អាចប្រឈមនឹងច្បាប់ ព្រោះទុកយូរបែកពោះ ។
សូមរំឭកថា កាលពីពេលថ្មីៗកន្លងមក កម្លាំងកងរាជអាវុធហត្ថលើផ្ទៃប្រទេស បានបង្ក្រាបបទល្មើសព្រៃឈើឆ្លងដែនមួយករណី នៅប៉ុស្តិ៍អូរហ៊ុចជាប់ព្រំដែនប្រទេសវៀតណាម ក្នុងស្រុកអូររាំង ខេត្តមណ្ឌលគិរី ដោយរឹបអូសបានឈើប្រភេទសុក្រំ គគីរ និងផ្ចឹក សរុបចំនួន១៤៥កំណាត់ ចាប់បានរថយន្តបង្កុងចំនួន៨គ្រឿង រណារយន្ត១គ្រឿង និងម៉ូតូ៥គ្រឿង ។ នៅពេលនោះ កងកម្លាំងបានឃាត់ខ្លួនជនជាតិវៀតណាមចំនួន៧នាក់ ដែលបច្ចុប្បន្នកំពុងឃុំខ្លួនជាបណ្តោះអាសន្ននៅពន្ធនាគារខេត្ត ។
រឿងរ៉ាវសម្លកំពឹសក្នុងបទឧក្រិដ្ឋកម្មព្រៃឈើនេះក្រុមជនឃុបឃិតគ្នាមិនមែនសុខចិត្ដដេកគុកម្នាក់ឯង ឯអ្នកទទួលលាភសក្ការៈឯទៀត បានរួចខ្លួននោះទេ គឺពិតជាអន្ទងហៅគ្នាមកជួយទទួលទោសរៀងៗខ្លួនមិនខាន កុំឱ្យធ្ងន់តែអញពេក ។ អ្នកតាមដាននិយាយថា បើមិនមាននិទណ្ឌភាពក្នុងករណីបោសសម្អាតពេលនេះទេ ក្រុមមន្ដ្រីឯទៀតច្បាស់ថាកាត់កន្ទុយលាបកំបោរមិនខាន៕
ចែករំលែកព័តមាននេះ