រាជធានីភ្នំពេញ ៖ ស្របពេលធនាគារជាតិនៃកម្ពុជាបានដាក់ពិដានឲ្យគ្រឹះស្ថានមីក្រូហិរញ្ញវត្ថុទាំងអស់បញ្ចុះអត្រាការប្រាក់មកនៅត្រឹម១៨%ក្នុងមួយឆ្នាំ សេដ្ឋវិទូកម្ពុជាបានហៅចំណាត់ការនេះថា ជាការជួយបង្កើតការងារ និងបង្កើនសង្វាក់ផលិតកម្មនៅកម្ពុជា ។
លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា បានថ្លែងឲ្យដឹងកាលពីព្រឹកថ្ងៃទី១៤ មីនា ម្សិលមិញថា ការធ្វើបែបនេះប្រសិនជាគិត គឺប៉ះពាល់ដល់យន្តការទីផ្សារសេរី ប៉ុន្តែនេះគ្រាន់តែជាអ្វីដែលរាជរដ្ឋាភិបាលចង់បង្ហាញពីការយកចិត្តទុកដាក់លើប្រជាពលរដ្ឋ មានន័យថា រាជរដ្ឋាភិបាលចង់ជួយប្រជាពលរដ្ឋ ព្រោះធនាគារជាតិបានបញ្ចេញទុនបម្រុងសម្រាប់ឲ្យគ្រឹះស្ថានមីក្រូហិរញ្ញវត្ថុខ្ចីប្រាក់ ក្នុងអត្រាការប្រាក់ទាបដល់គ្រឹះស្ថានទាំងនោះ ។
លោកបន្តថា ៖ « វិធានការនេះធ្វើឲ្យគ្រឹះស្ថានមីក្រូហិរញ្ញវត្ថុខាតបង់ផលប្រយោជន៍ តែវាជាការជួយដល់កសិករបានច្រើន ព្រោះអត្រាការប្រាក់៣០% កសិករមិនអាចធ្វើផលិតកម្មបានទេ » ។ លោកបន្តថា ៖ «អត្រាការប្រាក់នេះនឹងជួយសម្រួលដល់ជីវភាពកសិករ ជួយជំរុញការងារ និងផលិតកម្ម ដែលធ្វើឲ្យថ្លៃដើមនៃការផលិតធ្លាក់ចុះ និងអាចប្រកួតប្រជែងបាន » ។
រាជរដ្ឋាភិបាលកម្ពុជា តាមរយៈធនាគារជាតិនៃកម្ពុជា បានចេញសេចក្តីប្រកាសព័ត៌មាន មួយកាលពីថ្ងៃទី១៣ មីនា កន្លងមក ដោយសម្រេចទម្លាក់អត្រាការប្រាក់ឥណទានរបស់គ្រឹះស្ថានមីក្រូហិរញ្ញវត្ថុទាំងអស់នៅកម្ពុជា ពីជាង៣០% មកនៅត្រឹម១៨%ក្នុងមួយឆ្នាំ។ យោងតាមធនាគារជាតិនៃកម្ពុជាឲ្យដឹងថា ការទម្លាក់ការប្រាក់ឥណទានមក១៨%ក្នុងមួយឆ្នាំ នឹងត្រូវអនុវត្តចាប់ពីថ្ងៃទី១ ខែមេសា ឆ្នាំ២០១៧ តទៅជាកំហិត និងអនុវត្តសម្រាប់តែអតិថិជនថ្មីប៉ុណ្ណោះ ។
សេចក្តីប្រកាសព័ត៌មានរបស់ធនាគារជាតិនៃកម្ពុជាបានបញ្ជាក់ថា ការកំណត់អត្រាការប្រាក់ខ្ពស់បំផុត១៨%ក្នុងមួយឆ្នាំនេះ ដើម្បីរួមចំណែកគាំទ្រគោលនយោបាយរបស់រាជរដ្ឋាភិបាល ក្នុងការការពារផលប្រយោជន៍ប្រជាពលរដ្ឋ ជាពិសេស ប្រជាពលរដ្ឋក្រីក្រ ទប់ស្កាត់បំណុលវ័ណ្ឌក កាត់បន្ថយភាពក្រីក្រ និងការពារអតិថិជនពីការគិតការប្រាក់អត្រាខ្ពស់ពេក ។
លោកឧកញ៉ា ហ៊ួត អៀងតុង ប្រធានសមាគមមីក្រូហិរញ្ញវត្ថុកម្ពុជា បានថ្លែងថា តាមពិតក្នុងនាមប្រតិបត្តិករ នឹងអនុវត្តតាមគោលការណ៍របស់រាជរដ្ឋាភិបាល និងធនាគារជាតិនៃកម្ពុជា ហើយការទម្លាក់អត្រាការប្រាក់១៨%ក្នុងមួយឆ្នាំនេះ ជារឿងល្អសម្រាប់ពលរដ្ឋអ្នកទទួលឥណទានពីមីក្រូហិរញ្ញវត្ថុ ។
ទោះយ៉ាងណា លោកថា ចំពោះស្ថាប័នមីក្រូហិរញ្ញវត្ថុវិញ អាចជារឿងមិនល្អសម្រាប់ស្ថាប័នឥណទាន ដែលមិនអាចគ្រប់គ្រងប្រតិបត្តិការរបស់ខ្លួនបាន និងមានផលប៉ះពាល់លើប្រតិបត្តិការរបស់ពួកគាត់ផងដែរ ។
លោកឧកញ៉ាបន្ថែមថា ៖ « គ្រឹះស្ថានហិរញ្ញវត្ថុទាំងអស់ត្រូវតែអនុវត្តតាមសេចក្តីប្រកាសរបស់រាជរដ្ឋាភិបាលកម្ពុជា និងធនាគារជាតិនៃកម្ពុជា ព្រោះជាការសម្រេចមួយបានគិតគូរត្រឹមត្រូវបំផុត » ។
លោកឆារស៍ វ៉ាន់ ប្រធានសមាគមធនាគារកម្ពុជាបានថ្លែងថា អត្រាការប្រាក់របស់ធនាគារពាណិជ្ជ បានធ្លាក់ចុះច្រើនរួចទៅហើយ មិនអាចធ្លាក់ចុះច្រើនបន្ថែមទៀតនោះទេ ប៉ុន្តែការធ្លាក់ចុះអត្រាការប្រាក់ក្នុងវិស័យមីក្រូហិរញ្ញវត្ថុ គឺជាពេលវេលាសម្រាប់ការកែទម្រង់ ៕
ចែករំលែកព័តមាននេះ