សំរាមមាត់ទន្លេផ្សារក្រោម ធ្វើឱ្យអភិបាលក្រុងកំពង់ឆ្នាំង ឈឺក្បាល
- កំពង់ឆ្នាំង
លោក ហ៊ីង ភ័ព្វមីនា អភិបាលក្រុងកំពង់ឆ្នាំង ដែលទើបចូលកាន់តំណែងថ្មី បានអំពាវដល់បងប្អូនប្រជាពលរដ្ឋ និងអាជីវករលក់ដូរនៅមាត់ទន្លេផ្សារក្រោម សូមមេត្តា
ខេត្តកំពង់ឆ្នាំង ៖ លោក ហ៊ីង ភ័ព្វមីនា អភិបាលក្រុងកំពង់ឆ្នាំង ដែលទើបចូលកាន់តំណែងថ្មី បានអំពាវដល់បងប្អូនប្រជាពលរដ្ឋ និងអាជីវករលក់ដូរនៅមាត់ទន្លេផ្សារក្រោម សូមមេត្តាចូលរួមទុកដាក់សំរាមឱ្យបានត្រឹមត្រូវ ដើម្បីឱ្យក្រុមហ៊ុនប្រមូលសំរាមរបស់ក្រុងកំពង់ឆ្នាំង ប្រមូលសំរាមយកទៅទុកដាក់តាមទីតាំងទុកដាក់សំរាមបានត្រឹមត្រូវ ។ សូមកុំបោះចោលពាសវាល ពាលកាល តាមមាត់ទន្លេ ធ្វើបាត់បង់បរិស្ថាន និងសោភ័ណភាព ដែលនាំឲ្យភ្ញៀវទេសចរមានការរិះគន់។
ការអំពាវនាវខាងលើនេះ បានធ្វើឡើងនៅថ្ងៃទី០៦ ខែតុលា ឆ្នាំ២០២២ បន្ទាប់ពីលោក អភិបាលក្រុងកំពង់ឆ្នាំងថ្មីរូបនោះ បានដឹកនាំក្រុមការងារមន្ត្រីរាជការក្នុងក្រុង និងសង្កាត់ផ្សារឆ្នាំង ចុះប្រមូលសំរាមនៅមាត់ច្រាំងទន្លេផ្សារក្រោម ដែលអ្នកបោះចោលយ៉ាងអនាធិបតេយ្យ ធ្វើឱ្យក្នុងទឹកទន្លេក្លាយជាគំនរសំរាម ហើយការប្រមូលនេះ បានដល់ទៅចំនួន៣០ការ៉ុងឯណោះក្នុងរយៈពេលត្រឹមតែ១ព្រឹកប៉ុណ្ណោះ។
ទាក់ទងនឹងការចោលសំរាមខាងលើនេះដែរ ត្រូវបានមតិមហាជនលើកឡើងថា គឺដោយសារប្រជាពលរដ្ឋដែលបានទៅកំសាន្តនៅមាត់ទន្លេផ្សារក្រោម ខ្វះការយល់ដឹងពីបញ្ហាអនាម័យ បរិស្ថាន និងសោភ័ណ្ឌភាព ទើបពួកគាត់ចោលសំរាមបែបនេះ មួយចំណែកទៀតគឺគួបផ្សំនឹងអ្នកលក់ដូរមិនយកចិត្តទុកដាក់រឿងសំរាមនេះផង ទើបធ្វើឱ្យច្រាំងទន្លេផ្សារក្រោម ស្ទើរតែក្លាយជាទីលានចោលសំរាមបែបនេះ។
រយៈកាលកន្លងមក ច្រាំងទន្លេ ដែលមិនទាន់មានទឹកឡើងធំដូចឆ្នាំនេះ សំរាមបាននៅតាមច្រាំងទន្លេគ្មានទឹកពាសវាលពាសកាល ប៉ុន្តែឆ្នាំនេះ ទឹកទន្លេធំឡើងខ្ពស់ បានរុញសំរាមទាំងនោះ ឡើងមកលើ ទើបគេឃើញសំរាមឡើងជាគំនរក្បែរច្រាំទន្លេបែបនេះ ។ ហើយកន្លងទៅ អាជ្ញាធរខេត្តកំពង់ឆ្នាំង ធ្លាប់បានណែនាំដល់បងប្អួនប្រជាពលរដ្ឋ អាជីវករលក់ដូរ អាជ្ញាធរមូលដ្ឋាន សូមរួមគ្នាទុកដាក់សំរាមឱ្យបានត្រឹមត្រូវដែរ តែការចោលសំរាមនៅតែជាបញ្ហា សម្រាប់ក្រុងកំពង់ឆាំ្នងដដែល។
សូមបញ្ជាក់ដែរថា នៅថ្ងៃដដែលនោះដែរ លោក ហ៊ីង ភ័ព្វមិនា ក៏បានសហការជាមួយលោកនាយកសាលា លោកគ្រូអ្នកគ្រូ និងសិស្សានុសិស្ស នៅសាលាបថមសិក្សាគំរូក្រុង ចំនួនជាង៩០០នាក់ ចូលរួមប្រមូលសំរាម សំអាតតាមដងផ្លូវជុំវិញបរិវេណសាលាជាប់វិមានឯករាជ្យ ដើម្បីសោភ័ណ្ឌភាព និងបរិស្ថានផងដែរ៕
ចែករំលែកព័តមាននេះ